ცნობილი ამერიკელი კინორეჟისორი ფრენსისი კოპოლა თავის ღვინის ბიზნესს ყიდის, რომელიც რამდენიმე კომპანიისგან შედგება.

გარიგების დეტალები ჯერ-ჯერობით უცნობია, წინასწარი ინფორმაციით, ღვინის მწარმოებელი Delicato მეღვინეობებს Francis Ford Coppola Winery და Virginia Dare Winery-ს და ასევე ვენახს სამხრეთ კალიფორნიის სოფელ სონომში იყიდის.

ახალი მფლობელის საკუთრებაში ასევე გადავა კოპოლას მიერ შექმნილი რამდენიმე ბრენდი, მათ შორის შტატებში პრემიუმ-კატეგორიის ღვინის გაყიდვებში ყველაზე პოპულარული დასახელებების სამეულში შემავალი Diamond Collection.

ჰოლივუდის კლასიკოსი, ისეთი ფილმების ავტორი, როგორც „ნათლიმამა“ და „აპოკალიფსისი დღეს“, 6 ოსკარის ლაურეატი, პროდიუსერი და კინემატოგრაფიული დინასტიის დამაარსებელი, 82 წლის კოპოლა ცნობილია მსოფლიოსთვის ასევე როგორც მეღვინე, რომელიც მშვენიერ, უმაღლესი კლასის ღვინოებს აწარმოებს.

რეჟისორის კარიერა მეღვინეობაში 1975 წელს დაიწყო, როდესაც კალიფორნიული ღვინო პირველ ნაბიჯებს დგამდა.

„ნათლიმამა-2“-სთვის მიღებული ჰონორარით მან პირველი მეღვინეობა Inglenook — მამული და 650 ჰექტარის მიწის ნაკვეთი შეიძინა და ღვინის წარმოება დაიწყო.

1995 წელს ფილმ „დრაკულასგან“ მიღებული შემოსავლით მან 38 ჰექტარი ვენახი იყიდა და წითელი ღვინო სიმბოლური სახელით Rubicon ჩამოასხა. ის ძალიან მალე გახდა პოპულარული, რასაც დღემდე ინარჩუნებს.

გამოჩენილი რეჟისორი ნიჭიერი მარკეტოლოგიც აღმოჩნდა და წარმატებული ღვინის ბიზნესის აწყობა შეძლო. ის თავის კავშირს კინემატოგრაფთან ყოველთვის ხაზს უსვამდა - მაგალითად, მისი კომპანიის პრემიუმ-ღვინოების ბრენდს Director’s Cut (რეჟისორის ვერსია) ერქვა და თითო ბოთლი 40 დოლარად წარმატებით იყიდებოდა.

ღვინის წარმოებით გამომუშავებული მოგება კოპოლამ ასევე მეღვინეობის განვითარებაზე გაუშვა და კიდევ რამდენიმე მიწის ნაკვეთი იყიდა. სამუშაოდ საუკეთესო ამერიკელი და ფრანგი სპეციალისტები ჩამოჰყავდა.

კომპანია Delicato-სთან, რომელიც დღეს მის ღვინის ბიზნესს ყიდის, კოპოლას ხანგრძლივი პარტნიორობა აკავშირებს - ზრდადი მოთხოვნის გამო კოპოლას საკუთარი საწარმოო სიმძლავრეები არ ჰყოფნიდა და ის Delicato-სგან ყურძენს და ღვინომასალებს ყიდულობდა.

1924 წელს დაარსებული კომპანია შტატებში ღვინის წარმოების მოცულობით მეხუთეა, ხოლო კალიფორნიული ღვინოების ექსპორტის კუთხით - მესამე. Delicato ასევე წარმატებულ ბიზნესებს გერმანიაში და ჩილეში ფლობს.

ჰოლივუდის ვარსკვლავის კომპანიის ყიდვა Delicato-ს მაღალი კატეგორიის ღვინოებს ბოჰემურობას შემატებს, რომელიც მას აქამდე აკლდა.

ზოგადად მეღვინეობა ყოველთვის იყო და დღესაც შოუ-ბიზნესის ვარსკვლავებისთვის კაპიტალის დაბანდების ერთ-ერთი ყველაზე პოპულარული მიმართულებად რჩება. კოპოლა ამ მხრივ პირველი იყო, თუმცა, მას სხვა ვარსკვლავებმა, როგორც ამერიკაში, ასევე ევროპაში, მიჰყვნენ - ჟერარ დეპარდიე, პიერ რიშარი, ბრედ პიტი და ანჟელინა ჯოლი, ანტონიო ბანდერასი, დენ ეკროიდი, სტინგი, მადონა და სხვ.

თუმცა, მეღვინეობიდან მათი ერთ-ერთი კუმირის ფრენსის კოპოლას წასვლა მათთვის გაფრთხილება უნდა გახდეს - როგორც ჩანს, მსოფლიო მეღვინეობაში რომანტიზმის დრო უკვე იწურება.

Forbes