„მწვანე პასპორტის“ დაწესებასთან დაკავშირებით მთავრობის გადაწყვეტილებამ ვერც ამ იდეის მომხრეთა გული მოიგო. მიუხედავად იმისა, რომ რესტორნების ნაწილი ბოლო პერიოდში ამ იდეას აქტიურად უჭერდა მხარს, აცხადებს, რომ ახალი რეგულაციისთვის ფორმა არასწორად შეირჩა. თუკი ვაქცინაციის მოწინააღმდეგეთა ნაწილი აცხადებს, რომ კანონი დისკრიმინაციულია და რეგულაციას არ დაემორჩილება, რესტორატორთა ასოციაციაში ,,კომერსანტს“ განუცხადეს, რომ იმუნიზაციის დაბალი ტემპის პირობებში ისინი მომხმარებელთა დიდ ნაწილს დაკარგავენ და ბიზნესის სტაბილურობას რისკი შეექმნება.
„აქტიურად ვითხოვდით იმ იმუნიზაციის პროცესის დაჩქარებას და ,,მწვანე პასპორტის“ შემოღებას, მაგრამ ამ ფორმით იგი ბიზნესისთვის აშკარად ზიანის მომტანია. მიღებული გადაწყვეტილება ვერ შეუწყობს ხელს ვაქცინაციის პროცესის დაჩქარებას, ვერც ეკონომიკურ აქტივობას გამოიწვევს, ბევრი რესტორანი დაკარგავს მომხმარებელს დაბალი იმუნიზაციის გამო. აშკარად გამოჩნდა, რომ უკვე ჩვენ გვიქმნიან პრობლემას, ეს ინიციატივა არასწორად არის დარეგულირებული, სინამდვილეში იდეა კარგია, რადგან რესტორანში მომსვლელიც და დამხვედრიც უნდა იყოს აცრილი, ეს მნიშვნელოვანია, მაგრამ სისტემურად არის ზომები გასატარებელი. რა თქმა უნდა, ვრჩებით პოზიციაზე, რომ იმუნიზაცია უნდა დაჩქარდეს და ამისთვის გარკვეული სეგმენტისთვის აცრა სავალდებულო უნდა გახდეს“, - აცხადებს რესტორატორთა ასოციაციის დამფუძნებელი შოთა ბურჯანაძე.
შეგახსენებთ, რომ რესტორნების ნაწილმა ახალი რეგულაციების მიმართ აშკარა დაუმორჩილებლობა გამოაცხადა. ისინი თვლიან, რომ რეგულაცია დისკრიმინაციულია.
ილუზიების მუზეუმის, ჰოლიზეუმის, პლანეტარიუმის მთაწმინდაზე და მე-10 აუდიტორიის დამფუძნებელმა ლევან ბახიამ ამის შესახებ სოციალურ ქსელში დაწერა და ჩამოთვალა ობიექტები, რომლებიც რეგულაციას არ დაემორჩილებიან და მისულ მომხმარებელს კოვიდ პასპორტს არ მოთხოვენ.
როგორც ცნობილია, დაავადებათა კონტროლის ეროვნული ცენტრის ხელმძღვანელმა ამირან გამყრელიძემ 16 ნოემბერს საკოორდინაციო საბჭოს დასრულების შემდეგ განაცხადა, რომ ბიზნესის მხრიდან „მწვანე პასპორტის“ რეგულაციის დარღვევის შემთხვევაში შესაბამისი სანქციები გაიწერება.
რაც შეეხება კოვიდსტატისტიკას, ბოლო 24 საათში საქართველოში კორონავირუსით ინფიცირების 4732 ახალი შემთხვევა დადასტურდა.
გარდაიცვალა 72 ადამიანი. სულ ქვეყანაში ვირუსს ემსხვერპლა 11 212 ადამიანი.
დადებითობის მაჩვენებელი ასეთია: დღიური - 9,33%, ბოლო 14 დღის - 9,77%, ბოლო 7 დღის - 9,11%.
მარი ჩიტაია