ცხოველებისა და ფრინველის საკვების მწარმოებელი ქართული კომპანია ,,ნურტიმაქსი“ საექსპორტო ბაზარზე ფართოვდება. რეგიონის ქვეყნებში წარმატებული ექსპორტის შემდეგ, კომპანიამ  გეზი უზბეკეთის ბაზრისკენ აიღო. ამასთან, ,,ნუტრიმაქსი“ ერთ-ერთი მოთხოვნადი პროდუქტია ნიგერიის, განასა და უგანდას ბაზრებზეც.

ამ ეტაპზე კომპანიის მენეჯმენტი  დიდ ინტერესს იჩენს განვითარებადი ქვეყნების ბაზრების მიმართ, თუმცა პარალელურად აქტიური მუშაობა მიდის ევროპის ბაზრებზე ნიშის დასამკვიდრებლად. როგორც ,,ნუტრიმაქსის“ ტექნიკური ჯგუფის მენეჯერი რეზო ლაფაჩი ,,კომერსანტთან“ ამბობს, ამ ეტაპზე უზბეკურ მხარესთან მოლაპარაკებები მიმდინარეობს და სავარაუდოდ უახლოეს რამდენიმე თვეში პირველი პარტიის გაგზავნას შეძლებენ.

,,უკრაინაში  მიმდინარე ომმა გარკვეული დაბრკოლება გადაზიდვებთან დაკავშირებით შექმნა, თუმცა ამ ეტაპზე სირთულეები დაძლეულია და ექსპორტს ჩვეულ რეჟიმში ვაგრძელებთ, თუ არ ჩავთვლით ლარსის გამშვებ პუნქტთან ხშირ რიგებს, სხვა მხრივ პრობლემა არ გვაქვს. ეს არ ეხება მხოლოდ ცოცხალ ცხოველს, რომელსაც ურიგოდ უშვებენ საზღვარზე. ზოგადად ფრინველთა და ცხოველთა კვება პანდემიურ პერიოდშიც მოთხოვნადი იყო და ტენდენცია ახლაც შენარჩუნებულია. განსაკუთრებით აზერბაიჯანსა და სომხეთში კარგად მიდის საქმეები, ასევე აფრიკის მიმართულებაც მეტნაკლებად აქტიურია. ყველაზე პერსპექტიულად აზერბაიჯანისა და უზბეკეთის ბაზრებს მივიჩნევთ, სადაც ჩვენს პროდუქტებზე დიდი მოთხოვნაა და მაღალი მსყიდვითუნარიანობითაც გამოირჩევიან.

რაც შეეხება ადგილობრივ ბაზარს,  საქართველოში ყველა პროდუქტზე მოთხოვნა გაზრდილია, თუმცა ამავე დროს ფასიც იზრდება. სასურსათო კრიზისია მთელ მსოფლიოში - მარცვლეულზე, ფქვილსა და ქატოზე დეფიციტი შეიმჩნევა, რაც გაძვირებას იწვევს“, - ამბობს ლაფაჩი ,,კომერსანტთან“.

ნედლეულის იმპორტთან დაკავშირებით ლაფაჩი ამბობს, რომ მარცვლეულის ბაზარი დიდწილად ისევ რუსეთზეა დამოკიდებული, რაც არასტაბილურობის რისკს ზრდის და ბაზრების დივერსიფიცირების მიმართულებით ქმედითი ნაბიჯების გადადგმას მოითხოვს.

,,მარცვლეულის სეგმენტში ბიზნესს მეტი მხარდაჭერა სჭირდება. ჩვენი დიდი პრობლემაა, რომ უწყვეტი მარაგები არ გვაქვს და ძირითადად ისევ რუსეთზე ვრჩებით დამოკიდებული.  თუმცა ველოდებით ახალ მოსავალს,  15 ივლისიდან აგვისტოს ბოლოსკენ უკვე სიმინდის მოსავალიც დაგვემატება, რაც სავარაუდოდ ფასებზეც აისახება და ნედლეული გაგვიიაფდება. დღესდღეობით მეტი ადამიანი და მეტი ოჯახი აწარმოებს სასოფლო-სამეურნეო პროდუქტს, რაც ჩვენთვის ძალიან მნიშვნელოვანია, -ამბობს ლაფაჩი.

მისივე ინფორმაციით, ,,ნუტრიმაქსის“ წარმოებული პროდუქციის 60% ადგილობრივ ბაზარზე იყიდება. დანარჩენი 40% ექსპორტზე გადის.

ცნობისთვის, „ნუტრიმაქსი“ 2009 წელს დაარსდა და ის პირველი კომპანიაა საქართველოში, რომელიც ცხოველთა და ფრინველთა საკვებს ინდუსტრიულად აწარმოებს.

კომპანიის მისიაა მაღალხარისხიანი პროდუქციის, თანამედროვე ტექნოლოგიებისა და კვალიფიციური კონსულტაციების მიწოდების საშუალებით, განავითაროს ფერმერული მეურნეობები საქართველოში. კომპანია დაარსების დღიდან ჰოლანდიური მსხვილი ჰოლდინგის წევრის — Trouw Nutrition-ის ოფიციალური პარტნიორია, რომელსაც ცხოველთა საკვებისა და დანამატების წარმოებაში მსოფლიოში ლიდერის პოზიცია უკავია. 

მარი ჩიტაია