პატიმრობაში მყოფი რუსი ოპოზიციონერი პოლიტიკოსი ალექსეი ნავალნი კვლავ გამოვიდა საპროტესტო აქციების გამართვის მოწოდებით მოსკოვის მიერ უკრაინაში შეჭრის საწინააღმდეგოდ იმისთვის, რათა წინააღმდეგობა გაეწიოს "პროპაგანდის" მანქანას, რომელსაც პრეზიდენტი ვლადიმირ პუტინი აკონტროლებს.

კრემლის ყველაზე ხმამაღალი კრიტიკოსი ომის საწინააღმდეგო მოძრაობას 11 მარტს მოუწოდებს, დაძლიონ დაპატიმრების შიში და გავიდნენ ქუჩებში, რადგან "ეს ბრძოლა ნამდვილად არაა უშედეგო". ნავალნი წერს, რომ "შეშლილ მანიაკ პუტინს ყველაზე სწრაფად ახლა რუსეთის ხალხი შეაჩერებს, თუკი ისინი ომის საწინააღმდეგოდ გამოვლენ".

რუსეთი უკრაინაში 24 თებერვალს შეიჭრა და აცხადებს, რომ უკრაინა მის უსაფრთხოებას უქმნის საფრთხეს. მას შემდეგ ნავალნი ამბობს, რომ "პუტინის პროპაგანდა" მალავს მსხვერპლის მასშტაბს და ცრუობს ომის და ნგრევის მიზეზებზე.

"თუკი [გამოკითხვებს] დავუჯერებთ, სამიდან ერთი ადამიანი ანტისაომარ მოძრაობას უჭერდა მხარს კონფლიქტის დაწყებისას, - წერს ნავალნი და დასძენს, - და ეს მონაცემი მანამდეა მოპოვებული, სანამ ომი ჩვენზეც აისახებოდა, სანქციებით და ეკონომიკური კატასტროფით. სანამ ომის ყველაზე შემზარავი საშინელება - შვილების კუბოები დაუბრუნდებოდა დედებს".

უკრაინაში შეჭრის შემდეგ, რუსეთში 14,000-მდე ადამიანი დააკავა პოლიციამ ომის გაპროტესტების გამო, იუწყება OVD-Info, არაკომერციული ორგანიზაცია, რომელიც რუსეთში დაპატიმრებების პროცესს აკვირდება.