აჭარაში მშენებლობების ნებართვების გაცემა შემცირებულია, რაც ახალი რეგულაციებითაა განპირობებული, — ამის შესახებ „კომერსანტთან“ სამშენებლო სექტორის წარმომადგენელმა ნათია სირაბიძემ განაცხადა.
მისი განმარტებით, ახალმა რეგულაციებმა გამოიწვია ის, რომ დღეს დეველოპერები ძველ გაცემულ ნებართვებზე ორიენტირდნენ და ასეთი მშენებლობების შესყიდვა დაიწყეს.
„სტატისტიკურ მონაცემებზეც კარგად ჩანს, რომ აჭარაში მშენებლობების ნებართვების გაცემა შემცირებულია. ეს გამოწვეულია ახალი რეგულაციებით, მათ შორის სიმაღლის კოეფიციენტის საშუალო არითმეტიკული გამოთვლით. რას გულისხმობს ეს, მაგალითად თუ კვარტალში დგას სამი სახლი, 2 სართულიანი, 4 სართულიანი და 6 სართულიანი, უნდა ავიღოთ ამ სართულების საშუალო კოეფიციენტი, რაც არის 2+4+6=12/3 = 4. არსებული 2 სართულიანი შენობა რომ აიღო, სამსართულიანის აშენების უფლება გაქვს, ათვისებაში მოსახლეს 1.3 ან 1.5 კოეფიციენტს აძლევ, მშენებლობის ხარჯიც რომ დავუმატოთ, მშენებელს ხარჯს არ გაუსწორებს. ამიტომ ძირითადად მოთხოვნა არის ძველ დამტკიცებულ პროექტებზე. დეველოპერები ყიდულობენ უკვე დამტკიცებულ პროექტებს. არის სხვა ფაქტორებიც, მაგრამ ეს ერთ-ერთი მარტივად აღსაქმელია,“ - განაცხადა სირაბიძემ.
აღსანიშნავია, რომ ოფიციალური დეკლარირებული მონაცემებით, საქართველოში 2022 წელს გაცემულია 10 822 ნებართვა (წინა წელთან შედარებით 7.2 პროცენტით მეტი) 7 421.9 ათასი კვ.მ ფართობის შენობა-ნაგებობების მშენებლობაზე (წინა წელთან შედარებით 0.2 პროცენტით ნაკლები). ნებართვების 77.2 პროცენტი მოდის ქვეყნის 4 რეგიონზე, კერძოდ, ჩასატარებელი სამშენებლო სამუშაოების 51.9 პროცენტი მოდის ქ. თბილისზე, 10.5 პროცენტი - მცხეთა-მთიანეთის რეგიონზე, 8.4 პროცენტი - ქვემო ქართლის რეგიონზე და 6.4 პროცენტი - იმერეთის რეგიონზე.