მსოფლიოში ნავთობის ღირებულება ისევ მაღალ ნიშნულზეა და მისი შემცირება ვერაფრით ხერხდება, პირიქით, არსებული ვითარება და მოლოდინი ნავთობის მეტად გაძვირების რისკს აჩენს.
ნავთობის ექსპორტიორ ქვეყანათა ორგანიზაცია საერთაშორისო ბაზრისთვის ნედლი ნავთობის მიწოდებას მოსალოდნელზე მეტად ზრდის (ყოველდღიური მიწოდება 648 000 ბარელი), თუმცა ბაზარზე ფასი მაინც არ მცირდება. პირიქით, საერთაშორისო ბირჟებზე „ბრენტის“ ფასი ამჟამად 123-დოლარიან ნიშნულზეა, რაც გასული ორი თვის უმაღლესი მაჩვენებელია.
არსებულ ვითარებაზე მეტად უფრო დრამატულია მომავლის მოლოდინი. არაბთა გაერთიანებული საემიროების ენერგეტიკის მინისტრის, სუჰაილ ალ მაზროუს განცხადებით, საერთაშორისო ბაზარზე ნავთობის ფასები ჯერ ახლოსაც არ არის მაქსიმალურ ნიშნულთან და, ჩინეთში ეკონომიკური აქტივობის აღდგენის ფონზე, მოსალოდნელია, მისი ღირებულება „არნახული“ ტემპით გაიზარდოს.
„ამჟამინდელი მოთხოვნის გათვალისწინებით, ფასების მაქსიმალურ ნიშნულთან ახლოსაც არ ვართ, რადგან ჩინეთი ჯერაც არ დაბრუნებულა“, - განაცხადა ალ მაზროუმ და დასძინა, რომ ოპეკის მიერ რუსეთის სრულად ჩანაცვლება ამ ეტაპზე შეუძლებელია, რადგან, საუდის არაბეთისა და საემიროების გარდა, დამატებითი საწარმოო შესაძლებლობები არც ერთ ქვეყანას არ აქვს, მის გასაზრდელად კი სპეციალური ინფრასტრუქტურის მოწყობა, მსხვილი ინვესტიციები და, რაც მთავარია, გარკვეული პერიოდია საჭირო.
ინვესტიციების განხორციელების აუცილებლობა ნავთობის ექსპორტიორ ქვეყანათა ორგანიზაციის შეხვედრებზე არაერთხელ გახდა განხილვის მთავარი საგანი. ორგანიზაციის წარმომადგენლების განმარტებით, ნედლი ნავთობის მოსაპოვებლად მხოლოდ ბუნებრივი რეზერვები არ არის საკმარისი და ამისათვის აუცილებელია ძვირად ღირებული ჭაბურღილებისა და გადამამუშავებელი ობიექტების მოწყობა, რისი საშუალებაც, ევროკავშირის დახმარების გარეშე, ოპეკის წევრ სახელმწიფოებს არ აქვთ.
ივლისსა და აგვისტოში ნავთობის ყოველდღიური წარმოება 648 000 ბარელით გაიზრდება, რაც თითქმის 200 000 ბარელით აღემატება პროგნოზირებულ მაჩვენებელს.
მიუხედავად ამისა, ნავთობიმპორტიორთა კავშირის თავმჯდომარე ვანო მთვრალაშვილი აცხადებს, რომ აღნიშნული არის უმნიშვნელო მატება, რაც რეალურად ვერ აკმაყოფილებს გაზრდილ მოთხოვნილებებს.
„ვითარების მთელი სიმძიმე და სირთულე განპირობებულია იქიდან, რომ, ფაქტობრივად, რუსეთის ფედერაცია, ქვეყანა, რომელიც მსოფლიოში რიგით მეორე ნავთობის ექსპორტიორია, მიმდინარე ეტაპზე, ევროკავშირის მხრიდან საკმაოდ მნიშვნელოვანი სანქციების ქვეშ მოექცა.
რუსეთი ომის დაწყებიდან საკმაოდ მნიშვნელოვანი წნეხის ქვეშ არის მოქცეული მსოფლიო თანამაგობრობის მხრიდან. ბევრმა ქვეყანამ, მათ შორის ამერიკამ, უარი თქვა მათი ნავთობის იმპორტზე, ასევე დიდი ბრიტანეთი წლის ბოლომდე შეზღუდავს და საერთოდ გაანულებს რუსეთიდან ნავთობის ექსპორტს. სანქციებს აქვს ცალკეული სახეც, ძალიან ბევრი კომპანია უარს აცხადებს რუსეთთან ვაჭრობაზე და ეს ფაქტორიც უარყოფით გავლენას ახდენს უშუალოდ მსოფლიო ბაზრებზე ნავთობის მიწოდებასთან დაკავშირებულ ვითარებაზე.
მსოფლიოში მოთხოვნა-მიწოდებას შორის საკმაო დისბალანსია. „ოპეკი პლუსმა“ წარმოება გაზარდა, მაგრამ ეს არის უმნიშვნელო ზრდა, ანუ რეალურად ვერ აკმაყოფილებს გაზრდილ მოთხოვნილებებს. საგულისხმოა, რომ ჩინეთში ელოდებიან ეკონომიკის ზრდას და ეს ნიშნავს იმას, რომ ნავთობზე მოთხოვნა გაიზრდება. იგი არის მსოფლიოში ნომერი მეორე ეკონომიკის მქონე ქვეყანა და ასევე, ნავთობის მეორე მომხმარებელი”, - აცხადებს ვანო მთვრალაშვილი.