რუსთავში ნავთობპროდუქტების გადამამუშავებელი საწარმო „რუსთავოილი“ 2023 წლიდან „სერპენსის“ სახელით ოპერირებს. ქარხანა აწარმოებს უმაღლესი ხარისხის, ევროსტანდარტის შესაბამის ბიტუმს, რაც მნიშვნელოვანია ხარისხიანი გზების მოწყობისა  და საგზაო ინფრასტრუქტურისთვის. ამასთან, ის სხვადასხვა რეგიონის კლიმატურ პირობებს აკმაყოფილებს. „სერპენსის“ საწარმოში 70 ადამიანია დასაქმებული.

განახლებული ქარხნის პრეზენტაციას „სერპენსის“ პარტნიორი კომპანიები, ეკონომიკისა და მდგრადი განვითარების მინისტრი ლევან დავითაშვილი და რუსთავის მერი ნინო ლაცაბიძე ესწრებოდნენ.

„ჩვენ შეიძლება ყველა ნედლეული არ გვქონდეს, არც ნავთობის დიდი რესურსები გაგვაჩნია, თუმცა, გეგმები გვაქვს, რომ უფრო მეტი გვქონდეს. მაგრამ ჩვენ „შუა დერეფნის ერთ-ერთი მნიშვნელოვანი ნაწილი ვართ, საქართველოში შეიძლება ნედლეულის გამჭრიახად შემოტანა და გადამუშავება, მაღალტექნოლოგიური პროცესების საქართველოში წარმოება და ზოგადად, დამატებითი ღირებულების აქ შექმნა და ჩვენს ეკონომიკაში წვლილის შეტანა. ეს საწარმო კი სრულ  თანხვედრაშია ჩვენს ეკონომიკურ გეგმებთან და მიზნებთან, - აღნიშნა ეკონომიკის მინისტრმა.

რებრენდინგის შემდეგ საწარმო საცავების საერთო მოცულობას 20 000 ტონამდე ზრდის, რის შედეგადაც ქარხანა უმაღლესი ხარისხის პროდუქტის უწყვეტ მიწოდებას უზრუნველყოფს. იზრდება სარკინიგზო ინფრასტრუქტურის სიმძლავრეებიც და, რვის ნაცვლად, 32 ვაგონ-ცისტერნის ერთდროულად მიღება, დაცლა და დატვირთა იქნება შესაძლებელი.