„ქართულმა ოცნებამ“ კუდიანებზე ნადირობის ახალი სეზონი გახსნა. მთავარ კუდიანად გამოცხადებული გყავთ სალომე ზურაბიშვილი“, - ამის შესახებ „ნაციონალური მოძრაობის წევრმა რომან გოცირიძემ პარლამენტის საგაზაფხულო სესიის პლენარული სხდომაზე განაცხადა. დეპუტატის თქმით, „ქართული ოცნების“ პოლიტსაბჭოს განცხადება რუსეთის ხელისუფლებას მიმართ მოხდილი ბოდიში იყო:
„ქართულმა ოცნებამ“ კუდიანებზე ნადირობის ახალი სეზონი გახსნა - მთავარ კუდიანად გამოცხადებული სალომე ზურაბიშვილი გყავთ, ხოლო პატარ-პატარა კუდიანები არიან ოპოზიციის წარმომადგენლები, რომლებმაც თურმე ქვეყანაში შაქრის დეფიციტი შექმნეს და ეკონომიკურ საბოტაჟს ეწევიან. არა გრცხვენიათ? რა განცხადება გააკეთეთ? ვინ არის თქვენი განცხადების ადრესატი, საქართველოს მოსახლეობა? თქვენ დღეს მიმართეთ რუსეთის ხელისუფლებას, უთხარით, რომ სალომე ზურაბიშვილი, რომელიც ევროპაში წავიდა და განცხადებებს აკეთებდა, არ წარმოადგენს საქართველოს ხელისუფლებას. უთხარით, რომ ის გაიპარა, რომ ბლოკავდა საქართველოს მთავრობა, ფული და თვითმფრინავის არ მისცეს, საკუთარი ხელფასით აიღო ბილეთი და მისი განცხადებები არის მოქალაქის პოზიცია. რუსეთ უთხარით ბოდიში და სთხოვეთ პატიება, რომ მან უკრაინის მხარდასაჭერი განცხადებები გააკეთა. ეს არის თქვენი განცხადების შინაარსი. რა თქმა უნდა პოლიტსაბჭო რომ ფიქციაა და იქ გადაწყვეტილებას არავინ იღებს, ძალიან კარგად ვიცით, ეს არის პირდაპირ ივანიშვილის დავალება, რომ ესე გესაუბრათ და ასეთი ანტისახელმწიფოებრივი განცხადებები გაგეკეთებინათ“, - განაცხადა რომან გოცირიძემ.
რომან გოცირიძემ პარლამენტში გაუფასურებულ ლარზე და პროდუქტებზე შექმნილ დეფიციტზე გაამახვილა ყურადღება. „ნაციონალური მოძრაობის დეპუტატი ამბობს, რომ ნდობა დაკარგული ხელისუფლება ხალხს აღატაკებს.
„რაც შეეხება ჩემს მთავარ სათქმელს - შემთხვევით არ ვახსენე შაქარი, თქვენი ხელისუფლების გაკოტრებული პოლიტიკის სიმბოლოა ის, რომ არ გაქვთ ნდობა და როდესაც ნდობა არ გაქვთ, მაშინ შაქარი მომენტალურად გაქრება დახლებიდან რამდენიც არ უნდა იძახოთ, რომ რეზერვები გაქვთ და სურსათს ახლა შემოიტანენ. მეორე მაჩვენებელი, რომ ნდობა არ გაქვთ და ჩვენს მოქალაქეებს ხელისუფლება ქვეყნის ინტერესების დამცველად არ მიაჩნია ეს არის ლარი. ერთი თვის განმავლობაში რა უყავით ლარს? ეროვნული ვალუტა 9 თებერვალს იყო 2,9 ზუსტად ერთი თვის შემდეგ, 9 მარტს გახდა 3,4 - 16 პროცენტით, 50 თეთრით გაუფასურდა. ამ ერთი თვის გამავლობაში გაუფასურებას მოსდევდა გამყარება, გამყარებას გაუფასურება, პანიკაში ჩააგდეთ ადამიანები, დარბოდნენ და სიმწრით ნაშოვნ ლარებს ახურდავებდნენ, შედეგად როგორ კომპანიებმა ასევე მოქალაქეებმა ამ ერთი თვის განმავლობაში უზარმაზარი ზარალი განიცადეს. ისიც კი არ მოაფიქრდა ეროვნულ ბანკს, რომ ომის დაწყებისთანავე საჭირო იყო დამამშვიდებელი ინტერვენციის გაკეთება.
კონსტიტუციით და რეგლამენტით გათვალისწინებული უფლებით მივმართე ეროვნულ ბანკს და მოვითხოვე ინფორმაცია ამ ორი თვის განმავლობაში როდის აკეთებდნენ ფარულ ინტერვენციას, რისი უფლებაც მათ აქვთ. პატარ-პატარა ინტერვენციები დღიური კურსის მერყეობა შეიძლება მართო. მათ ასეთი ინტერვენციები გააკეთეს, მაგრამ სეთი ინფორმაციას ერთი თვის დაგვიანებით აქვეყნებენ, მაგრამ თვის ჭრილში და არა დღეების მიხედვით. დღეების მიხედვით ინფორმაცია იძლევა იმის საფუძველს გავიგოთ იქცეოდნენ თუ არა პროფესიონალურად, ამავე დროს, ხომ არ იყო რაიმე სახის მანიპულაციები, რომელიც ხელს უწყობს კურსის რყევას ბაზარზე და შეგნებულად თუ შეუგნებლად ვიღაცების მიერ ჯიბის მოთბობას - პასუხი არ მივიღე. ახლა მივმართავ ეროვნულ ბანკს რაც მომაწოდეთ ესაა ღია ინფორმაცია. ისევ გწერთ წერილს მომაწოდეთ ყოველდღიური ინფორმაცია რა ინტერვენციები განახორციელეთ. ნდობა დაკარგული ხელისუფლება ხალხს აღატაკებს “, - აცხადებს რომან გოცირიძე.
კომერსანტი