დასაქმებულის მიერ ნამუშევარი დროის აღრიცხვა ანუ ე.წ. ტაბელების წარმოება გამარტივდა. კერძოდ, დამსაქმებლის მიერ შესავსები სავალდებულო გრაფების რიცხვი 18-დან 10-მდე შემცირდა. შესაბამისი განკარგულება საკანონმდებლო მაცნეზე გამოქვეყნდა. როგორც რადიო „კომერსანტის“ ეთერში გადაცემა „კომერსანტის დილაში“ შრომის ინსპექციის სამსახურის უფროსის პირველმა მოადგილემ ნატო ნათენაძემ ისაუბრა. მისი თქმით, დასაქმებულის მიერ ნამუშევარი დროის აღრიცხვის ამოქმედების შემდეგ უწყებას მთელი რიგი დარღვევები აქვს გამოვლენილი.
„შრომის ინსპექციის სამსახურსაც მთელი რიგი დარღვევები აქვს გამოვლენილი ზუსტად ფორმის წარმოების საფუძველზე, რადგანაც სწორედ ფორმიდან უფრო ნათელი გახდა ამ დარღვევის არსებობის საკითხი. და განსაკუთრებით ხაზგასასმელია ფინანსური დარღვევები, რომელიც დღევანდელი მდგომარეობით შესაძლოა 1 მლნ-ზე მეტ ოდენობასაც შეიძლება უტოლდებოდეს“, - ამბობს ნატო ნათენაძე.
შრომის ინსპექციის სამსახურის უფროსის პირველი მოადგილე ამბობს, რომ დღეს არსებული ფორმა არის მოქნილი იმისთვის, რომ ყველა ის ღირებულებითი ნაწილი, ყველა ის უფლება რასაც აქამდე ძველი ფორმა არეგულირებდა შინაარსობრივად ისევ ასასახი და დასამუშავებელია, მაგრამ უფრო მოქნილად.
„ტექნიკურადაც, რომ შევეხო ამ თემას წინა ფორმა შედგებოდა 18 გრაფისგან. დღევანდელი ფორმა შედგება 10 გრაფისგან. შესაბამისად შემცირდა საწარმოებელი, დასაჯამებელი მონაცემების რაოდენობა. თუმცა ეს არ მომხდარა დასაქმებულთა უფლებების გაუარესების ხარჯზე.
შრომის ინსპექციის სამსახური ინსპექტირებებს ახორციელებს, როგორც შემოსული საჩივრების საფუძველზე, ასევე საკუთარი ინიციატივით, როგორც გეგმური ასევე არაგეგმური ინსპექტირებების ფარგლებში“, - ამბობს ნათენაძე.
ნატო ნათენაძემ რადიო „კომერსანტთან“დასაქმებულის მიერ ნამუშევარი დროის აღრიცხვის ანუ ე.წ. ტაბელების წარმოების ამოქმედების მნიშვნელობის საკითხზეც ისაუბრა და განმარტა, რომ მთლიანობაში შრომის ინსპექციის პრაქტიკამ აჩვენა, რომ ფორმამ იმუშავა საკმაოდ კარგად.
„ვინაიდან აღნიშნული დოკუმენტით პირველ რიგში გაიზარდა ცნობიერების ამაღლება დასაქმებულების. ზუსტად გაცნობის მექანიზმი, რომელიც ამ ფორმას აქვს ჩადებული ერთ-ერთ მნიშვნელოვან კრიტერიუმად ითვალისწინებდა იმას, რომ დასაქმებულები ყოველი თვის ბოლოს ეცნობოდნენ თვის ჭრილში განხორციელებულ საქმიანობას და ამოწმებდნენ რამდენად სათანადოდ ფასდებოდა მათი შრომა. იღებდნენ თუ არა იმ რაოდენობის შრომის ანაზღაურებას რაც ეკუთვნოდათ ან ზეგანაკვეთურს“, - ამბობს ნათენაძე.
შეგახსენებთ, სამუშაო დროის აღრიცხვის წესი ქვეყანაში 2021 წლის 1 მარტიდან ამოქმედდა. ქვეყანაში მოქმედი შრომის კოდექსის მიხედვით, ყველა კომპანია ვალდებულია, აღრიცხოს თანამშრომელთა ნამუშევარი საათები, რათა ზუსტად განისაზღვროს ხელფასის, ზეგანაკვეთურად ნამუშევარი საათების, საავადმყოფო ფურცელზე ყოფნისა და შვებულების ანაზღაურების ოდენობა.