პრეზიდენტმა სალომე ზურაბიშვილმა ეროვნული ბანკის შესახებ კანონს ვეტო დაადო.
„ეროვნული ბანკის შესახებ“ ორგანულ კანონში ცვლილებებს ვადებ ვეტოს, რადგან ის არც საჭირო, არც საჩქარო და არც არგუმენტირებულია,“- ნათქვამია საქართველოს პრეზიდენტის ადმინისტრაციის ვებგვერდზე გამოქვეყნებულ განცხადებაში. პრეზიდენტის შეფასებით, ჩნდება ეჭვი, რომ თუ მის მიერ წარდგენილ კანდიდატურებს არ ექნება პარლამენტის მხარდაჭერა, კანონი იძლევა შესაძლებლობას, პირველმა ვიცეპრეზიდენტმა განუსაზღვრელი ვადით შეასრულოს ეროვნული ბანკის პრეზიდენტის მოვალეობა.
ეროვნული ბანკის ყოფილი პრეზიდენტი რომან გოცირიძე ამბობს, რომ სალომე ზურაბიშვილის მიერ ვეტოს დადება სწორი ნაბიჯია, რადგან ეროვნულ ბანკში გადატრიალება მზადდება, რაც უზარმაზარ რისკს უქმნის ქვეყნის მაკროეკონომიკურ სტაბილურობას და ანადგურებს მის დამოუკიდებლობას.
„სალომე ზურაბიშვილმა ეროვნული ბანკის კანონს ვეტო დაადო. სწორად მოიქცა, ნაწილობრივ გამოასწორა თავისი წინა შეცდომები, როდესაც დააძალეს და ეროვნული ბანკის საბჭოში შეაყვანინეს ჯერ ფინანსთა მინისტრის მოადგილე, შემდეგ ეკონომიმიკის მინისტრი, მერე მისივე მოადგილე (ანუ, ყველა ყოფილები) და ბოლოს ეროვნული ბანკის პრეზიდენტად უნდა დაესვათ მოქმედი ფინანსთა მინისტრი ლაშა ხუციშვილი.
ფაქტობრივად მზადდება კლანური გადატრიალება. ეს საფრთხე იგრძნო სავალუტო ფონდმაც, რომელმაც მწვავე შეფასება მისცა ამ კანონს, სადაც პირველი მოადგილის პოსტი უნდა შემოღებულიყო, რომელიც იქნებოდა ეროვნული ბანკის პრეზიდენტის მოვალეობის შემსრულებელი, სანამ სალომე ზურაბიშვილს არ დაიყოლიებდნენ.
სალომე ზურაბიშვილმა უნდა მიბაძოს გიორგი მარგველაშვილს, უნდა შექმნას კომპეტენტური კომისია და გამოაცხადოს კონკურსი ეროვნული ბანკის საბჭოს ორი ვაკანტური წევრის ასარჩევად, საიდანაც ერთ-ერთი შემდეგ გახდება ეროვნული ბანკის პრეზიდენტი“, — წერს გოცირიძე სოციალურ ქსელში.
ახალი კანონი ეროვნულ ბანკში პირველი ვიცე-პრეზიდენტის პოსტს ამკვიდრებდა. კანონის თანახმად, პირველ ვიცე-პრეზიდენტს სებ-ის პრეზიდენტის არყოფნის პირობებში პრეზიდენტის უფლებამოსილების შესრულება შეეძლებოდა. ახალი კანონი ეროვნულ ბანკთან ერთად საერთაშორისო სავალუტო ფონდმაც გააკრიტიკა.
რომან გოცირიძე
