პანდემიის მართვის მეთოდები იყო არათანმიმდევრული და ხშირ შემთხვევაში პოპულისტური, ასეთი მიდგომებით ვთვლით, რომ სახელმწიფომ დაარღვია მოქალაქეების სიცოცხლისა და ჯანმრთელობის დაცვის ვალდებულება, - ამის შესახებ სახალხო დამცველმა ნინო ლომჯარიამ ჟურნალისტებთან საუბრისას განაცხადა.
სახალხო დამცველის განმარტებით, ხელისუფლების გადაწყვეტილებები ეპიდემიოლოგიური ვითარებიდან გამომდინარე არ მიიღება და ხდება პოლიტიკური გარემოებების, ან მიზანშენოწილებების გათვალისწინება.
მისივე თქმით, ხელისუფლების მხრიდან მიღებულ გადაწყვეტილებებზე მათ შორის უვადო პასპორტებთან დაკავშირებით, პასუხის პოვნა საერთაშორისო პრაქტიკაშიც შეუძლებელია.
“ჩვენი აზრით, გარკვეული კატეგორიის პირები შესაძლებელია დაექვემდებარონ სავალდებულო ვაქცინაციას და ეს პრაქტიკა არ ითვლება დისკრიმინაციულად. ჩვენი რეკომენდაცია იყო, რომ შექმნილი მწვავე ეპიდემიოლოგიური ვითარებიდან გამომდინარე, ხელისუფლებას მეტი მოთხოვნა დაეყენებინა გარკვეული კატეგორიის პირების სავალდებულო ვაქცინაციისაკენ. თუმცა, ხელისუფლებამ ცოტა ხნის წინ გადადგა მსგავსი ნაბიჯები და დაიწყო რეგულაციების გამკაცრება. ხელისუფლების გადაწყვეტილებები მიიღება არა ეპიდემიოლოგიური ვითარებიდან გამომდინარე, რითიც შესაძლოა ავიცილოთ უფრო მეტი მსხვერპლი, არამედ ხდება პოლიტიკური გარემოებების და მიზანშეწონილობის გათვალისწინება. ასევე, იყო გარკვეული გადაწყვეტილებები, რომლებზე პასუხის პოვნა საერთაშორისო პრაქტიკაშიც შეუძლებელია, მაგალითად მუდმივი მწვანე პასპორტი რა პრაქტიკას ეფუძნება, ჩვენთვის უცნობია. პანდემიის მართვის ასეთი მეთოდები იყო არათანმინდევრული და ხშირ შემთხვევაში პოპულისტური, ასეთი მიდგომებით ვთვლით, რომ სახელმწიფომ დაარღვია მოქალაქეების სიცოცხლისა და ჯანმრთელობის დაცვის ვალდებულება”, - აღნიშნა ნინო ლომჯარიამ.
ipn.ge
ნინო ლომჯარია 
