საინვესტიციო კომპანია ,,ენკას“ საქართველოდან ოფიციალურად წასვლის შემდეგ ენერგეტიკოსებისთვის მთავარ პრობლემად რჩება საკითხი, როგორ დამუშავდეს პროექტი ისე, რომ ტექნიკური პარამეტრები გასწორდეს და მოსახლეობასთან საერთო ენაც უნდა გამოინახოს, რომ პროტესტი არ გამოიწვიოს. ენერგეტიკოს გია არაბიძის აზრით, პროექტის ყველა კომპონენტი თავიდან არის გადასამუშავებელი.  

,,კონკრეტულად საუბარი ჯერჯერობით ძნელია, რა შეიძლება შეიცვალოს. თუმცა დანამდვილებით ვიცი, რომ  ყველაფერი თავიდან ბოლომდე არის გასაკეთებელი, უნდა შეიცვალოს ტექნიკური მხარეც და იდეოლოგიაც, მათ შორის,  ტარიფის კომპონენტი, გამოსყიდვის ვადა და სხვა. უნდა ვიცოდეთ,  როდის დააბრუნებს ინვესტორი საქართველოს ქონებას - მიწით დაწყებული, სადგურით დამთავრებული. ეს საკითხები იქნება ძირითადად გასარკვევი. სერიოზულად გადასამუშავებელია ყველა ნაწილი, რომ ცოტა მეტად მიმზიდველი გახდეს ინვესტორისთვის“, - ამბობს გია არაბიძე ,,კომერსანტთან“.

ენერგეტიკოსი ფიქრობს, რომ კარგი იქნება, თუ ჰესის მშენებლობა შესაძლებელი გახდება სახელმწიფოს და ინვესტორის პარტნიორობით. ასევე აქცენტი გაკეთდება  სოციალურ კეთილდღეობასთან დაკავშირებით, რომელიც შეიძლება ხალხმა გიგანტური ჰესის მშენებლობით მიიღოს.

,,ნამახვანის“ ალტერნატივას რეალურად ვერ ვხედავ. პროექტი უნდა განხორციელდეს, სხვა შემთხვევაში საქართველოს ენერგეტიკას მომავალი არ ექნება. აუცილებლად უნდა აშენდეს ასევე ,,ნესკრა“ და ,,ხუდონჰესიც“. ამ სამი ჰიდროელექტროსადგურის მშენებლობა თუ არ განხორციელდება,  ძალიან დიდი ხანი გვექნება პრობლემა ენერგეტიკაში. ამიტომ ვამბობ, რომ ,,ნამახვანის“ პროექტს კარგი გადახედვა უნდა.  ყველაფერი სანახავია, მათ შორის, სოციალური პროგრამები, რამდენი პროცენტი იყო გამოყოფილი, რა სოციალური ღონისძიებებს ითვალისწინებდა და სამომავლოდ როგორ შეიძლება დაკორექტირდეს, რომ მეტი სარგებელი ნახოს ხალხმა და  პროექტის მიმართ უფრო კეთილად განეწყოს. სხვა შემთხვევაში, თუ უახლესი ტექნოლოგია არ წამოგვეწია,  არც ალტერნატივა ჩანს  ან ეს უნდა გახდეს ატომური ელექტროსადგური, სხვა გამოსავალს ვერ ვხედავ“, - აცხადებს გია არაბიძე ,,კომერსანტთან“.

„ენკა ინსაათის“ 2021 წლის ფინანსური ანგარიში 24 მარტს გამოქვეყნდა, რომლიდანაც გაირკვა, რომ სახელმწიფოსა და კომპანიას შორის ნამახვანჰესის მშენებლობასთან დაკავშირებით არსებული საინვესტიციო ხელშეკრულება ოფიციალურად გაწყვეტილია.

ამასთან, ფინანსურ ანგარიშში მითითებულია, რომ კომპანიამ ჰიდროელექტროსადგურის მშენებლობისთვის გაწეული ინვესტიცია და შესაბამისი ტექნიკური აღჭურვილობა 40.4 მილიონი დოლარის ოდენობით ჩამოწერა. კომპანია საქართველოში ჯამში 800 მილიონი დოლარის ინვესტირებას გეგმავდა.

2021 წლის სექტემბერში ინვესტორმა განაცხადა, რომ ფორსმაჟორის გათვალისწინებით საინვესტიციო ხელშეკრულებას გაწყვეტდა, რასაც მოჰყვა მთავრობის განმარტება, რომ ხელშეკრულების შენარჩუნების მიზნით კომპანიასთან მოლაპარაკებებს გააგრძელებდნენ. როგორც ირკვევა, საქართველოს მთავრობამ ვერ დაარწმუნა კომპანია, რომ კონტრაქტი შენარჩუნებულიყო.

მარი ჩიტაია