არ შეიძლება განვითარებული ქვეყნის რეგულირება მოვარგოთ განვითარებად ქვეყანას, - ასე აფასებს ფასების რეგულირებასთან დაკავშირებით მთავრობის პოლიტიკას „ეკონომიკური ტრანსფორმაციის ცენტრის“ დამფუძნებელი ნოდარ სირბილაძე. როგორც ეკონომისტი აცხადებს საბაზრო ეკონომიკის პირობებში ასეთი ტიპის ინტერვენციები დაუშვებელია.
„ზოგადად საბაზრო ეკონომიკაზე როდესაც ვსაუბრობთ, იქ დაუშვებელია ასეთი ტიპის ინტერვენციები მთავრობის მხრიდან. განცხადებები რაც იყო, რომ თურმე რამხელა ფასნამატით ყიდის ბიზნესი ამა თუ იმ პროდუქციას, ეს ცოტა არ იყოს პოპულისტურად ჟღერს. გასაგებია რომ ფასნამატი არის მაღალი, მაგრამ ეს იმას არ ნიშნავს, რომ მოგებაც არის 70 ან 80%-ი. ამ ფასნამატში შედის მთელი რიგი ხარჯები, რაც ბიზნეს გააჩნია და სწორედ ამიტომ ვერ ვიღებთ დახლებზე არსებულ პროდუქციაზე დაბალ ფასებს.
ბიზნესი მუშაობს მოგებაზე ცხადია და ყველა ბიზნესი ასე უნდა მუშაობდეს, უბრალოდ ეს მოგების მაჩვენებელი არის დაბალი.
საბაზრო ეკონომიკაში არ შეიძლება მთავრობა ერეოდეს ასეთი ინტერვენციებით, ეს არის ძალიან საშიში რამ. რადგან საბაზრო ეკონომიკაში წონასწორობა მიიღწევა თავისუფლად, ერთის მხრივ მომხმარებლების, მეორეს მხრივ მიმწოდებლების ურთიერთქმედების შედეგად და ჩვენი ინტერვენცია რასაც ვახდენთ, ამან შესაძლოა ხელი შეუწყოს გარკვეულ პროდუქციაზე დეფიციტს და უხარისხო პროდუქციის შემოტანას. გასაგებია, რომ არის ფასნამატები მაღალი, მაგრამ აქ არის რთული ქსელი. რას ნიშნავს რთული ქსელი? ეს ნიშნავს იმას, რომ იმპორტირებული პროდუქცია, რომელიც შემოდის, ამაში იმპორტიორები და დისტრიბუტორები იხდიან თანხას და შემდეგ აწვდიან მარკეტებს. მარკეტებს თავისი მოთხოვნა აქვს, მათაც ხომ უნდა დარჩეს მოგება? საბოლოო ჯამში ხარჯები არის მაღალი. ქსელი რომ შეკრას, მაგალითად თურქეთიდან ჩამოტანილი პროდუქცია რომ დახლზე დაგვხვდეს და ვიყიდოთ, არის საკმაოდ რთული პროცესი, კომპლექსური და ხასიათდება დიდი ხარჯვითი ნაწილით. ის რომ ჩვენ ჩავერიოთ და ყველაფერი დავარეგულიროთ არ მიმაჩნია სწორად. მგონია, რომ ამას პირიქით, უკუშედეგები მოჰყვება“, - აცხადებს ნოდარ სირბილაძე.
„ეკონომიკური ტრანსფორმაციის ცენტრის დამფუძნებელი“ ამბობს, რომ საბაზრო ეკონომიკაში ჩარევა ყოველთვის უკუშედეგებს იღებს.
„გასაგებია, არგუმენტები, რომ თითქოს ევროდიექტივებს გადმოვიღებთ, მაგრამ ევროკავშირი სხვა სტრუქტურით და სხვა მიმართულებითაა, იქ სხვა ეკონომიკური კონდიციებია. ჩვენ განვითარებადი ეკონომიკა ვართ და ჩვენთან სხვა კონდიციებია ეკონომიკური და არ შეიძლება განვითარებული ქვეყნის ასეთი ტიპის რეგულირება მოვარგოთ განვითარებად ქვეყანას. ცოტა საშიში განაცხადია იმ კუთხით, რომ ჯერ იყო მედიკამენტებზე ახლა არის საწვავზე და სურსათზე. საბოლოო ჯამში ეს უარყოფითი სიგნალი შეიძლება იყოს პოტენციური ინვესტორებისთვის ვინც უყურებენ, რომ მთავრობის როლი ეკონომიკაში იზრდება.
როდესაც ეკონომიკაში მთავრობის როლი იზრდება, ეს აღარ არის საბაზრო ეკონომიკა, ეს არის უკვე შერეული ეკონომიკა. საბაზრო ეკონომიკის კურსი თუ გაქვს აღებული, მაშინ მაქსიმალურად უნდა შევზღუდოთ მთავრობის ინტერვენცია ეკონომიკაში. უბრალოდ, ჩვენ ვერ ჩამოვყალიბდით საბოლოო ჯამში რა გვინდა. თუ საბაზრო ეკონომიკა გვინდა მთავრობის როლი უნდა იყოს მინიმალიზებული, ერთადერთი როლი არის კერძო სექტორის დაცვა, რაც გულისხმობს, რომ საკუთრების უფლება უნდა იყოს დაცული, ბიზნესს თავისუფლად შეეძლოს ოპერირება და იყოს კონკურენტული გარემო. მაგრამ თუ ჩვენ საბაზრო ეკონომიკა არ გვინდა, მაშინ ესეც უნდა ვთქვათ. თუ შერეულ ეკონომიკას ვირჩევთ უნდა ველოდოთ, რომ ეკონომიკის ზრდის ტემპი ყოველთვის არასახარბიელო იქნება“, - აცხადებს ნოდარ სირბილაძე.