საპარკინგე ადგილების გამოყოფა პრობლემას ჯერჯერობით არ აგვარებს, - ასე გამოეხმაურა საქართველოს დისტრიბუტორთა ბიზნეს ასოციაციის პრეზიდენტი დედაქალაქის მერიის გადაწყვეტილებას დედაქალაქში 550-ზე მეტი სპეციალური ადგილის განსაზღვრაზე, რომელიც სამეწარმეო და მიწოდების სერვისისთვის განკუთვნილი სატრანსპორტო საშუალებების პარკინგს დაეთმობა.
როგორც ივა ჭყონიამ „კომერსანტთან“ საუბრისას განაცხადა, კარგია, რომ მერია აღნიშნულ საკითხზე მუშაობს, თუმცა არსებითი პრობლემის გადასაჭრელად კომპლექსური მიდგომაა საჭირო.
„ვიდრე ქუჩების რეაბილიტაცია დაიწყებოდა, აღნიშნული თემა მაშინვე უნდა ყოფილიყო გათვალისწინებული. თორემ დღეს საკმაოდ მწვავე პრობლემა ისევ დგას და კოლოსალური ჯარიმებია უკვე დაწერილი კომპანიებზე. ამ ჯარიმებს რა ეშველება, არაფერი ხომ? გამოყოფილი 550 ადგილი თავისთავად საკმარისი არ არის და ჯერ ისიც არ ვიცი, რა ადგილების გამოყოფაზეა საუბარი. ჩვენ თავის დროზე გარკვეული სია გავაგზავნეთ და გვქონდა გარკვეული კომუნიკაცია დედაქალაქის მერიასთან და მის სატრანსპორტო სამსახურთან. მოგვთხოვეს კრიტიკულად მნიშვნელოვანი ადგილების სია, მაგრამ ეს მასშტაბურად ამ პრობლემას ვერ გადაჭრის. ნაწილობრივ შესაძლოა მოგვარდეს, მაგრამ ეს კომპლექსური საკითხია“, - განმარტავს ივა ჭყონია.
მისი თქმით, კომპლექსური მიდგომა სადისტრიბუციო მანქანებისათვის მარტო საპარკინგე ადგილების გამოყოფას არ ნიშნავს. ივა ჭყონია უახლოეს კვირებში ფორუმის ორგანიზებასაც აანონსებს, სადაც აღნიშნულ პრობლემას სახელისუფლებო წრეების წარმომადგენლებთან ერთად განიხილავს.
„ადგილები რომ გამოიყოფა, აქ მხოლოდ ერთ სადისტრიბუციო მანქანაზე ხომ არაა საუბარი? ათობით სადისტრიბუციო კომპანიაა და წარმოიდგინეთ ერთი ავტომობილი რომ მივიდეს და დაპარკინგდეს, ამ დროს მეორე სადისტრიბუციო კომპანიის მანქანაც მივიდეს და დაელოდოს, ამ ლოდინის დროს შესაძლოა უკონტაქტომ გაიაროს და ჯარიმა დაუწეროს. კარგია, რომ გარკვეული ნაბიჯი გადაიდგა, მოხარული ვარ და ჩემთვისაც სიურპრიზი იყო, ნამდვილად არ ველოდებოდი. მეგონა უფრო კომუნიკაცია გვექნებოდა და უფრო კომპლექსურად ვიმუშავებდით, მაგრამ რომ არ მოგატყუოთ, სია მე გადავეცი, მაგრამ რა ადგილებია გამოყოფილი, არ ვიცი. ჩვენთან კომუნიკაცია არ ყოფილა და არც წერილობით მოუმართავთ, რომ ეთქვათ, თქვენ რომ მოგვმართეთ, პირობითად 5000 წერტილზე, გამოვყავით 500 წერტილი აქ და აქ.
მარტო ადგილების გამოყოფა ამ პრობლემას არ გადაჭრის და დისკუსიაში უნდა შევიდეთ. უახლოეს პერიოდში, სადღაც 2 კვირაში, ვგეგმავთ მცირე ფორუმის ჩატარებას ქალაქში პარკირებასთან დაკავშირებით, სადაც მოვიწვევთ ქალაქის სატრანსპორტო სამსახურის ხელმძღვანელს და დიდი იმედი გვაქვს, რომ მობრძანდება. ჩავრთავთ ბიზნესომბუდსმენს, ჩავრთავთ საპატრულო პოლიციას და ასევე ვფიქრობთ ეკონომიკისა და მდგრადი განვითარების სამინისტროსაც, რადგანაც ქვეყნის ეკონომიკისთვის მნიშვნელოვანია გამართულად მუშაობდეს ჩვენი სექტორი და ინფლაციაზე დამატებითი წნეხი არ იყოს ის ჯარიმები, რომელზედაც ვფიქრობთ, რომ არასწორად იწერება.
ვფიქრობთ, რომ პრობლემა ისე უნდა გადაიჭრას, რომ არც ზედმეტი ტრაფიკი შეიქმნას, არსებულმა ადგილებმაც დააკმაყოფილოს და ვინმე არ დაიჩაგროს. თან აქ მხოლოდ მაღაზიებზე არაა საუბარი, იგივე პრობლემაა ჰორეკა სექტორის, რესტორნების, კაფეების კუთხით. კარგია, რომ თბილისის მერიიდან მზაობა არის და ოპერატიულად რაღაც რაოდენობა ადგილებისა უკვე გამოიყო“, - აცხადებს საქართველოს დისტრიბუტორთა ბიზნეს ასოციაციის პრეზიდენტი.
როგორც ივა ჭყონია ამბობს, სადისტრიბუციო ავტომობილებს პრობლემები ძირითადად დედაქალაქში და აჭარაშია.
„გაძვირებულმა პარკირების ჯარიმებმა და მით უმეტეს, რაც გაძვირდა აქტიურად დაიწყეს ჯარიმების წერა, როგორც საპატრულო, ასევე დედაქალაქის პარკირებამ, სერიოზული პრობლემები შეგვიქმნა, თვის მანძილზე შეიძლება დაწერილიყო 100 ლარი და ახლა იწერება 500 ლარი. როცა ხელფასი გაქვს 1000-1500 ლარი და ამის 30%-ს ჯარიმებში გადაიხდი, კიდევ ერთ მიზეზს ვუჩენთ, რომ სამსახური დატოვოს, ან კომპანია თუ გადაიხდის, დამატებითი წნეხი იყოს ხარჯების კუთხით“, - ამბობს ჭყონია.
პრობლემის მოგვარების ერთ-ერთი მიმართულება, შესაძლოა, იყოს სადისტრიბუციო კომპანიების ავტომობილების რეესტრიც. რაც შეეხება ღამის დისტრიბუციის თემას, რომელიც აღნიშნული პრობლემის დარეგულირების ერთ-ერთ გზად განიხილებოდა, ივა ჭყონია აცხადებს, რომ ამ მიმართულებით პრობლემა მცირე და საშუალო მაღაზიების მხრიდანაა.
„ღამის დისტრიბუციაზე ამ ეტაპზე საუბარი არ არის, რადგანაც ძალიან რთულია ამის გადაწყობა. სადისტრიბუციო კომპანიები ამისთვის მზად ვართ, მაგრამ რთულია, რადგანაც პრობლემებია საშუალო და მცირე ობიექტების კუთხით, რომლებიც ღამე მუშაობას და ფიზიკურად პროდუქტის მიღებას ვერ შეძლებენ. თუმცა ამ თემაზე აქტიურად ვიმუშავებთ თბილისის მერიასთან ერთად, რომ ეს საკითხიც გადავჭრათ. პირიქით ჩვენთვისაც კარგია, რომ რაც შეიძლება ნაკლებმა მანქანამ იმოძრაოს და ტრაფიკი ნაკლები იყოს“, - აცხადებს ივა ჭყონია.
ცნობისთვის, დღეს დედაქალაქის მთავრობის სხდომაზე თბილისის მერმა განაცხადა, რომ პარკირებასთან დაკავშირებით ახალი ინიციატივა მოაგვარებს სადისტრიბუციო ავტომანქანების გამო სხვა ავტომანქანების გადაადგილების შეფერხების პრობლემას.
„მოგეხსენებათ, რამდენად მნიშვნელოვანია ეკონომიკური საქმიანობის ხელშეწყობა. ჩვენმა გუნდმა არაერთი ინიციატივა განახორციელა ადგილობრივი ბიზნესის და ეკონომიკური საქმიანობის დახმარების მიზნით. განსაკუთრებით, პანდემიის პერიოდში. ამჯერად, მინდა, გაცნობოთ, რომ ტრანსპორტის და ურბანული განვითარების სააგენტოსა და „საქართველოს დისტრიბუტორთა ბიზნეს ასოციაციის“ თანამშრომლობით, დედაქალაქში განისაზღვრა 550-ზე მეტი სპეციალური ადგილი, რომელიც დაეთმობა სამეწარმეო და მიწოდების სერვისისთვის განკუთვნილი სატრანსპორტო საშუალებების პარკინგს. სააგენტო აქტიურად მუშაობს ამ საკითხზე და თბილისის მასშტაბით, დაწყებულია სპეციალური პარკირების ზონების გამოყოფის პროცესი, რაც ეტაპობრივად განხორციელდება. ყველა ვთანხმდებით, რომ ძალიან მნიშვნელოვანია პროექტის განხორციელება. ხშირია შემთხვევები, როცა სადისტრიბუციო ავტომანქანები გაჩერებული ჰყავთ და აფერხებენ სხვა ავტომანქანების გადაადგილებას. კონკრეტული სივრცეების გამოყოფით ეს პრობლემა მოგვარდება“, - განაცხადა კახა კალაძემ.