ქართული ნატურალური წვენების მწარმოებელმა კომპანია ,,ალალი“ უკრაინაში მიმდინარე საომარი მოქმედებების გამო ექსპორტს აჩერებს.  საწარმოს დამფუძნებელი გოჩა ღვინეფაძე ,,კომერსანტთან“ ამბობს, რომ ოდესის პორტში ჩასული გემი უკანვე მობრუნდა. ექსპორტიორის ინფორმაციით, უკრაინის ბაზრის გაჩერების გამო კომპანიის წლიური ზარალი 500 000 ლარია, ერთჯერადმა ზარალმა კი 150 000 ლარი შეადგინა.

,,ჩვენი პროდუქცია აქტიურად გადიოდა უკრაინაში. დისტრიბუცია გვქონდა  ხარკოვსა და კიევში, ბოლო პარტიის გაგზავნაც გავრისკეთ, მაგრამ ტვირთმა დანიშნულების ადგილამდე ვერ ჩააღწია. ადგილზე ჩასული გემი  ოდესის პორტის  დაბომბვის გამო უკან დაბრუნდა. გარდა ამისა, ათასობით ლარის ფინანსური დავალიანება დარჩა გადაუხდელი.  უკრაინის ბაზარი ძალიან კარგად მუშაობდა. მიმდინარე ომმა ძალიან დაგვაზარალა“, - ამბობს , ,კომერსანტთან“ გოჩა ღვინეფაძე.

ექსპორტიორის თქმით, უკრაინის ბაზარს მთლიანი ექსპორტის დაახლოებით 15% ეჭირა. დანაკარგის კომპენსირებას სამომავლოდ ალტერნატიულ ბაზრებზე პოზიციების გაძლიერებით შეეცდებიან.

,,საკმაოდ კარგად მუშაობდა უკრაინის ბაზარი, ბრუნვაში 13-15%-ს დავკარგავთ. მთელი გეგმა შეგვეცვალა, ცუდი რამე მოხდა. ალტერნატიული ბაზრებზე გავაძლიერებთ მუშაობას, როგორიცაა ბალტიის ქვეყნები, აშშ, ყაზახეთი, ჩეხეთი, პოლონეთი და ერაყი.   ახალი პროდუქცია ჩაეშვება, რაზეც ასევე დიდ იმედს ვამყარებთ“, - დასძენს ღვინეფაძე ,,კომერსანტთან“.

ცნობისთვის: ქართული ნატურალური ხილის წვენების მწარმოებელი კომპანია „აჩინებულის“ საწარმო თელავში მდებარეობს. ის „ერთიანი აგროპროექტის“ ფარგლებში შეიქმნა და 2019 წლის ზაფხულიდან ამოქმედდა. საწარმოში ჯამში 2,8 მილიონი ლარის ინვესტიცია განხორციელდა.

„აჩინებული“ ამ ეტაპზე რამდენიმე სახეობის წვენს აწარმოებს. მათ შორის -  ვაშლის, ატმის, ყურძნის, მაყვლის, ციტრუსის, ალუბლისა და ბროწეულის.

საწარმოში დასაქმებულია დაახლოებით 25 ადამიანი.

მარი ჩიტაია