პრემიერ-მინისტრის ოჯახის უძრავ ქონებაში მატებაა. პრემიერ-მინისტრის ბოლო დეკლარაციაში, რომელიც ირაკლი ღარიბაშვილმა 2022 წლის ოქტომბერში შეავსო, ჩნდება ბაკურიანში 402 კვ.მ. საცხოვრებელი სახლი, რომელიც პრემიერ-მინისტრის მეუღლის ნუნუ თამაზაშვილის სახელზეა რეგისტრირებული და რომელიც პრემიერის 2021 წლის ოქტომბრის დეკლარაციაში არ იყო.
ნუნუ თამაზაშვილმა 2019 წელს ბაკურიანში 1530 კვადრატული მეტრის მიწის ნაკვეთი შეიძინა, რომელშიც 76 500 დოლარი გადაიხადა. პრემიერის 2019 წლის დეკლარაციით ნუნუ თამაზაშვილს უკვე უფიქსირდება 134880,27 ლარის და ასევე 32508,15 დოლარის სესხი ბანკ „ქართუში“. 2022 წლის ოქტომბერში კი ნუნუ თამაზაშვილის დავალიანება 108355,18 ლარს შეადგენს.
როგორც ცნობილია, 2021 წელს ნუნუ თამაზაშვილს ბაკურიანში მდებარე სახელმწიფოს საკუთრებაში არსებული 5 958 კვადრატული მეტრი მიწა ტყით სპეციალური სარგებლობის უფლებით, 49 წლით გადაეცა. საჯარო რეესტრის მიხედვით, მისმა წარმომადგენელმა ეროვნულ სატყეო სააგენტოს სარგებლობასა და მფლობელობასთან დაკავშირებული უფლების წარმოშობის რეგისტრაციისთვის განცხადებით 2021 წლის 28 დეკემბერს მიმართა.
ტერიტორიის წლიური საწყისი ფასი 5 958 ლარი იყო. ინტერესი გამოხატა ერთმა ადამიანმა და მანვე, ამავე აუქციონში 6 255-ლარიანი შეთავაზებით გაიმარჯვა.
ირაკლი ღარიბაშვილის ცოლის ძმა, ალექსანდრე თამაზაშვილი მისი დისთვის ბაკურიანში ტყის გადაცემის ფაქტს ეხმაურება და აღნიშნავს, რომ ტერიტორიის იჯარით აღება უსაფრთხოებიდან გამომდინარე იყო საჭირო.
„ნახევარი ჰექტარი მიწის ნაკვეთი, რომელსაც სანახევროდ შეიძლება ტყე ეწოდოს და რომელიც საცხოვრებელი სახლის მიმდებარედაა, უსაფრთხოებიდან გამომდინარე, აუცილებელი გახდა მისი იჯარით აღება, რომელზეც არც მშენებლობა შეიძლება და რა თქმა უნდა არც ხის მოჭრა, პირიქით, ვალდებულებაა მოვლა-პატრონობის და ყოველწლიურად, სოლიდური თანხის შეტანის ბიუჯეტში“, — წერდა 2022 წლის დასაწყისში პრემიერის ცოლის ძმა.
მაშინდელმა სოფლის მეურნეობის მინისტრმა ლევან დავითაშვილმა კი თქვა, რომ ირაკლი ღარიბაშვილის მეუღლეს ბაკურიანში ტყის ნაკვეთი ღია აუქციონის ფარგლებში იჯარით გადაეცა და ეს ჩუქება არ არის.
დავითაშვილის თქმით, ნებისმიერ ადამიანს შეუძლია მიმართოს ეროვნულ სატყეო სააგენტოს და მას საიჯარო ვალდებულებებით და სათანადო პასუხისმგებლობით, სასურველ ტყის ნაკვეთს გადასცემენ.