„ჩვენი, ანუ მწარმოებლების მთავარი ინტერესი არის ის, რომ სექტორში რაც შეიძლება მეტი გამჭვირვალობა იყოს, მიწოდების ჯაჭვები არ დაზარალდეს და მომხმარებლის ჯიბეზე და ხარისხზე არ აისახოს“ - ამის შესახებ რადიო „კომერსანტის“ დილის ეთერში ფარმაცევტულ კომპანიების წარმომადგენელთა ასოციაციის ხელმძღვანელმა ირაკლი მარგველაშვილმა ისაუბრა.
მისი თქმით სექტორი მიესალმება კონკურენციის სააგენტოს მიერ დაწყებულ მოკვლევას იმასთან დაკავშირებით მოხდა თუ არა იმპორტირებულ მედიკამენტებზე ფასების შეთანხმებულად აწევა.
„კონკურენციის სააგენტომ დაიწყო მოკვლევა, რასაც ყველა მივესალმებით, ორი კვირის წინ, როცა ჯანდაცვის სამინისტრო და მთავრობა საუბრობდა იმაზე, რომ თურქეთიდან იმპორტირებულ მედიკამენტებზე ფასის აწევა მოხდა, ამას მაშინ არ მოჰყოლია ქმედითი ნაბიჯები. კითხვა მდგომარეობს შემდეგში, როგორ მოხერხდა ის, რომ 3-4 თვე მედიკამენტებზე ფასი დაიწია, მაგრამ როგორც დისტრიბუტორები იძახიან ამის შენარჩუნება ხანგრძლივად ვერ მოხდა. მთავარი კითხვა არის ის თუ რა ელოდება პაციენტს უახლოეს მომავალში და შეთანხმებულია თუ არა ეს ქმედება? კონკურენციის სააგენტომ შეიძლება დაადანაშაულოს ის კომპანიები იმ შემთხვევაში თუ ისინი მოქმედებენ შეთანხმებულად. ძალიან ძნელი წარმოსადგენია, რომ ის კომპანიები, რომლებსაც ერთმანეთთან ძალიან აქტიური კონკურენცია აქვთ და აგრესიულიც, ასეთი ტიპის ქმედებას თანხმდებოდნენ. აქაც რჩება კითხვა, როგორ ხდება მაშინ რომ ერთნაირი ფასებია. ესეთ მედიკამენტებს მითუმეტეს ონკოლოგიურს ჰყავს ორი სამი მომწოდებელი, რომელიც ყველა ამ კომპანიას აძლევენ ერთ და იმავე ფასში“ - აღნიშნა ირაკლი მარგველაშვილმა.
მარგველაშვილის თქმით, მოსახლეობისთვის მედიკამენტების შემცირებული ფასებით მიწოდება უნდა მოხდეს თანამშრომლობით მთავრობასა და ბიზნესს შორის და არა დაძაბული რიტორიკით. მისივე თქმით ფარმაცია ბევრ ქვეყანაში რეგულირებადი სფეროა და ამის მიღწევა საქართველოშიც შესაძლებელია, თუმცა ამას მეტი კომუნიკაცია სჭირდება და არა ერთი მხრიდან მეორის დადანაშაულება.
„მე ძალიან ოპტიმისტურად ვუყურებ ამ საკითხს, ყველას აწყობს ამის დარეგულირება და თუ ვინმემ გადააჭარბა თავის უფლებამოსილებას ზომები აუცილებლად მისაღებია.
სახელმწიფო გვეუბნება , რომ ჩვენ გვექნება მექანიზმი, რომ მყისიერად ვიმოქმედოთ თუ გვაქვს ფასის მომატება, ბევრ ქვეყანაში არის ფასთა რეგულაციის კომპონენტი, როცა რეგულირდება ფასი შეძენის ფასსა და საბითუმო ფასს შორის, ანუ დისტრიბუტორი და იმპორტიორი ვერ ამატებს იმდენს, რამდენიც უნდა პროცენტულად. ამ თემაზე კონსულტაციები ჯერ არ გვქონია, ამიტომ მე გამიჭირდება თქმა, თუ რას აპირებს ჯანდაცვის სამინისტრო კონკრეტულად, თუმცა ერთ-ერთი ლოგიკური მიმართულება შესაძლებელია სხვა ქვეყნების გამოცდილებით გავაკეთოთ. ეს არის ფასთა რეგულაცია, მარჟის რეგულირება შეძენის ფასსა და საბითუმო ფასს შორის.
ჩვენ ასოციაციას კონკურენციის სააგენტოსთან თანამშრომლობის ძალიან კარგი გამოცდილება აქვს, ახლაც მზად ვართ მათთან თანამშრომლობისთვის, რადგან ამ სფეროს ანალიზი ძალიან რთულია,“- აღნიშნა ირაკლი მარგველაშვილმა.
რაც შეეხება ჰოლდინგურ სტრუქტურებს , მარგველაშვილი აღნიშნავს ამ მიმართულებით რისკები არსებობს, რაზეც საუბარი უკვე წლების განმავლობაშია.
„როცა ერთ კომპანიას აქვს საბითუმო, საცალო და ჰოსპიტალური სექტორი, რა თქმა უნდა რისკები არის. ამ ჰოლდინგების შექმნას აქვს რთული ისტორია, არ ვაპირებ არავის ადვოკატირებას, ეს მათი საქმეა, უბრალოდ მინდა გითხრათ, რომ ჰოსპიტალურ სექტორში ფარმაცევტული სექტორი შევიდა მას შემდეგ, რაც სახელმწიფომ სთხოვა, ჰოსპიტალური სექტორის გადარჩენა, ეს ხდებოდა დაახლოებით 15 წლის წინ, როდესაც საქართველოში არ იყო არც ერთი საავადმყოფო რომელიც გადასარჩენი არ იყო და შესაბამისად დაჟინებული თხოვნაც იყო, ამიტომაც მოხდა ეს. მას შემდეგ მათ განავითარეს ეს სექტორი და ახლა ჩვენ ვსაუბრობთ ძალიან დიდ ქსელებზე, რისკები არის, მაგრამ თუ ჩვენ ამ ჰოლდინგურ სისტემას შევეხებით და დაშლაზე იქნება საუბარი, მთავარი კითხვაა, თუ რა მოხდება შემდეგ? ჩვენ პაციენტს და წამლების მიწოდების ჯაჭვებს რისკის ქვეშ ვერ დავაყენებთ.
თუ სახელმწიფო შეეცდება რომ კერძო სექტორი უფრო ფართოდ ჩაანაცვლოს ეს ძალიან დიდ პრობლემებთან მიგვიყვანს, შეიძლება ჰოლდინგების მიმართ რაღაცები გავამკაცროთ, მაგრამ თუ პირდაპირ დაშლაზეა საუბარი. მე ამას არ ვეთანხმები, რადგან მერე რა მოხდება. არ ვიცი“ - აღნიშნა ირაკლი მარგველაშვილმა.