ნიდერლანდებში გაყინული რუსული აქტივების ღირებულებამ 200 მილიონ ევროს მიაღწია.

როგორც ადგილობრივი გამოცემა ცენტრალური ბანკის ხელმძღვანელის კლაას ნოტის განცხადებაზე დაყრდნობით წერს, საინვესტიციო და საპენსიო ფონდებში ექვსი მილიონი ევროს რუსული აქტივები იყო გაყინული, თუმცა მოგვიანებით ეს მაჩვენებლები მნიშვნელოვნად გაიზარდა.

„შემიძლია ვთქვა, რომ ამ ხნის განმავლობაში ჩვენ გავყინეთ ან დავაკავეთ 200 მილიონ ევროზე მეტი“,- განაცხადა კლაას ნოტმა.

მისივე თქმით, ნიდერლანდებში რუსეთთან კავშირების უმეტესობა სატრასტო კომპანიების მეშვეობით ხორციელდება, მაგრამ აქტივები არ მდებარეობს ნიდერლანდებში და შესაბამისად, ეს ამცირებს დასაბლოკი რუსული აქტივების რაოდენობას.

შეგახსენებთ,  უკრაინის წინააღმდეგ ომის გამო იაპონიამ, ავსტრალიამ და ახალმა ზელანდიამ რუსეთს ახალი სანქციები დაუწესეს. 

იაპონია

იაპონია სანქციებს დაუწესებს 15 ფიზიკურ და 9 იურიდიულ პირს, მათ შორის თავდაცვის სექტორის წარმომადგენლებს და შეიარაღების სახელმწიფო ექსპორტიორ როსობორონექსპორტს. 

სანქციები ითვალისწინებს აქტივების გაყინვას. ის ეხება რუსეთის საგარეო საქმეთა სამინისტროს ოფიციალური წარმომადგენელ მარია ზახაროვას, ოლიგარქ სულეიმან ქერიმოვს, რუსეთის ფედერაციის თავდაცვის მინისტრის რვა მოადგილეს.

მთლიანობაში, უკრაინაში რუსეთის შეჭრის შემდეგ, იაპონიამ სანქციები დააწესა 76 ფიზიკური პირის, 7 ბანკისა და 12 სხვა ორგანიზაციის წინააღმდეგ. 

ახალი ზელანდია

ქვეყნის საგარეო საქმეთა სამინისტროს ცნობით, ახალმა ზელანდიამ სანქციები 13 ფიზიკურ პირს დაუწესა. მათ შორისაა პრეზიდენტი ვლადიმერ პუტინი და რუსეთის უშიშროების საბჭოს 12 წევრი, 1 ბანკი და 18 სხვა ორგანიზაცია. 

სანქციები გულისხმობს მათთან თანამშრომლობის აკრძალვას, აქტივების გაყინვას და გემებისა და თვითმფრინავების ქვეყანაში შესვლის აკრძალვას. გარდა ამისა, ახალმა ზელანდიამ აკრძალა კიდევ 364 პოლიტიკოსისა და სამხედრო მოსამსახურის ქვეყანაში შესვლა. 

ავსტრალია

ავსტრალია სანქციებს აწესებს 11 რუსული ბანკისა და სამთავრობო უწყებების წინააღმდეგ, რომლებიც ემსახურებიან რუსეთის სუვერენულ ვალს. 

ისინი ერთად შეადგენენ რუსეთის ფედერაციის ყველა საბანკო აქტივების დაახლოებით 80%-ს და მოიცავს Sberbank-ს, Gazprombank-ს, VEB-ს, VTB-ის, Rosselkhozbank-ს, Sovcombank-ს, Novikombank-ს, Alfa-Bank-სა და Credit Bank-ს. 

ავსტრალიამ ასევე გააძლიერა სანქციების ზეწოლა ვლადიმირ პუტინთან დაახლოებულ ოლიგარქებზე. 

“გარდა 41 ოლიგარქისა და ოჯახის უახლოესი წევრებისა, ჩვენ უკვე დავაწესეთ მიზანმიმართული ფინანსური სანქციები და სამოგზაურო აკრძალვები, ავსტრალიამ ახლა დაამატა ორი მილიარდერი, რომლებიც დაკავშირებულია ავსტრალიის ბიზნეს ინტერესებთან - ოლეგ დერიპასკა და ვიქტორ ვექსელბერგი”,- ნათქვამია საგარეო საქმეთა სამინისტროს განცხადებაში.

წყარო: businessformula.ge