რესტორატორთა ასოციაციაში ამბობენ, რომ პროფესიული სასწავლებლების კურსდამთავრებულები მცირე გამოცდილების მქონე კადრებს კონკურენციას ვერ უწევენ. შედეგად, ბიზნესის დაინტერესებაც ითანამშრომლოს მსგავსი ტიპის სასწავლებლებთან, ნაკლებია.

რესტორანთა ასოციაციის დამფუძნებლის, შოთა ბურჯანაძის თქმით, მთავრობის მიერ პროფესიულ სასწავლებზე გამოყოფილი ბიუჯეტი არამიზნობრივად და არაეფექტურად იხარჯება, საბოლოოდ კი ბიზნესს თავად უწევს კადრების გადამზადება.

„პროფესიულ სასწავლებლის დამთავრების შემდეგ კადრს გონია, რომ მიღებული სერტიფიკატით ის სრულფასოვანი მზარეული ან შეფმზარეულია. შესაბამისად, აქვს ამბიცია, რომ მოეწყოს იმ ხელფასზე, რომელიც რესტორანში 5 წლის განმავლობაში მომუშავე ადამიანს აქვს. რეალურად, ჩვენ ვიღებთ კადრებს, რომლებიც ისევ თავიდან სასწავლებლები არიან, თუმცა აქვთ უფრო მეტი ამბიციები. ბიუჯეტიდან გამოყოფილი თანხები არის გადაყრილი ვინაიდან, ადამიანებს, რომლებიც პროფესიულ სასწავლებლებში მიდიან აქვთ მოლოდინი, რომ დამატებითი პრაქტიკის გარეშე კვალიფიციური მზარეულები გახდებიან, თუმცა რეალურად ეს შედეგი სახეზე არ გვაქვს“, - განაცხადა ბურჯანაძემ ბიზნეს ფორმულასთან.

ცნობისთვის, მომდევნო წლისთვის, პროფესიული სასწავლებლების სახელმწიფო დაფინანსება 137.4 მლნ ლარამდე იზრდება, რაც 2022 წლის ბიუჯეტს 24 მილიონი ლარით აღემატება.

წყარო: businessformula.ge