რადიო „კომერსანტის“ ეთერში, ლევან კობერიძის საავტორო გადაცემაში „ბრენდი საქართველო“, ჯანდაცვის პოლიტიკის სპეციალისტმა ანდრია ურუშაძემ სამედიცინო სექტორში დაფინანსების DRG მოდელზეც ისაუბრა. მისი თქმით, აუცილებელია ვისაუბროთ DRG-ის პოზიტიურ მოლოდინებსა და ნაკლზეც. ნებისმიერი მეთოდის შემოღება არ ნიშნავს იმას, რომ ნაკლები გადავუხადოთ კლინიკას. რადგან გვინდა, რომ უკეთესი ხელფასები ჰქონდეთ ექიმებს, უკეთესი ხარისხის მედიკამენტები და სახარჯი მასალა გამოიყენონ.
„რა არის DRG? როცა გასაშუალოებული ფასის გადახდა ხდება, დიაგნოზების ჯგუფებზე, რომელიც რესურსის მიხედვით დაახლოებით თანაბარია, ამის შემდეგ მოტივაცია უჩნდება კლინიკას, რომ მაქსიმალურად ყაირათიანად და ეფექტიანად გამოიყენოს ეს რესურსები და მაქსიმალურად ჩაეტიოს ამ ჩარჩოში და მოტივაცია არ ჰქონდეს ხარჯების გაბერვის და არასწორი დოკუმენტაციის წარმოდგენის. ეს არის ის პოზიტიური, რასაც უნდა ველოდებოდეთ DRG-სგან“, - აცხადებს ანდრია ურუშაძე.
მისი თქმით, კლინიკური სტანდარტების დანერგვა, რომელიც მინიმალურ და აუცილებელ სერვისების ჩამონათვალს გულისხმობს, თანმხლები უნდა იყოს ასეთი ტიპის ცვლილებების.
„როცა თქვენ საშუალო ფასს აძლევთ, სხვა მოტივაციაც უჩნდება კლინიკას და პირველი მოტივაციაა შეამციროს საჭირო სერვისების რაოდენობა, რომელიც კონკრეტულ პაციენტს სჭირდება. როცა ჩვენ ვსაუბრობთ ერთ კომპონენტზე, განყენებულად, მაგალითად DRG -ზე, აუცილებელია უნდა ვთქვათ ის რისკები, რომლებიც მოჰყვება DRG-ის დანერგვას, წინასწარ იყოს გათვლილი. მაგალითად, კლინიკური სტანდარტების დანერგვა, რომელიც მინიმალურ და აუცილებელ სერვისების ჩამონათვალს გულისხმობს, თანმხლები უნდა იყოს ასეთი ტიპის ცვლილებების. ერთის მხრივ, კი ბატონო, დავიცვათ ბიუჯეტი ხარჯების გაზრდისგან, გავამარტივოთ ანაზღაურება. მაგრამ ფასი უნდა იყოს სამართლიანი და ნებისმიერი მეთოდის შემოღება არ ნიშნავს იმას, რომ ნაკლები გადავუხადოთ კლინიკას - ინფლაციის გათვალისწინებით, იმის გამო, რომ გვინდა უკეთესი ხელფასები ჰქონდეთ ექიმებს, უკეთესი ხარისხის მედიკამენტები და სახარჯი მასალა იყიდონ, გვინდა რომ სანიტარული ნორმები იყოს დაცული, მიმდინარე რემონტი ჩაატაროს, ინვესტიცია გააკეთოს პერსონალის პროფესიულ განვითარებაში“, - განაცხადა ანდრია ურუშაძემ.
როგორც ანდრია ურუშაძემ განაცხადა, მისთვის გაუგებარია რატომ აქვს პაციენტს შეზღუდული არჩევანის უფლება და რატომ ეთიშება საყოველთაო ჯანდაცვის პროგრამას, თუნდაც განსხვავებული ენდოპროტეზის მოთხოვნისას.
„თუ არსებობს პაციენტის სურვილი, რომ უკეთესი ხარისხის ენდოპროტეზი გამოიყენოს, არა ის, რომელზეც სახელმწიფომ უთხრა, რომ ეს უკეთესია, მაშინ ის მთლიანად ვარდება საყოველთაო ჯანდაცვის პროგრამიდან. ეს არ მესმის. ამას გარდა, არ მგონია რომ ფინანსური წლის შუა პერიოდში სწორი იყოს ასეთი ცვლილებების დანერგვა,“ - განაცხადა ანდრია ურუშაძემ.