თბილისსა და რეგიონებში მდებარე მცირე სასტუმროებში რუსეთის მოქალაქეები ხანგრძლივი ვადით ჯავშნიან ადგილებს. როგორც სექტორის წარმომადგენლები ამბობენ, მათი უმეტესობა ოჯახებით ცდილობს დარჩენას. მხოლოდ გუშინ, 3 მარტს, გორში მდებარე სასტუმრო ,,ემ ქეის“ მფლობელმა ნინო გიორგაძემ რუსეთიდან 12 შეკვეთა მიიღო, თუმცა ,,კომერსანტთან“ ამბობს, რომ არც ერთი არ დაადასტურა.

,,ჩვენ მცირე ზომის სასტუმრო გვაქვს. ბოლო დრომდე მომართვიანობა შემცირებული იყო პანდემიური სიტუაციიდან გამომდინარე. რაც უკრაინაში რუსეთმა ომი დაიწყო, აქტიურად მოგვმართავენ რუსეთის მოქალაქეები, რომლებიც ცდილობენ ადგილების დაჯავშნას 1 თვით და მეტი ვადით. მომართვიანობა, წინა წელთან შედარებით, ბევრად გაზრდილია. ცხადია, ვეკითხები მიზეზს, მაგრამ მხოლოდ ერთმა განმარტა, რომ შექმნილი სიტუაციის გამო სურს, ოჯახით დიდი ხნით დარჩეს საქართველოში. აღნიშნულთან დაკავშირებით სოციალურ ქსელში ინფორმაციაც გავავრცელე, რადგან მაინტერესებს ადგილობრივების პოზიცია. ცხადია განწყობა არის ნეგატიური. შესაბამისად, არც ერთი მიღებული შეკვეთა არ დამიდასტურებია. მიმაჩნია, რომ ახლა ეროვნული ინტერესები და უკრაინის  მოქალაქეების სოლიდარობა ყველაზე მნიშვნელოვანია“, - ამბობს ნინო გიორგაძე.

საქართველოში რუსეთის მოქალაქეების გააქტიურების შესახებ ცნობილია ტურიზმის სფეროს ექსპერტ მანანა ალადაშვილისთვისაც, რომლის თქმითაც, ეს ადამიანები რეალურად ტურიზმის რანგში არ უნდა განიხილებოდნენ.

,,საომარი მოქმედებების გამო ძალიან რთული სიტუაციაა და მოსახლეობა თავს დაუცველად გრძნობს, მათ შორის, რუსეთში. ძალიან ბევრი რუსი ოჯახი ჩამოსულია ბათუმში. იმდენად ბევრი, რომ ეს უკვე ტურისტი არ არის. კომუნიკაცია მაქვს ადგილობრივ სასტუმროებთან და ამბობენ, რომ დიდი მომართვიანობაა, განსაკუთრებით კერძო ბინებში ცხოვრობენ. ძირითადად ახალაშენებულ ბინებს ქირაობენ. რუსეთის ჩვეულებრივი, რიგითი მოქალაქეები არიან, რომლებიც შეშინებული არიან ამ სიტუაციით“, - ამბობს ,,კომერსანტთან“ მანანა ალადაშვილი.

იქიდან გამომდინარე, რომ რუსეთი მოექცა მსოფლიო იზოლაციისა და სანქციების ქვეშ, რუსეთის მოქალაქეები ცდილობენ,  დატოვონ საკუთარი ქვეყანა და თავი შეაფარონ სხვა სახელმწიფოებს.

შესაბამისად, მზადდება პეტიცია მოთხოვნით, რომ  საქართველოში შემოსასვლელად რუსეთის მოქალაქეებს დაუწესდეთ სპეციალური (დროებითი) სავიზო რეჟიმი. ვიზა მიეცეთ რუსეთის მხოლოდ იმ მოქალაქეებს, რომლებიც საკუთარი პოლიტიკური შეხედულებების გამო იდევნებიან პუტინის დიქტატორული რეჟიმის მიერ და რომელთა სიცოცხლე/ჯანმრთელობა რისკის ქვეშ იმყოფება მათი რუსეთის ტერიტორიაზე ყოფნით. 

ასეთი სპეციალური სავიზო რეჟიმი უნდა იქნეს შენარჩუნებული მინიმუმ საომარი ვითარების დასრულებამდე და მსოფლიო წესრიგის აღდგენამდე.

პეტიციის ავტორები შიშობენ, რომ საქართველოსა და რუსეთს შორის გახსნილი საზღვრის პირობებში, ათობით ათასი რუსი ოჯახი ჩამოვა და საქართველოში დასახლდება.

მარი ჩიტაია