რადიო „კომერსანტის“ ეთერში ენერგეტიკის განვითარების ფონდის დირექტორის მოადგილე ანი ჯანუყაშვილმა განაცხადა, რომ ტრადიციული და ალტერნატიული ენერგეტიკული პროექტების წასახალისებლად გასულ კვირას მთავრობამ კიდევ უფრო მოქნილი და საინტერესო წახალისების სქემა შემოგვთავაზა.

„ეს სქემა, ელექტროსადგურის ოპერირებიდან 15 წლის განმავლობაში, კონკრეტულ მხარდაჭერას გულისხმობს. ეს მხარდაჭერაა - ბაზარზე დაფიქსირებულ წონასწორობის ფასსა და შემოთავაზებულ ტარიფს შორის სხვაობის ანაზღაურება, რაც რეალური ინვესტორებისთვის საინტერესო და მიმზიდველი იქნება,“ — განაცხადა ანი ჯანუყაშილმა.

მისი თქმით, ენერგეტიკის განვითარების ფონდ პირველ მსხვილმასშტაბიან მზის ელექტროსადგურზე მუშაობს. საქართველოს ენერგეტიკის განვითარების ფონდსა და Abu Dhabi Future Energy Company pjsc – Masdar-ს შორის, გასული წლის ბოლოს, ხელი მოეწერა შეთანხმებას საქართველოში 100 მგვტ-მდე დადგმული სიმძლავრის მზის ელექტროსადგურის პროექტის ერთობლივი განვითარების შესახებ.

აღსანიშნავია, რომ კომპანია Masdar-ი არაბთა გაერთიანებული საამიროების უმსხვილესი საინვესტიციო ჰოლდინგ „მუბადალას“ ერთ-ერთი წამყვანი კომპანიაა.

ენერგეტიკის განვითარების ფონდის დირექტორის მოადგილის თქმით, წინასამშენებლო ფაზაშია 50-მგვტ-იანია ქარის ელექტროსადგურის მშენებლობის პროექტიც სოფელ ნიგოზაში, რომელსაც ქართული მხარე თურქულ კომპანია „ჩალიკ ენერჯისთან“ ერთად ახორციელებს.

როგორც ანი ჯანუყაშვილი ამბობს, თუნდაც ამ ახალი წახალისების სქემების არსებობით, ბევრად უფრო გააქტიურდება ეს მიმართულება და გვექნება არა ერთი, არამედ მრავალი ქარის ელექტროსადგური.

ნიგოზას ქარის ელექტროსადგური შიდა ქართლში ნადარბაზევის ტბის მიმდებარედ უნდა აშენდეს. მისი დადგმული სიმძლავრე - 50 მგვტ-ი, ხოლო საშუალო წლიური გამომუშავება 195 მლნ. კილოვატი საათი იქნება. პროექტის განხორციელება დაახლოებით 70 მლნ აშშ დოლარი დაჯდება.

როგორც ანი ჯანუყაშვილი ამბობს, კონკრეტული თარიღები, როდის დაიწყება ელექტროსადგურების მშენებლობა და როდის დასრულდება, ჯერ-ჯერობით უცნობია.

მოამზადა მაკა ბიბილაშვილმა