რუსეთიდან გასული უცხოური კომპანიების საწარმოების კონფისკაცია ქვეყანას 1917 წელში დააბრუნებს. ამის შესახებ „ნორნიკელის“ თანამფლობელმა, ერთ-ერთმა უმდიდრესმა ადამიანმა, ვლადიმერ პოტანინმა განაცხადა. ამის შესახებ ინფორმაციას „ნორნიკელის“ Telegram-არხი ავრცელებს.

პოტანინი ფედერაციის მთავრობას აფრთხილებს, რომ თუ უცხოურ კომპანიებს, რომლებიც რუსული ბაზრიდან გადიან, ბიზნესი ჩამოერთმევათ, რუსეთს ათწლეულების განმავლობაში გლობალური ინვესტორების უნდობლობა დაემუქრება.

„აქტივების კონფისკაცია რუსეთს ასი წლით უკან, 1917 წელში დააბრუნებს,“ - აცხადებს ვლადიმერ პოტანინი.

მისი თქმით, ბევრმა კომპანიამ შესაძლოა, გადაწყვეტილება „გარკვეულწილად, ემოციურად“ და „უპრეცედენტო ზეწოლის ქვეშ“ მიიღო, ამიტომ, დიდი ალბათობით, ისინი რუსეთის ბაზარზე დაბრუნდებიან და მათ ეს შესაძლებლობა უნდა შეუნარჩუნდეთ.

„ნორნიკელის“ თანამფლობელი ამბობს, რომ ნაციონალიზაცია, ანუ საწარმოების შესყიდვა და სახელმწიფო საკუთრებაში გადაცემა, როგორც წესი, მთელი დარგის რესტრუქტურიზაციისთვისა და მისი შემდგომი პრივატიზაციისთვის გამოიყენება. ამდენად, პოტანინი არ არის დარწმუნებული, რამდენად მიზანშეწონილია დღეს უცხოური კომპანიების აქტივების ნაციონალიზაციაზე საუბარი.

მისი თქმით, რუსეთმა დასავლეთის სანქციებს „პრაგმატულად“ უნდა უპასუხოს, რომ საპასუხო ზომებმა რუსეთის ეკონომიკას სირთულეები არ შეუქმნას.

როგორც ცნობილია, მმართველი პარტია „ერთიანი რუსეთი“ იმ კომპანიების ქონების ნაციონალიზაციის ინიციატივით გამოდის, რომლებიც, უკრაინაში ომის გამო, რუსეთში წარმოებას ხურავენ.

„მმართველი პარტია იმ კომპანიების საწარმოო ქარხნების ნაციონალიზაციის ინიციატივით გამოდის, რომლებიც რუსეთიდან გასვლასა და წარმოების დახურვას გადაწყვეტენ. ჩვენ მივიღებთ მკაცრ საპასუხო ზომებს და ომის კანონების შესაბამისად ვიმოქმედებთ,” - აცხადებს პარტიის გენერალური საბჭოს მდივანი, ანდრეი ტურჩაკი.

BPN.GE