რუსეთის ჯარები გამუდმებით უშენენ ცეცხლს უკრაინის ქალაქებსა და სოფლებს ჭურვებით, რომლებიც აკრძალულია საერთაშორისო კონვენციებით. ამის შესახებ The New York Times-ი წერს თავის ახალ გამოძიებაში.
გამოცემის ჟურნალისტებმა შეისწავლეს ათასზე მეტი ფოტოსურათი უკრაინიდან და დაადგინეს იქ გამოყენებული ორი ათასზე მეტი ჭურვის ტიპი. მათი დიდი უმრავლესობა არის არაზუსტი იარაღი, რომლის გამოყენება აკრძალულია დასახლებულ კვარტლებში. დაახლოებით 330 ჭურვი აფეთქდა, როცა ისინი საცხოვრებელ შენობებს მოხვდა ან მათ მახლობლად ჩამოვარდა. 210 შემთხვევაში საქმე ეხებოდა იარაღს, რომლის გამოყენება აკრძალულია საერთაშორისო კონვენციებით, კერძოდ, კასეტურ ჭურვებს, აღნიშნავს გამოცემა. ისინი ჰაერში აფეთქების შედეგად ასობით კვადრატულ მეტრზე მოქმედებს.
ტექსტში ნახსენებია ასევე ჭურვები „ფლეშეტებით“, ლითონის წვრილი ნაწილაკებით, რომლებსაც ადამიანის რბილი ქსოვილების სერიოზულად დაზიანება შეუძლია.
სტატიის ავტორები წერენ, რომ უკრაინის კონფლიქტში აკრძალული იარაღის გამოყენების მასშტაბი საგრძნობლად უფრო დიდია, მაგრამ ამჟამად საბრძოლო მოქმედებები მიმდინარეობს და ეს ართულებს მტკიცებულებების შეგროვებას.
მანამდე ტელეარხ CNN-ის გამოძიებამ დაადასტურა, რომ რუსეთის არმიის გენერალმა ალექსანდრ ჟურავლიოვმა თებერვლის ბოლოს ბრძანება გასცა, ხარკოვისთვის კასეტური ჭურვები დაეშინათ.
ადრე რუსეთს ბრალად სდებდნენ კასეტური ბომბების გამოყენებას სირიაში. რუსეთის თავდაცვის სამინისტრო უარყოფს ამას, მაგრამ 2019 წელს ეს ბომბები აჩვენა გამოფენაზე, რომელზეც წარმოდგენილი იყო სირიაში გამოყენებული იარაღი.
არც რუსეთი და არც უკრაინა არ არიან ხელმომწერები კონვენციისა, რომელიც კრძალავს კასეტურ ჭურვებს.
კასეტური ბომბები ჰაერში ფეთქდება და შემდეგ დიდ ტერიტორიაზე მოაფრქვევს წვრილ ჭურვებს, რის შედეგადაც სამოქალაქო მოსახლეობას შეიძლება საფრთხე შეექმნას. ზოგი ეს პატარა ჭურვი შეიძლება არ აფეთქდეს ჩამოვარდნისას და, ფაქტობრივად, იქცეს ნაღმად, რომელიც მრავალი წლის განმავლობაში წარმოადგენს საფრთხეს.