2022 წლის გაზაფხულზე სახელმწიფოთა უმრავლესობამ კოვიდრეგულაციები თითქმის დაივიწყა, გამონაკლისი ჩინეთი აღმოჩნდა. 1 მლნ-დან 156 ინფიცირებულით ჩინეთი ახლაც 200-ეულს მიღმაა, მაგრამ რადგან ქვეყანა ნულოვანი კოვიდის სტრატეგიას ინარჩუნებს, პეკინის გადაწყვეტილებით ერთეულ შემთხვევებზეც კი 10 და 20 მლნ-იანი ქალაქები იკეტება, რაც ეკონომიკაზე უარყოფითად აისახება.
2020 წელს როგორც განვითარებული, ასევე განვითარებადი ქვეყნების ეკონომიკები მინუსში გავიდა. ჩინეთმა კი, საიდანაც პანდემია დაიწყო 2.3%-იანი ზრდა მოახერხა. იმავე 2020 წელს მსოფლიო ვაჭრობის კლების ფონზე ჩინეთმა ექსპორტი $82 მლრდ-ით $2.723 ტრლნ-მდე გაზარდა. კოვიდრეგულაციების სპეციფიკიდან გამომდინარე, განსაკუთრებით მაღალი მოთხოვნა სმარტფონებსა და ლეპტოპებზე დაფიქსირდა. წელს კი ლეპტოპების მიწოდება 16%-ით შემცირდა.
2021 წელს ჩინეთის მშპ 8.1%-ით გაიზარდა, წლევანდელი პროგნოზი კი 5.5%-ს შეადგენს, რაც ბოლო სამი ათწლეულის მანძილზე ყველაზე დაბალი მაჩვენებელია პანდემიური 2020-ის გამოკლებით.
დენ სიაო პინის რეფორმების დაწყებამდე, 70-იანი წლების ბოლოს, ჩინეთის ექსპორტი $7 მლრდ-ს შეადგენდა, რაც იმდროინდელი ჩინეთის მშპ-ს 4.5%-ს უდრიდა, 10 წლის შემდეგ ექსპორტი $45 მლრდ-მდე, მშპ-სთან ფარდობა კი 14%-მდე, გაიზარდა. 2006 წელს ჩინეთის ექსპორტმა $1 ტრლნ-ს მიაღწია, რაც 22 წლის წინანდელი ჩინეთის ეკონომიკის 36%-ს უდრიდა. ექსპორტის ზრდა შემდეგ წლებშიც გაგრძელდა, მაგრამ უკვე აღარ მშპ-სთან მიმართებაში. ამჟამინდელი ექსპორტი მშპ-ს 18.5%-ს შეადგენს.
2020 წელს ჩინეთში საექსპორტო პროდუქტებისთვის გათვლილ საწარმოებში 80 მლნ ადამიანი მუშაობდა. თუ ექსპორტმა კლება განაგრძო, შეიძლება ასობით ათასი სამუშაო ადგილი დაიკარგოს.
ჩინეთი პლანეტის #2 ეკონომიკაა და გარკვეული მოკლევადიანი პრობლემების მიუხედავად, 2030 წლისთვის შეერთებულ შტატებს უკან ჩამოიტოვებს. მართალია ორნიშნა ზრდა წარსულს ჩაბარდა, მაგრამ ზრდის რესურსი ჯერ კიდევ დიდია. ეკონომიკის პარალელურად წლიდან-წლამდე ჩინეთის მზარდია ჩინეთის გავლენა და პოლიტიკური ამბიციებიც. პეკინის უმთავრეს თავის ტკივილს უკვე დიდი ხანია ტაივანი წარმოადგენს. სამხედრო ოპერაციაზე უარის თქმის ერთადერთი მიზეზი კი შეერთებული შტატებია, რომელიც პირობაც დებს, რომ ტაივანის უსაფრთხოებას საჭირო შემთხვევაში ასევე სამხედრო გზით დაიცავს.