საქართველოდან საზღვაო გზით გასატანი, შესაბამისი წესით დეკლარირებული საქონლის საბაჟო საწყობიდან ნავსადგურში გადაზიდვის ვადა 12 საათიდან 24 საათამდე გაიზარდა. შემოსავლების სამსახურის ინფორმაციით, გადასაზიდი ტვირთის აღრიცხვა ხორციელდება გამარტივებული წესით და არ საჭიროებს დალუქვას საბაჟო საწყობიდან ნავსადგურში ტრანსპორტირების პროცესში.

„ტრანსფორდის“ აღმასრულებელი დირექტორი ვასილ მაზიაშვილი „კომერსანტთან“ ამბობს, რომ აღნიშნული ცვლილება ნავმისადგომზე ტვირთის მიწოდების დროს დაახლოებით 3/4-ჯერ შეამცირებს.

„არსებული კანონით, საბაჟო საწყობებს პორტამდე გადაზიდვისათვის სჭირდებოდათ ტენტიანი ტიპის მანქანები, რაც დამატებით ხარჯს და დროს მოითხოვდა ასეთი ტიპის მანქანების სიმცირიდან გამომდინარე, დრო ასევე იკარგებოდა უშუალოდ გადაზიდვის პროცესში (დალუქვის პროცესი), ცვლილების შემდეგ კი შესაძლებელია, რომ ოთხჯერ შემცირდეს ნავმისადგომამდე ტვირთის მიწოდების დრო, რაც ნიშნავს მეტ გადამუშავებულ ტვირთს ქვეყნისათვის.

ჩვენს ბიზნესში დრო არის განსაკუთრებულად მნიშვნელოვანი, რადგან ნებისმიერი მოცდენა იწვევს გადაზიდვის ჯაჭვის ჩამოშლას, აღნიშნული კი დაკავშირებულია ჯარიმებთან და სხვა გაუთვალისწინებელ ხარჯებთან. გარდა ხარჯისა, გაზრდილი ტვირთბრუნვის პირობებში მნიშვნელოვანია, რომ სწრაფად მოხდეს საწყობიდან ტვირთის გატანა, ახალის მისაღებად. მიღებული კანონი ფაქტიურად რამდენჯერმე ამცირებს გადამუშავების დროს, ხარჯს და მეტი ტვირთის გატარების შესაძლებლობას აძლევს კომპანიებს, რაც დამატებით მიღებულ შემოსავალს ნიშნავს. დამატებით, ხაზგასმით უნდა აღინიშნოს, რომ კანონი მოგვცემს სერვისის დახვეწის შესაძლებლობას და ქვეყნის როგორც მიმზიდველი კორიდორის წარმოჩენაში დაგვეხმარება, რაც საერთაშორისო პარტნიორებთან გრძელვადიანი თანამშრომლობის ერთგვარი გარანტი იქნება“, - აღნიშნავს ვასილ მაზიაშვილი.

შემოსავლების სამსახურში განმარტავენ, რომ საკანონმდებლო ცვლილებები მნიშვნელოვნად შეამცირებს გემების მოცდენის, ასევე ტვირთების საერთაშორისო გადაზიდვასთან დაკავშირებული სატვირთო და ლოგისტიკური ოპერაციებისათვის საჭირო დროს. ამასთან, გაიზრდება ქვეყნის, როგორც სატრანზიტო დერეფნის პოტენციალი და შესაძლებელი იქნება იმ გამოწვევებთან გამკლავება, რაც განპირობებულია გაზრდილი ტვირთბრუნვით.