NATO-მ უნდა გააძლიეროს აღმოსავლეთ ფლანგი, სანამ გვიანი არ იქნება - ამის შესახებ ესტონეთის პრეზიდენტი, ალარ კარისი Financial Times-ში გამოქვეყნებულ სტატიაში წერს.
ესტონეთის პრეზიდენტი სტატიაში ისტორიულ პარალელებს ავლებს და ამბობს, რომ დღეს უკრაინას ევროპის მხარდაჭერა სჭირდება.
"73 წლის წინ, 22 000-ზე მეტი ადამიანი ჩემი ქვეყნიდან ციმბირში იძულებით გადაიყვანეს. მათგან ნახევარი ქალი იყო, მესამედი კი ბავშვები. დეპორტირებულთაგან ყველაზე უმცროსი სულ რაღაც სამი დღის იყო.
1939 წლის მოლოტოვ-რიბენტროპის პაქტმა ბალტიისპირეთის ქვეყნები რკინის ფარდის მეორე მხარეს დატოვა. დღეს ჩვენ ვხედავთ, როგორ ცდილობს რუსეთი ამ განხეთქილების აღდგენას. ომის შუაგულიდან უკრაინელი ოჯახები გადაჰყავთ ისეთ ქვეყანაში, რომელიც მათი არ არის. 6 წლის ბიჭი თავის ქალაში ნამსხვრევებით, აღწერს, როგორ დაიწვა დედამისი მანქანაში, რუსული ჭურვის მოხვედრის შედეგად. ეს სცენა ტალინიდან, ბერლინიდან ან ბუქარესტიდან სულ რაღაც 90 წუთის საჰაერო გზაზე მოხდა. ეს ხდება ევროპაში და უკრაინას ჩვენი დახმარება სჭირდება",- წერს ესტონეთის პრეზიდენტი სტატიაში.
ალარ კარისის თქმით, პუტინს ომი ნაწილობრივ უკვე წაგებული აქვს, რადგან რუსეთი ცივილური სამყაროსგან ასეთი იზოლირებული ცივი ომის დროსაც არ ყოფილა. ის აღნიშნავს, რომ სანქციები, რომელიც დასავლეთმა რუსეთს დაუწესა ეფექტურია, თუმცა უკრაინის მხარდასაჭერად უფრო მეტია საჭირო:
"გარკვეულწილად, ვლადიმერ პუტინმა ეს ომი უკვე წააგო. ამაზე მიუთითებს გაეროს გენერალურ ასამბლეაზე ჩატარებული კენჭისყრა, სადაც რუსეთს მხარი ოთხმა ქვეყანამ დაუჭირა, დანარჩენმა 141-მა კი საომარი მოქმედებების შეწყვეტა მოითხოვა. ცივი ომის დროსაც კი, საბჭოთა კავშირი ასეთი იზოლირებული არასდროს ყოფილა.
თუმცა, ცივი ომის ეპოქის ეკონომიკა არის ზუსტად ის, საითაც რუსეთი მიდის დემოკრატიული ქვეყნების მიერ დაწესებული შორსმიმავალი ეკონომიკური და პოლიტიკური სანქციების შედეგად. ჩვენი სამხედრო დახმარება და იარაღი აძლიერებს უკრაინელებს, რადგან ისინი იცავენ თავიანთ ქვეყანას, მის სუვერენიტეტსა და თავისუფლებას. მაგრამ მათ მეტი სჭირდებათ.
უპირველეს ყოვლისა, ჩვენ შეგვიძლია დავეხმაროთ უკრაინას ამ სიტუაციის მიღებაზე უარის თქმით: სახელმწიფო, რომელიც აგზავნის თავის არმიას სხვა ქვეყნის კანონიერად არჩეული მთავრობის დასამხობად და კარნახობს, რომელ ალიანსში უნდა იყოს, ვერ გახდება ახალი რეალობა ევროპაში.
მანამ სანამ რუსეთი აგრძელებს თავის ომს და სანამ არ გაიყვანს თავის ჯარებს, ჩვენ მზად უნდა ვიყოთ ცხოვრების სტილის ცვლილებებისთვის, რომელსაც უკვე შევეჩვიეთ და რომლის განუყოფელ ნაწილს წარმოადგენს რუსული ნავთობი და გაზი ევროპის მრავალ ქვეყანაში. თითოეული ევრო, რომელსაც ჩვენ ვიხდით, პირდაპირ ან ირიბად იხარჯება უკრაინაზე თავდასხმაში, კვებავს ომის ძალისხმევას",-ვკითხულობთ სტატიაში.
ესტონეთის პრეზიდენტი სტატიაში საუბრობს დასავლეთის რეაქციაზე რუსეთის მხრიდან უკრაინის ომამდე განხორციელებულ აგრესიაზე, ამავე კონტექსტში ახსენებს საქართველოსაც და წერს, რომ 2008 წლის ომმა დასავლეთი გააერთიანა, თუმცა მათ ეს მალევე დაივიწყეს.
კარისი ამბობს, რომ რუსეთი საფრთხეა დემოკრატიული მსოფლიოსთვის, განსაკუთრებით კი მათთვის, ვინც მის მეზობლადაა, ამიტომ მისი თქმით, NATO-მ უნდა იფიქროს, თუ რა ნაბიჯებს გადადგამს ის რუსეთის შესაჩერებლად.
"ჩვენ ასევე უნდა ვიფიქროთ იმაზე, თუ რა უნდა გავაკეთოთ, თუ პუტინის ომის სისასტიკე არ დასრულდება. გავაგრძელებთ თუ არა უკრაინის მხარდაჭერას გვერდიდან, ან მზად ვიქნებით ომის დასასრულებლად შემდეგი ნაბიჯის გადასადგმელად? რა შეიძლება შემდეგი ნაბიჯი იყოს?
იმ მოთხოვნით, რომ NATO-მ დააბრუნოს 1997 წლის მდგომარეობა და აეკრძალოს ალიანსის სამხედრო ნაწილების განთავსება ახალ წევრ ქვეყნებში, კრემლი ცდილობს ევროპაში ახალი რკინის ფარდის აღმართვას.
ესტონეთი 14 ქვეყნიდან ერთ-ერთია - NATO-ს ამჟამინდელი წევრის თითქმის ნახევრიდან - რომელიც ალიანსს გასული მეოთხედი საუკუნის სხვადასხვა ეტაპზე შეუერთდა. ყველა თვლიდა წევრობას, როგორც პოტენციური რუსული აგრესიისგან თავის დასაცავად. ჩვენ NATO-ში ალბანეთთან, ბულგარეთთან, ხორვატიასთან, ჩეხეთის რესპუბლიკასთან, უნგრეთთან, ლატვიასთან, ლიეტუვასთან, მონტენეგროსთან, ჩრდილოეთ მაკედონიასთან, პოლონეთთან, რუმინეთთან, სლოვაკეთთან და სლოვენიასთან ერთად მიგვიღეს, თუმცა ზოგიერთმა მთავრობამ სერიოზულად არ მიიღო ჩვენი გაფრთხილებები რუსეთის შესახებ. ახლა ისინი ხედავენ, რომ ჩვენ მართალი ვიყავით.
რუსეთ-საქართველოს ომი 2008 წლის აგვისტოში, რუსეთის არმიის სამხრეთ ოსეთის მახლობლად მდებარე ქალაქებში გორსა და ფოთში შეჭრამ, დასავლეთს გაერთიანება აიძულა, მაგრამ ეს მალევე მიეცა დავიწყებას. როდესაც აღმოსავლეთ ფლანგზე მყოფი ქვეყნები საუბრობდნენ NATO-ს თავდაცვის გაძლიერებაზე, ზოგიერთმა ეს დამღლელ ჩივილად მიიღო. 2014 წელს , როდესაც რუსეთმა ყირიმის ანექსია მოახდინა და დაიწყო აღმოსავლეთ უკრაინის სეპარატისტებისთვის სამხედრო დახმარების გაწევა, ხალხმა დაიწყო იმის გაცნობიერება, რომ პოლონეთისა და ბალტიისპირეთის ქვეყნების გაფრთხილებები უსაფუძვლო არ ყოფილა.
დასავლეთის შეკავება უკრაინაში ჩავარდა. ახლა NATO მზად უნდა იყოს მომავალი საფრთხეებისთვის. ვაღიაროთ, რომ რუსეთის აგრესია საფრთხეს უქმნის მთელ დემოკრატიულ სამყაროს, განსაკუთრებით კი რუსეთთან ყველაზე ახლოს მყოფ ქვეყნებს. ვაღიაროთ, რომ პუტინი სამხედრო საფრთხეს წარმოადგენს ჩვენთვის ყველასთვის.
ამაზე მხოლოდ ერთი პასუხი არსებობს: სანდო, თვალსაჩინო და ეფექტური შეკავება. მოდით დავამყაროთ გაძლიერებული და მუდმივი კავშირი NATO-ს აღმოსავლეთ ფლანგის ქვეყნებში.", -წერს ესტონეთის პრეზიდენტი.
ესტონეთის პრეზიდენტი სტატიაში წერს, რომ უკრაინაში შეჭრით რუსეთმა დაარღვია 1997 წლის მაისში NATO-სა და რუსეთს შორის დადებული შეთანხმება, რომლის თანახმადაც მან პირობა დადო, რომ პატივს სცემდა ყველა სახელმწიფოს სუვერენიტეტსა და არ ჩაერეოდა მათ არჩევანში. მისივე თქმით, დროა აღნიშნული აქტი ბათილად გამოცხადდეს.
ესტონეთის პრეზიდენტი სტატიაში ასევე აღნიშნავს, რომ მნიშვნელოვანია NATO-მ გააძლიეროს თავდაცვა ყველა მიმართულებით.
"ისტორიის სარკის წინ მდგომი ყველა მოკავშირის ამოცანაა ახლავე მიიღონ ზომები, რათა შეაჩერონ პუტინის ომის მანქანა შემდგომი წინსვლისგან",-წერს ალარ კარისი.
წყარო: მთავარი არხი