იაპონურმა ავტომობილების ბრენდმა Infiniti-მ, რომელიც Nissan-ის კონცერნს ეკუთვნის, რუსეთის ბაზრიდან გასვლის შესახებ განაცხადა. 

„ჩვენ გავაგრძელებთ სერვისის მხარდაჭერას ჩვენი ავტომობილების ყველა მფლობელისთვის გარანტიის პირობების მიხედვით“, აღნიშნავენ კომპანიაში.

თავის დროზე, რუსეთი Infiniti-სთვის პირველი ევროპული ბაზარი გახდა. ბრენდი ქვეყანაში 2006 წლიდანაა წარმოდგენილი. წლის დაწყებამდე რუსეთის ბაზარზე QX50, QX55 და QX80 მოდელების SUV სეგმენტის მანქანები აქტიურად შედიოდა.

ბრენდს რუსეთში ადგილობრივი წარმოება არ ჰქონია. 2012-2014 წლებში სანქტ-პეტერბურგში Nissan-ის ქარხანაში განხორციელდა QX70, QX80 კროსოვერების და M სედანის SKD აწყობა. Infiniti-მ ავტომობილების მიწოდება რუსეთის ბაზარზე მარტის დასაწყისში, უკრაინაში საომარი მოქმედებების დაწყების შემდეგ, შეაჩერა.

ევროპული ბიზნესის ასოციაციის (AEB) მონაცემებით, Infiniti-ის გაყიდვები რუსეთში 2022 წლის 9 თვის განმავლობაში 46%-ით, 819 ერთეულამდე დაეცა. იმავდროულად, ბაზრის წილი ერთი წლის წინანდელი 0,2%-დან 0,1%-მდე შემცირდა.

იაპონურმა ავტოკონცერნმა Nissan-მა, რომელიც ბრენდ Infiniti-ს ფლობს მანამდე გადაწყვიტა, რომ თავისი რუსული წარმოების ადგილი სანკტ-პეტერბურგში (Nissan Manufacturing Rus LLC), სიმბოლური ღირებულებით, რუსეთის სახელმწიფო საწარმო NAMI-სთვის, 6 წლის განმავლობაში გამოსყიდვის პირობით, გადაეცა. ტრანზაქციის პერიმეტრი ასევე მოიცავდა კონცერნის საწარმოო და კვლევით ობიექტებს სანქტ-პეტერბურგში, გაყიდვებისა და მარკეტინგის ცენტრს მოსკოვში.

იაპონური კომპანიის ქარხანა სანქტ-პეტერბურგში 2009 წლის ივნისში გაიხსნა. ინვესტიციების მოცულობამ 200 მილიონი დოლარი შეადგინა. მის გაფართოებაში 167 მილიონი ევრო ჩაიდო. კომპანია აწარმოებდა X-Trail, Murano, Qashqai და Terrano მოდელებს. საწარმოს სიმძლავრე წელიწადში 100 ათასი ავტომობილია.