პარასკევს არასტაბილურ ვაჭრობაში ნავთობის ფასი დაეცა და ორივე საორიენტაციო ნიშნულზე დაფიქსირდა ყველაზე დიდი ყოველკვირეული ვარდნა თვეების განმავლობაში. მიზეზი ძირითადად ისაა, რომ მზარდმა რეცესიის შიშებმა, რაც მოთხოვნას უქმნის საფრთხეს, გადაწონა მიწოდებასთან დაკავშირებული საკითხები. განსაკუთრებით კი, ჩინეთის, ევროპისა და შეერთებული შტატების სუსტი ეკონომიკური მონაცემების შემდეგ.
აშშ-ის West Texas Intermediate ნავთობის ფასი ახალ მინიმუმამდე შემცირდა და 44 ცენტით გაიაფების შემდეგ ფასმა ბარელზე $71.02 შეადგინა. Brent-ის ტიპის ნავთობის ფასი 5 ცენტით შემცირდა და $76.10-ს გაუტოლდა.
მიმდინარე კვირაში ძალაში შევიდა საზღვაო ტანკერებით რუსული ნავთობის იმპორტის აკრძალვა, რომელიც ევროკავშირის მიერ რუსეთის წინააღმდეგ სანქციების მე-6 პაკეტით არის გათვალისწინებული. ამასთან, ამოქმედდა ევროკავშირის, „დიდი შვიდეულისა“ და ავსტრალიის მიერ რუსულ ნავთობზე დადგენილ ფასის ზედა ზღვარი.
რუსეთი, რომელიც ნავთობის უმსხვილესი ექსპორტიორია, იმუქრება, რომ ამ ნაბიჯს უპასუხოდ არ დატოვებს და აცხადებს, რომ ახალი პირობებით ნავთობის გაყიდვაზე უარს იტყვის.
აღსანიშნავია ისიც, რომ რუსულ ნავთობზე ფასის ზღვრის დაწესების და ამაზე საპასუხოდ, ვლადიმერ პუტინის მიერ მიწოდების შემცირებასთან დაკავშირებით გაჟღერებული მუქარის მიუხედავად, ნავთობის გაიაფების ტენდენცია შენარჩუნდა. ამ ინფორმაციამ მხოლოდ დროებითი 1%-იანი გაძვირება გამოიწვია სესიის ადრეულ ვაჭრობაში.