2022 წლის მესამე კვარტლის ჭრილში, მთლიან ინფლაციაში ადგილობრივი ინფლაციის წვლილი 5.6 პროცენტს გაუტოლდა, ხოლო იმპორტირებული ინფლაციის წვლილმა 3.0 პროცენტი შეადგინა. როგორც ფინანსთა სამინისტროს ვებგვერდზე განთავსებული ინფორმაციიდან ირკვევა, აღნიშნული დინამიკა გამოწვეულია სურსათზე ფასის მომატებით და სამომხმარებლო კალათაში სასურსათო საქონლის ჯგუფის მიერ შედარებით მაღალი წონის დაკავებით.
აღსანიშნავია, რომ მესამე კვარტალში პირველი და მესამე კვარტლებისგან განსხვავებით როგორც ადგილობრივი ისე იმპორტირებული იმფლაციის კლებაა.
I კვარტალის ეკონომიკური ტენდენციების მიმოხილვაში აღნიშნულია, რომ პირველი კვარტლის ჭრილში, მთლიან ინფლაციაში ადგილობრივი ინფლაციის წვლილი გაუტოლდა 6.3 პროცენტს, ხოლო იმპორტირებული ინფლაციის წვლილმა შეადგინა 3.6 პროცენტი.
II კვარტალის ეკონომიკური ტენდენციების მიმოხილვაში კი წერია, რომ 2022 წლის მეორე კვარტლის ჭრილში, მთლიან ინფლაციაში ადგილობრივი ინფლაციის წვლილი გაუტოლდა 6.4 პროცენტს, ხოლო იმპორტირებული ინფლაციის წვლილმა შეადგინა 3.3 პროცენტი.
ეკონომიკური ტენდენციების მიმოხილვაში აღნიშნულია, რომ 2022 წლის დასაწყისიდან შეინიშნება წლიური ინფლაციის მიზნობრივ მაჩვენებელთან მნიშვნელოვანი გადაჭარბება. აღნიშნულის მიზეზს ძირითადად წარმოადგენს მიწოდების მხარეს არსებული ფაქტორები, როგორიც არის საერთაშორისო სასაქონლო ბაზრებზე მნიშვნელოვნად გაძვირებული პროდუქცია და გლობალურად სატვირთო ტრანსპორტირების ხარჯების მკვეთრი ზრდა.
„ამავე დროს, წლიური ინფლაციის მაჩვენებელზე გავლენა იქონია კომუნალური გადასახადების ცვლილებამ, რადგან სუბსიდირების პროგრამის დასრულებამ აღნიშნული საქონლის ინფლაციის მაჩვენებელი იმაზე მეტად გაზარდა, ვიდრე თავდაპირველი შემცირება იყო და მთლიანი ინფლაციის მაჩვენებლის მატება გამოიწვია. ინფლაციაზე ასევე გავლენას ახდენს მნიშვნელოვნად გააქტიურებული შიდა მოთხოვნა, რომელიც აღარ არის ინფლაციის შემამცირებელი ფაქტორი როგორც ეს იყო წინა პერიოდებში, ეკონომიკური ვარდნის დროს. გლობალური ინფლაცია წარმოადგენს საერთაშორისო ორგანიზაციების განხილვის საკითხს. საერთაშორისო ბაზარზე ნედლეულის, ნავთობის, გაზის ფასების ზრდამ და მნიშვნელოვანმა ფისკალურმა სტიმულებმა გამოიწვია ინფლაციური წნეხის ზრდა.
საერთაშორისო სავალუტო ფონდის ბოლო პროგნოზის მიხედვით (ოქტომბერი, 2022), მსოფლიოში მიმდინარე მოვლენებიდან გამომდინარე მსოფლიო ინფლაცია გაიზრდება ივლისის პროგნოზის 8.3 პროცენტიდან 8.8 პროცენტამდე, თუმცა მოსალოდნელია 2023 წელს მისი 6.5 პროცენტამდე, ხოლო 2024 წელს 4.1 პროცენტამდე შემცირება.
2022 წლის მესამე კვარტალში წლიურმა ინფალციამ შეადგინა 11.3 პროცენტი. აღნიშნული ზრდა მნიშვნელოვნად არის გამოწვეული საერთაშორისო ბაზრებზე ნავთობისა და სასურსათო პროდუქტების მზარდი ფასებით, რაც აისახება ადგილობრივ ფასებში და კომუნალური გადასახადების სუბსიდირების პროგრამის გაუქმებით.
ამავე დროს, წინა პერიოდებში გაუფასურებული ლარის გაცვლითი კურსის ზეგავლენით, მაღალ დონეზე რჩება იმპორტირებული ინფლაცია. საბაზო ინფლაცია (თამბაქოს გარეშე) კი მესამე კვარტალში გაუტოლდა 7.2 პროცენტს“, - აღნიშნულია III კვარტალის ეკონომიკური ტენდენციების მიმოხილვაში.
როგორც ცნობილია, 26 ოქტომბერს ეროვნული ბანკის მონეტარული პოლიტიკის კომიტეტმა მიიღო გადაწყვეტილება რეფინანსირების განაკვეთის გამკაცრებულ დონეზე, 11 პროცენტზე დატოვების შესახებ, ფასების შემდგომი მომატების მოლოდინების ზეწოლის შესამსუბუქებლად.