სასოფლო სამეურნეო პროდუქციისა და კვების მრეწველობის ექსპორტის ზრდა ძალიან მნიშვნელოვანია ჩვენთვის, იმიტომ, რომ ეს არის შემოსავალი, რომელიც პირდაპირ გლეხის ოჯახისკენ მიიმართება და დღეს ჩვენ შეგვიძლია ვთქვათ, რომ მაქსიმალურად მაღალი მოთხოვნა არის ჩვენს სასოფლო სამეურნეო პროდუქციაზე, - ამის შესახებ ეკონომიკისა და მდგრადი განვითარების მინისტრმა ნათია თურნავამ მთავრობის სხდომის დასრულების შემდეგ განაცხადა.

მისი ინფორმაციით, ტრადიციულად, ლიდერობს მომპოვებელი და მძიმე მრეწველობის ინდუსტრიის ექსპორტი, ეს არის სპილენძის მადნები, ფეროშენადნობები და აზოტოვანი სასუქები, თუმცა მესამე-მეოთხე პოზიციაზე ზრდის ტემპის მიხედვით არის სასოფლო სამეურნეო პროდუქცია და კვების მრეწველობა.

„დღეს გამოქვეყნდა მორიგი სტატისტიკური მონაცემები საგარეო ვაჭრობასთან დაკავშირებით. დღეს უფრო ჩაშლილი მონაცემები ვრცელდება, საიდანაც ჩვენ შეგვიძლია ვიმსჯელოთ არა მხოლოდ ექსპორტის ზრდაზე, რომელიც როგორც მოგეხსენებათ, ადგილობრივი წარმოების ექსპორტსაც შეიცავს და რეექსპორტსაც, არამედ უშუალოდ ადგილობრივი წარმოების საექსპორტო პროდუქციის ზრდაზე გვაქვს საკმაოდ დადებითი ტენდენცია. 2021 წლის ნოემბერში ადგილობრივი ქართული წარმოების ექსპორტი გაიზარდა 44,1%-ით, 2020 წლის ნოემბერთან შედარებით, თუ შევადარებთ 2019 წლის ნოემბერს ანუ პანდემიამდე პერიოდს, აქაც გვაქვს თითქმის 49%-იანი ზრდა. ადგილობრივი პროდუქციის ექსპორტმა ნოემბერში 325,2 მილიონი დოლარი შეადგინა, ხოლო 11 თვეს თუ დავაჯამებთ, ამ პერიოდშიც სწორედ ადგილობრივი წარმოების ექსპორტის ზრდამ განაპირობა მთლიანად ექსპორტის ზრდა, 28,7% გვაქვს ადგილობრივი ექსპორტის ზრდა 11 თვეში - 2,8 მილიარდ დოლარს გადააჭარბა ადგილობრივი წარმოების პროდუქციის გაყიდვებმა საგარეო ბაზრებზე. გეოგრაფიაც არის საკმაოდ დივერსიფიცირებული, რაც ნიშნავს იმას, რომ არც ერთ კონკრეტულ ცალკე აღებულ ბაზარზე არ არის ჩვენი მწარმოებელი დამოკიდებული და მაქსიმალური რაოდენობა ქვეყნების არის მოცული. სწრაფი ზრდა გვაქვს ჩვენ როგორც რეგიონის ქვეყნებში, ჩვენი მეზობელი სახელმწიფოების მიმართულებით პროდუქციის გაყიდვაში, ასევე ჩინეთი და ამერიკის შეერთებული შტატები, ეს ორი გეოგრაფია კიდევ გამოირჩევა მაღალი ზრდის მაჩვენებლით, სწრაფად იზრდება იქ ქართული წარმოების პროდუქციის გაყიდვები და ინტერესიც მატულობს. რაც შეეხება, თუ რა პროდუქციის მიხედვით დაფიქსირდა ზრდა და სად გაიზარდა ჩვენი ექსპორტი - ტრადიციულად, ლიდერობს, რა თქმა უნდა, მომპოვებელი და მძიმე მრეწველობის ინდუსტრია, ეს არის სპილენძის მადნები, ფეროშენადნობები და აზოტოვანი სასუქები, მაგრამ ნიშანდობლივია, რომ ამ ჯგუფის შემდეგ უკვე მესამე ~-მეოთხე პოზიციაზე ზრდის ტემპის მიხედვით არის სასოფლო სამეურნეო პროდუქცია და კვების მრეწველობა - ეს არის ღვინო, ეს არის თხილი, კვების მრეწველობის პროდუქცია, სოფლის მეურნეობის პროდუქცია. ეს არის ძალიან მნიშვნელოვანი ჩვენთვის, იმიტომ, რომ ეს არის შემოსავალი, რომელიც პირდაპირ გლეხის ოჯახისკენ მიიმართება და დღეს ჩვენ შეგვიძლია ვთქვათ, რომ მაქსიმალურად მაღალი მოთხოვნა არის ჩვენს სასოფლო სამეურნეო პროდუქციაზე,“- განაცხადა თურნავამ.

ipn.ge