„ევროკომისიის 12 პუნქტიანი პირობის დაკმაყოფილება ნიშნავს იმას, რომ ქვეყანამ გარემო გააჯანსაღა, სწორედ ამის გაჯანსაღების პერსპექტივას გვთავაზობს ევროპა და თუ ჩვენ ეს გავიარეთ, ჩვენ გადავდივართ სხვა თამაშის წესებში, უფრო მაღალ ლიგაში, სადაც უკვე ინვესტორები როგორც ცივილური  სამყაროდან, ასევე მესამე რიგის ქვეყნებიდან, სხვანაირად შეგხედავენ“, - ამის შესახებ რადიო „კომერსანტის“ გადაცემაში „პროფესიონალები“ ეკონომიკის დოქტორმა და შავი ზღვის საერთაშორისო უნივერსიტეტის ასოცირებულმა პროფესორმა რამაზ გერლიანმა ისაუბრა. მისი თქმით ევროკავშირის წევრობის კანდიდატის  სტატუსი  იქნება გადამწყვეტი, თუ საით წავა საინვესტიციო ვექტორი, რაშიც ბოლო პერიოდში ქვეყანას აქვს ვარდნა.

„ახლა შეიძლება  ჩავთვალოთ, რომ მთელი პოტენციური საინვესტიციო გარემო გამადიდებელი შუშით გვაკვირდება თუ რა გადაწყვეტილება იქნება მიღებული და იმის მერე გადაწყვეტენ ახორციელებენ თუ არა ინვესტიციას.ზოგმა შეიძლება მიიღოს გადაწყვეტილება და ქვეყნიდან გასვლაც კი დაიწყოს“, - აღნიშნა რამაზ  გერლიანმა.

გერლიანი დეოლიგარქიზაციის საკითხზე ფიქრობს, რომ ამ 12 პუნქტის შესრულება ჯამში უკვე  ქმნის  პირობებს, სადაც დეოლიგარქიზაციის  საკითხი პრაქტიკულად აღარ  დადგება.

„ქვეყანაში სადაც ადამიანების დიდ ნაწილს ცხოვრების ელემენტარული პირობების დაკმაყოფილება არ  შეუძლია, სწორედ იქ დგება ოლიგარქიზციის პრობლემა და სწორედ ამ პრობლემის წინაშე დგას დღეს საქართველო. ამიტომ სხვა პუნქტების შესრულების კვალობაზე, დღის წესრიგში ოლიგარქიცაზიის ნაწილი აღარც იქნება. როდესაც  ქვეყანაში საშუალო ფენა ყალიბდება იქ ძალიან ძნელია, რომ მილიონერმა ვინც არ უნდა იყოს ის, მიითვისოს ძალაუფლება.

დღეს საქართველოში მდიდარი ადამიანების კუთხით ოლიგარქიის ნიშნები ისეა, როგორც ეს ხდება მონოპოლიის შემთხვევაში. ეს პრობლემაა ქვეყნისთვის, იმიტომ რომ ოლიგარქია ნიშნავს კონკურენციის შეზღუდვას და მონოპოლიის წარმოშობას. დასაქმებულისთვის დაბალ შემოსავალს და კონკრეტული ბიზნესებისთვის მაღალ სარგებელს“,  აღნიშნა რამაზ გერლიანმა.

„რაც ეხება პუნქტების შესრულებას, აქ პოლიტიკური ელიტების ნებაზეა საუბარი, როგორც აქედან  ჩანს, უმცირესობებს  გაცილებით უფრო მაღალი ნება აქვთ,  ვიდრე უმრავლესობას, ამიტომ უშუალოდ ნაბიჯები საჭიროა უმრავლესობის მხრიდან, რომელმაც ეს ნება უნდა გამოიჩინოს და გააკეთოს, თუნდაც მარტივი მიზეზის - ეკონომიკური ბენეფიტების გამო. თუნდაც იმიტომ უნდა გააკეთონ ეს, რომ მერე ხალხმა და პოლიტიკურმა ოპონენტებმა რამის არ გაკეთებაში ბრალი არ დასდონ. მაგალითად პოლიტიკური ჯგუფი, რომელიც ამას განახორციელებს, ჩემთვის მისაღები იქნება“,-აღნიშნა რამაზ გერლიანმა.

თაკო კვაჭანტირაძე