ჩვენ ვემზადებით ახალი რეფორმებისთვის, ინიციატივებისთვის და განვითარებისთვის, - ასე უპასუხა ეკონომიკის და მდგრადი განვითარების მინისტრმა ნათია თურნავამ ახალი წლის შემდეგ მოსალოდნელ სამთავრობო ცვლილებებთან დაკავშირებით დასმულ კითხვას „პალიტრანიუსის“ გადაცემა „თავისუფალ სტუდიაში“.

ასევე, კითხვაზე, რამდენად აქვს საფუძველი ამ ტიპის ინფორმაციას და ემზადება თუ არა ეკონომიკის მინისტრი და პრემიერი წასასვლელად, თურნავა პასუხობს, რომ „მომავალ წელს ჩვენ ვემზადებით უკეთესი ეკონომიკური გარემოს შესაქმენლად ბიზნესისთვის, მშვიდობიანი გარემოს უზრუნველსაყოფად ჩვენი მოქალაქეებისთვის და მცირე და საშუალო ბიზნესისთვის“.

გარდა ამისა ეკონომიკის მინისტრმა გადაცემაში სამომავლო გეგმებზე ისაუბრა და აღნიშნა, რომ 40-მდე ახალი პროექტი აქვთ შემუშავებული.

„40-მდე ახალი პროექტი არის მარტო ჩემი სამინისტროს პორთფელში შექმნილი. ეს არის ტურიზმის თვალსაზრისით ახალი ტურისტული ადგილების განვითარება, ტრადიციული ტურისტული კურორტების განვითარება, ეს არის ლოჯისტიკური ცენტრები, სამრეწველო პროექტები. აი, ამ შეთავაზებებით და პაკეტებით აქეთ მოვძებნით და შევთავაზებთ ინვესტორებს ამას უფრო პროაქტიურად და არ დაველოდებით ჩვენ ვიდრე მოგვადგებიან. ეს არის ის სიახლე, რომელიც ჩვენთან არის“, - განაცხადა თურნავამ.

​როგორც მინისტრმა აღნიშნა, საბოლოო ჯამში პოლიტიკურმა გავლენებმაც ვერ მოახდინა ნეგატიური განწყობა ინვესტორებზე იმიტომ, რომ ხელისუფლებამ არ მისცა საშუალება არცერთ პოლიტიკურ ძალას, „ვისაც ჰქონდა სურვილი დესტრუქციის, ეს განეხორციელებინა.

„არ მივეცით საშუალება ქვეყანაში არეულობის შემოტანის და დაერღვიათ დიდი შრომით მოტანილი მაკროეკონომიკური სტაბილურობა, - განაცხადა თურნავამ.

ამასთან, კითხვაზე, პანდემიის გარდა ხომ არ შეიძლება ვეძებოთ რაიმე სუბიექტური მიზეზები, რომელიც ხელისუფლების მიერ ცალკეული მიმართულებით არასწორ ნაბიჯებს უკავშირდებოდეს, ეკონომიკის მინისტრი აცხადებს, რომ არასდროს ჰქონიათ მცდელობები ის პრობლემები, რაც დღეს არსებობს ეკონომიკაში თუ სოციალურ სექტორში, პანდემიისთვის გადაებრალებინათ.

„პანდემიამ თავისი დიდი მნიშვნელოვანი პრობლემა მოიტანა და ეს ასეა და ამაზე ვერავინ დაობს. რა თქმა უნდა, ის სირთულეები და გამოწვევები, რასაც ჩვენ ვუპირისპირდებით გაცილებით უფრო ღრმა არის, ვიდრე უშუალოდ პანდემიით გამოწვეული მოკლევადიანი ეფექტი. ინფლაცია არის პანდემიით გამოწვეული და მალე ჩაქრება, მაგრამ სიღარიბე ეს არის ისეთი სერიოზული გამოწვევა, რომელსაც ქვეყნები წლების განმავლობაში ებრძვიან და განვითარებულ ევროპულ სახელმწიფოში არსებობს სიღარიბის ფენომენი. ეს ნამდვილად არ აიხსნება პანდემიით, ეს არის სისტემური პრობლემა. აქედან გამომდინარე, ჩვენ ყოველთვის მზად ვართ დავხვეწოთ ჩვენი პოლიტიკა, რაღაცა გამოგვდის, რაღაცა ალბათ, არ გამოგვდის და შეცდომებიც ხდება ხოლმე. შეცდომებს არ უშვებს მხოლოდ ის, ვინც არაფერს აკეთებს. მზად ვართ ყოველთვის, რომ ვაღიაროთ რაც არასწორად გაკეთდა ან შეიძლებოდა უკეთესად გაკეთებულიყო, ამიტომაც, მუდმივად იცვლება ჩვენი მიდგომები.

მუდმივად ძიების პროცესში ვართ და ახალი პროექტები და ინიციატივები შემოდის. პირდაპირ მითითება გვაქვს პრემიერისგან, რომ მომავალი წელი რეალურად იყოს როგორც ჩვენ ვვარაუდობთ სრულფასოვანი აღდგენის და განვითარების წელი, უნდა აღინიშნოს ახალი ინიციატივებით.

ძალიან ბევრი ახალი ინიციატივაა, მათ შორის ადამიანების ყოფის გაუმჯობესების მიმართულებით. ხედავთ, რომ წლის ბოლოს რამდენიმე ახალი ინიციატივა გაჟღერდა. ჩვენთან ეს არის ახალი საინიციატივო შეთავაზება. ერთ-ერთი გამოწვევა არის ინვესტიციების მოზიდვის აუცილებლობა. გარკვეული პოზიტიური ტენდენცია გამოიკვეთა, მაგრამ საკმარისი არ არის. აქედან გამომდინარე ჩვენი განხორციელებული პოლიტიკა თუ იყო პასიური და ინვესტორები აქეთ მოდიოდნენ და გვეუბნებოდნენ რა პროექტში შეიძლება ჩავდოთ ფული და მერე ვთავაზობდით გარკვეულ შეთავაზებას, ახალ ვცვლით და ეს იქნება აგრესიული, პროაქტიური მიდგომა, როდესაც აქეთ ვავითარებთ და ვეძებთ ინვესტორებს სხვა ქვეყანაში, - განაცხადა თურნავამ.

IPN.GE