ეკონომისტი აკაკი ცომაია მიიჩნევს, რომ გარე ფაქტორების გამორიცხვით, ინფლაციის შესამცირებლად სებ-თან ტანდემში ფისკალური სფეროც უნდა იყოს ჩართული. მისი აზრით, ინფლაციის დასარეგულირებლად ნავთობპროდუქტებზე აქციზის გადასახადის დროებითი შემცირებაც უნდა დაიგეგმოს.

„და მთავრობაც უნდა ზრუნავდეს ამ მიმართულებით. რაც გულისხმობს პირველ რიგში ტრანსფერების და სოციალური პროგრამების ზომიერ ხარჯვას და შესაბამისად ხარჯების ზრდისგან თავის შეკავებას. ასევე ინფლაციაზე მოახდენდა უარყოფით გავლენას, ჩემი აზრით, ნავთობპროდუქტებზე აქციზის გადასახადის თუნდაც დროებით შემცირება. იმიტომ რომ ტრანსპორტირება და ლოგისტიკა არის ის ერთ-ერთი საკვანძო კომპონენტი რომელიც გავლენას ახდენს ყველა სხვა დანარჩენი საქონლისა და მომსახურების ფასებზე. სატრანსპორტო ლოგისტიკა კი მთელს მსოფლიოში საკმაოდ გაძვირებულია, მათ შორის საქართველოში“, - აცხადებს აკაკი ცომაია.

როგორც ეკონომისტმა BM TV-ს ეთერში სტუმრობისას განაცხადა, აქვს მოლოდინები, რომ ინფლაცია ზრდას შეაჩერებს.

„ამ ეტაპზე ვერ ვიტყვი, რომ ინფლაცია მიდის შემცირებისკენ. თუმცა მეც მაქვს მოლოდინი, რომ მოვიდა ის დრო, რომ ზრდის ტემპმა უნდა დაიწყოს შემცირება. ამ აზრს მიმყარებს ის გარემოება, რომ საგარეო მოთხოვნის ზრდა აღარ შეინიშნება საქართველოში, ისე როგორც ეს იყო თვეების წინ. მსოფლიოს სასაქონლო ბაზარზეც აღარ არის ისეთი ფასების მატება, როგორც ეს რამდენიმე თვის უკან იყო. აქედან გამომდინარე გამკაცრებული მონეტარული პოლიტიკის პირობებში, ვფიქრობ, რომ დაკრედიტების ოდენობა დაიწყებს კლებას. ინფლაციის ზრდაც უნდა შემცირდეს“, განმარტავს ეკონომისტი.

ცომაიას თქმით, ლარის კურსი ცხადია ხელს უწყობს იმას, რომ ფასების დონე არ გაიქცეს ზევით, მით უმეტეს, რომ მოსალოდნელია საგარეო მოთხოვნის ზრდის შემცირდება.

„თუმცა რთული საპროგნოზოა, თუ როგორი იქნება ლარის კურსი მომავალში. როდესაც საქმე ეხება ინფლაციას აქ მაინც უნდა გამოვიდეთ მოთხოვნა-მიწოდების ფაქტორებიდან გამომდინარე. შესაბამისად თუ მოთხოვნის ზრდის შენელება ცხადია, რომ ეს რაღაც პერიოდში ფასების დონეზეც აისახება“, განაცხადა ცომაიამ.

აღსანიშნავია, რომ 2022 წლის ოქტომბერში წინა თვესთან შედარებით ინფლაციის დონემ საქართველოში 0.5 პროცენტი, ხოლო წლიური ინფლაციის დონემ 10.6 პროცენტი შეადგინა. რაც შეეხება საბაზო ინფლაციას , აღნიშნულმა მაჩვენებელმა 2022 წლის ოქტომბერში, გასული წლის შესაბამის პერიოდთან შედარებით 7.3 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი ასევე 7.3 პროცენტით განისაზღვრა.
სებ-ის პრეზიდენტი კი ამბობს, რომ საქართველოში ინფლაცია კლებას 2023 წლის თებერვლიდან არის მოსალოდნელი.

როგორც კობა გვენეტაძემ „ბიზნეს ფორმულას“ განუცხადა, მოლოდინია, რომ იანვრის ჩათვლით ინფლაცია არსებულ დონეზე, ანუ ორნიშნა შენარჩუნდება.

„კლება თებერვლიდან უნდა იყოს. ამის წინაპირობები და განმაპირობებელი ფაქტორები არის ის, რომ მონეტარული პოლიტიკა გამკაცრებული ნარჩუნდება, ამავე დროს, მივიღეთ მაკროპრუდენციული ზომები.

ვხედავთ, რომ მსოფლიო სასაქონლო ბაზრებზე ინდექსების კლებაა და ეს აუცილებლად უნდა აისახოს საქართველოში. პარალელურად, მყარია ლარის გაცვლითი კურსი, რომელსაც თავისი პირობები აქვს. მოგეხსენებათ, ტურიზმის აღდგენა საკმაოდ სწრაფად მოხდა, ამავე დროს, მიგრანტების შემოსვლამაც გავლენა იქონია. ვფიქრობ, ეს გარემოებები განაპირობებს იმას, რომ სხვა თანაბარ პირობებში, თებერვლიდან დაიწყება ინფლაციის შესამჩნევი შემცირება და მიზნობრივ მაჩვენებელთან დაახლოება წლის მეორე ნახევარში უნდა მოხდეს“, - განაცხადა კობა გვენეტაძემ.

ინფლაციაზე ხელფასების ნომინალური ზრდის გავლენასთან დაკავშირებით, სებ-ის პრეზიდენტმა აღნიშნა, რომ ინფლაციაზე მოქმედი ფაქტორების გაანალიზებისას, ყურადღება ექცევა ხელფასებთან დაკავშირებით არსებულ ინფორმაციასაც.

„როდესაც ვაანალიზებთ ინფლაციაზე მოქმედ ფაქტორებს, რა თქმა უნდა, ყურადღებას ვაქცევთ და ჩვენ ანალიზში ვრთავთ ხელმისაწვდომ ინფორმაციას ხელფასებთან დაკავშირებითაც, რადგან, გარკვეულწილად ესეც მოთხოვნის ნაწილია. ამის გათვალისწინება მნიშვნელოვანია, ვინაიდან, თუ ინფლაცია მოლოდინებში გადაიზარდა, ნიშნავს, რომ შეიძლება შექმნას ინფლაციის და ხელფასების გაზრდის სპირალი, რაც რა თქმა უნდა, კარგი არ იქნება“, - აღნიშნა ეროვნული ბანკის პრეზიდენტმა.