იურიდიული ფირმა BLB-ის, რომელიც „ნონა გაფრინდაშვილი Netflix-ის წინააღმდეგ“ საქმეში ნონა გაფრინდაშვილის ინტერესებს იცავდა, ერთ-ერთი მმართველი პარტნიორი ტოვებს.
კომპანიის დატოვების შესახებ რუსუდან მაისურაძემ სოციალური ქსელში დაწერა, სადაც ადვოკატი აცხადებს, რომ „გაფრინდაშვილი VS Netflix“-ის საქმის იდეა მას ეკუთვნის.
ცნობისათვის რუსუდან მაისურაძე თიბისი ბანკის CEO-ს ვახტანგ ბუცხრიკიძის მეუღლეა.
„ძალიან მიხარია, რომ ნონა გაფრინდაშვილი VS ნეტფლიქსის ძალიან რეზონანსული საქმე არ იარსებებდა ჩემ გარეშე, at least BLB-სთვის.
იდეა პირადად მე მეკუთვნის და როგორც არ უნდა მოინდომოს ვინმემ, ამას ვერ შეცვლის, ვერანაირი პიარით და ყალბი, დადგმული ფოტოებით.
საქმე დახურულია და მე დავტოვე BLB.
გეგმები ჯერ არ მაქვს, ერთადერთი, იმედი მაქვს უფრო აქტიურად გავაგრძელებ ჩემს სადოქტოროზე მუშაობას, რომელიც ასევე გამოხატვის თავისუფლებაზეა.
წარმატებები, BLB-ის. დარწმუნებული ვარ, აუცილებლად მიაღწევენ იმ წარმატებას, რომელსაც იმსახურებენ“, - წერს Facebook-ში რუსუდან მაისურაძე.
„კომერსანტი“ ადვოკატის მიერ იურიდიულ ფირმის დატოვების საკითხით დაინტერესდა და BLB-ის დაუკავშირდა. სადაც რუსუდან მუმლაძის სტატუსზე კომენტარი არ გააკეთეს და გვითხრეს, რომ ოფიციალურ პასუხს მოგვიანებით შეგვატყობინებენ.
შეგახსენებთ, რომ საქმეზე "ნონა გაფრინდაშვილი Netflix-ის წინააღმდეგ", ორ მხარეს შორის შეთანხმება შედგა. მოჭადრაკე სასამართლოს გზით შეცდომის გასწორებასა და კომპენსაციას, $5 მილიონს ითხოვდა.
შეთანხმება მას შემდეგ შედგა, რაც იანვარში კალიფორნიის სასამართლომ უარყო Netflix-ის არგუმენტი, რომ არ შეიძლება უჩივლონ მხატვრულ ნაწარმოებში რეალური ადამიანის ცილისწამებისთვის.
დავა ეხება სერიალში გაჟღერებულ ფრაზას, რომელიც ნონა გაფრინდაშვილს შეეხებოდა. მხატვრულ ფილმში მოვლენები 1960-იან წლებში ვითარდება. ნიჭიერი ამერიკელი გოგონა ჩადის საბჭოთა კავშირში და ეთამაშება მთავარ მეტოქეს, მსოფლიოს მრავალგზის ჩემპიონს, რომლის პროტოტიპი სავარაუდოდ გარი კასპაროვია. პარტიის დასაწყისში კადრში ჩნდება ნონა გაფრინდაშვილის პერსონაჟი, ის დარბაზში სხვა მაყურებლებს შორის ზის, ჭადრაკის კომენტატორი კი ამბობს: "ერთადერთი, რაც [ფილმის მთავარი გმირისთვის] უჩვეულოა, მისი სქესია, მაგრამ რუსეთში არც ეს არის უნიკალური, აქ არის ნონა გაფრინდაშვილი, თუმცა, ის ქალთა შორის არის მსოფლიო ჩემპიონი და მამაკაცს არასდროს დაპირისპირებია“.
რეალურად, 1968 წლისთვის გაფრინდაშვილს უკვე ნათამაშები ჰქონდა სულ მცირე 59 კაც მოჭადრაკესთან, რომელთაგან 10 დიდოსტატის ტიტულს ატარებდა.
Netflix საქმის წარმოების შეწყვეტას იმ მოტივით ითხოვდა, რომ ფილმში არსებული ფრაზა, რომლის გამოც ქართველი მოჭადრაკე დავობს, გამოხატვის თავისუფლების ჩარჩოში ჯდება.