„კორუფციისა და ორგანიზებული დანაშაულის კვლევის ცენტრმა“ (OCCRP) ალიაქსანდრ ლუკაშენკა „2021 წლის კორუფციონერად“ დაასახელა. ამის შესახებ ორგანიზაციის საიტზეა ლაპარაკი.
პუბლიკაციაში ლუკაშენკა მოხსენიებულია „ევროპის უკანასკნელ დიქტატორად“. ცენტრმა ის მთავარ კორუფციონერად დაასახელა „ორგანიზებული დანაშაულის ხელშეწყობისთვის“. ჟიურიმ ის ამ წოდების სარეკორდო რაოდენობის 1167 კანდიდატიდან შეარჩია.
„კორუფციის თვალსაზრისით ეს გამორჩეული წელი იყო, მაგრამ ლუკაშენკამ ყველას აჯობა“, - განაცხადა ჟიურის კოორდინატორმა და OCCRP-ის თანადამფუძნებელმა დრიუ სალივანმა.
კერძოდ, OCCRP აღნიშნავს Ryanair-ის თვითმფრინავის იძულებით დასმას მინსკის აეროპორტში და მასში მყოფი ბელარუსელი ოპოზიციონერი ბლოგერის, რამან პრატასევიჩისა და მისი მეგობარი ქალის, რუსეთის მოქალაქე სოფია საპეგას დაპატიმრებას. ორგანიზაცია წერს, რომ ნებისმიერს, ვინც ეწინააღმდეგება ლუკაშენკას, ელის მსგავსი ბედი, ან ის, რაც გადახდა სერგეი ციხანოუსკის, რომელსაც 18 წლით თავისუფლების აღკვეთა მიესაჯა 2020 წელს ანტისამთავრობო დემონსტრაციების ორგანიზების ბრალდებით.
ლუკაშენკას „მიღწევათა“ შორის ასახელებენ ასევე მის ოჯახთან დაახლოებული ოლიგარქებისთვის შემოსავლების წყაროების ორგანიზებას და პოლონეთის საზღვარზე მიგრანტებთან დაკავშირებული კრიზისის პროვოცირებას. გარდა ამისა, ლუკაშენკას ბრალად დასდეს კორონავირუსის შესახებ ყალბი ცნობების გავრცელებისთვის ხელის შეწყობა.
„67 წლის ლუკაშენკა 1993 წლიდან არის ჩაბღაუჭებული ძალაუფლებას მინსკში. ის აყალბებს არჩევნებს, აწამებს კრიტიკოსებს, აპატიმრებს და ცემით უსწორდება საპროტესტო აქციების მონაწილეებს და ყოველივე ამას ის კრემლის დახმარებით აკეთებს“, - ნათქვამია ცენტრის პუბლიკაციაში.
მთავარი კორუფციონერების რეიტინგში ლუკაშენკას პირველობას ჟიურიმ ერთხმად დაუჭირა მხარი. მის გვერდით აღმოჩნდნენ ავღანეთის ყოფილი პრეზიდენტი აშრაფ ღანი, სირიის პრეზიდენტი ბაშარ ალ-ასადი, თუქეთის პრეზიდენტი რეჯეპ ტაიპ ერდოანი და ავსტრიის ყოფილი კანცლერი სებასტიან კურცი.
OCCRP
