„ნიუ ჰოსპიტალის“ ოფთალმოლოგიის ეროვნულ ცენტრში წამყვანმა ოფთალმოლოგმა და ოფთალმოქირურგმა, თამარ ცირეკიძემ რქოვანას გადანერგვის ორი უნიკალური ოპერაცია ჩაატარა. როგორც „კომერსანტს“ თამარ ცირეკიძემ უთხრა, აღნიშნული ოპერაციები უახლესი ტექნოლოგიით – ფემტო ლაზერით კეთდება, ერთი ოპერაციის შემთხვევაში ხდება რქოვანას სრული, ხოლო მეორე ოპერაციის შემთხვევაში რქოვანას შრეობრივი გადანერგვა. მისვე თქმით, ორივე ოპერაციის ძირითადი მიზანი თვალის კაკლის და მხედველობის მაღალი ხარისხის შენარჩუნებაა.  

რქოვანას შრეობრივი გადანერგვა ფემტო ლაზერით საქართველოში პირველად ჩატარდა და ოფთალმოლოგიაში ყველაზე რთული და დახვეწილი ოპერაციაა. ორივე ოპერაციის ძირითადი მიზანია როგორც თვალის კაკლის შენარჩუნება, ისე მხედველობის მაქსიმალური ხარისხის მიღწევა. ორივე პაციენტმა კლინიკას კერატოკონუსის ჩივილებით მიმართა. ორივე მათგანი 15 წლის იყო.

„ორივე ოპერაცია ფემტო ლაზერით კეთდება, ერთის შემთხვევაში ხდება რქოვანას სრული სისქის გადანერგვა და გამჭოლი კერატოპლასტიკა ეწოდება, ხოლო მეორე ოპერაციის შემთხვევაში ხდება რქოვანას რამდენიმე შრის გადანერგვა და არა გამჭოლი კერატოპლასტიკა ეწოდება. ეს ძალიან დახვეწილი და რთული ოპერაციაა - რქოვანას გადანერგვა ხდება შრეობრივად და ისიც ლაზერით, რაც მნიშვნელოვნად ამცირებს იმის რისკს, რომ პაციენტის ორგანიზმმა არ მიიღოს დონორის რქოვანა, რაც პაციენტისთვის დიდი გამართლებაა.“ -  აღნიშნა თამარ ცირეკიძემ.

მისი თქმით, არის შემთხვევები, როდესაც პაციენტებში თვალი არა გამჭოლი კერატოპლასტიკის საშუალებას აღარ იძლევა და გამჭოლი გადანერგვის საჭიროების წინაშე ვდგებით. აღნიშნული ოპერაცია ლაზერით საქართველოში აქამდე რამდენიმეჯერ არის ჩატარებული.

გამომდინარე იქიდან რომ ოპერაციები ტარდება ლაზერით და არა მანუალურად - მოძველებული მეთოდით, ოპერაცია სრულდება ნაკერების ნაკლები რაოდენობით, რაც პოსტოპერაციულად დაბალ ასტიგმატიზმს იწვევს და ამის გამო პაციენტი იღებს მხედველობის მაღალ ხარისხს.

რაც შეეხება ლაზერს, ოფთალმოლოგიის ეროვნული ცენტრში კომპანია „ცაისის“ წარმოების ფემტო ლაზერი გამოიყენება, რომლიც მსოფლიო ლიდერია მაღალტექნოლოგიური ოფთალმოლოგიური აღჭურვილობის წარმოებაში. როგორც ცირეკიძე აღნიშნავს ოფთალმოლოგიაში ეს ახალი სიტყვაა.

„ლაზერის გარეშე ეს ოპერაციები შესაძლებელია გაკეთდეს მხოლოდ მანუალური მეთოდით, რაც პოსტოპერაციული პერიოდის შემდეგ მაღალი მხედველობით არ ხასიათდება. ლაზერით ამ ოპერაციების ჩატარება, საკმაოდ დიდი მიღწევა და წინ გადადგმული ნაბიჯია ოფთალმოლოგიაში.“ - აღნიშნა თამარ ცირეკიძემ.

ექიმის თქმით, წინასწარი შეთანხმებით, უმაღლესი ხარისხის რქოვანა საქართველოში აშშ–დან შემოდის.