ლეგენდარული ქართველი მოჭადრაკის ნონა გაფრინდაშვილის ინტერესებს უმსხვილეს ამერიკულ მედიაკომპანია Netflix–ის წინააღმდეგ $5 მილიონიან სასამართლო პროცესზე იურიდიული ფირმა BLB ამერიკელ კოლეგებთან ერთად დაიცავს. „სარჩელი ეხება Netflix-ის მიერ სერიალ ლაზიერის გამბიტის (The Queen’s Gambit) კულმინაციურ ეპიზოდში მიზანმიმართულად გაჟღერებულ მცდარ ცნობებს, ნონა გაფრინდაშვილის ლეგენდარული კარიერული მიღწევების შესახებ.

ნონა გაფრინდაშვილის ადვოკატებმა ლოსანჯელესის სასამართლოში სარჩელი ხუთშაბათს, 16 სექტემბერს შეიტანეს. გამოცემა deadline.com–ის ცნობით, მსოფლიოში პირველი ქალი გროსმაისტერი Netflix–ისგან ზარალის ანაზღაურების სახით $5 მილიონს ითხოვს.

რადიო თავისუფლების ცნობით, სარჩელში წერია, რომ 1968 წლისთვის, რომელიც აღწერილია ლაზიერის გამბიტის ეპიზოდში, გაფრინდაშვილს უკვე ჰქონდა ნათამაშები სულ მცირე 59 კაც მოჭადრაკესთან, და მათ შორის 10 დიდოსტატთან. Netflix-მა თავხედურად და განზრახ იცრუა გაფრინდაშვილის მიღწევების შესახებ, იაფფასიანი და ცინიკური მიზნით, რათა ხაზი გაესვა დრამისთვის, რომ თითქოს გამოგონილმა გმირმა მიაღწია იმას, რაც არცერთ ქალს მიუღწევია იქამდე, გაფრინდაშვილის ჩათვლით.

სარჩელში მოყვანილია რამდენიმე პუბლიკაცია და ასევე სოციალურ ქსელებში გავრცელებული პოსტები, სადაც ფილმის გამოსვლისთანავე მიუთითეს შეცდომაზე; მათ შორის, მოჭადრაკის, ჟურნალისტისა და ჭადრაკის ისტორიკოსის, ოლიმპიუ ურკანის ტვიტიც, სადაცე ეწერა, რომ მაშინ, როდესაც გაფრინდაშვილის მსგავსი პერსონაჟი ფილმში აღტაცებით შეჰყურებს გამოგონილ გმირს, რეალურ ცხოვრებაში გაფრინდაშვილმა მრავალი შთააგონა 1960 -იანი წლების მამაკაცთა ტურნირებზე თამაშით.

სარჩელში დამატებით შეურაცხყოფადაა მიჩნეული Netflix-ის მიერ გაფრინდაშვილის, როგორც რუსი მოჭადრაკის წარმოჩენა, მიუხედავად იმისა, რომ ცნობილია, რომ ის არის საქართველოდან, ქვეყნიდან რომელიც დღემდე იბრძვის, რომ გაუმკლავდეს რუსეთის აგრესიას.

ნონა გაფრინდაშვილი არის მსოფლიოს ხუთგზის ჩემპიონი - 1962; 1965; 1969; 1972; 1975 წლები;

მსოფლიოს საჭადრაკო ოლიმპიადების 11-გზის გამარჯვებული - 1963; 1966; 1969; 1972; 1974; 1978; 1980; 1982; 1984; 1986; 1992 წლები;
პირველი საჭადრაკო ოსკარის მფლობელი - 1983 წელი;

ევროპის საჭადრაკო კავშირის უმაღლესი საჭადრაკო ჯილდო „ოქროს პაიკის მფლობელი, საქართველოს ოლიმპიური კომიტეტის თავმჯდომარე 1989 -1996 წლები;

საქართველოს XX საუკუნის საუკეთესო სპორტსმენი ქალი.

Netflix – უმსხვილესი ამერიკული მედიაკომპანიაა, რომელიც მოთხოვნილი ვიდეოს მიმწოდებელია. კომპანია 1997 წლის 29 აგვისტოს დაარსდა და დღეს მსოფლიოს მასშტაბით მისი მომხმარებლების რაოდენობა 104 მილიონამდეა.