ITB Berlin-დან დაბრუნებული რესტორატორი შოთა ბურჯანაძე რადიო „კომერსანტის“ ეთერში აცხადებს, რომ გამოფენას 2500-მდე მაღალი რანგის სტუმარი ჰყავდა და ბევრმა მათგანმა სწორედ ახლა აღმოაჩინა საქართველო. ამის მიზეზი კი ის არის, რომ მათ აღქმაში ისევ და ისევ რუსეთის გავლენის ქვეშ მყოფ ქვეყნად ვრჩებით.
„ახლა იცნობენ საქართველოს, ბევრმა წელს აღმოაჩინა. პრობლემა იმაშია, რომ ჩვენ მათთვის ისევ და ისევ ვრჩებით რუსეთის გავლენის ქვეშ მყოფ ქვეყნად. მათ აღქმაში, გარკვეულწილად, ჩვენ რუსეთთან ერთად ვართ და შესაბამისად არასაინტერესოა მათთვის ჩვენი ქვეყანა. როცა იგებენ, რომ ჩვენ სხვა კულტურა გვაქვს და არანაირი კავშირი არ გვაქვს რუსეთთან გარდა იმისა, რომ რუსეთი არის ოკუპანტი და დამპყრობელი, შემდეგ მათთვის უკვე საინტერესო ვხდებით“, - განაცხადა შოთა ბურჯანაძემ.
შოთა ბურჯანაძემ ITB Berlin-ის პარალელურად ე.წ. აგენტების კანონის წინააღმდეგ თბილისში გამართული აქციებიც გაიხსენა და თქვა, რომ ახალგაზრდების აქტიურობამ ერთი ათასად გაზარდა საქართველოსადმი ინტერესი და „თავისუფლების სურნელი“, რაც მათ დაატრიალეს, ბერლინშიც იგრძნობოდა.
„ITB Berlin-ის შემდეგ ყველაფერი გადაფარა იმ კადრებმა, რაც თბილისში ვითარდებოდა. ბერლინში ყველა „ნიუსი“საქართველოში მიმდინარე მოვლენებით იწყებოდა და ყველგან ხაზგასმული იყო, რომ აქციებზე გამოსული ახალგაზრდები, ითხოვდნენ და იბრძოდნენ ევროპისთვის.
„ყველა უნდა ვეცადოთ, რომ ის კლიშე რაც დაგვდევს, ოდნავი კავშირი, რაც გვაქვს რუსეთთან მთლიანად ჩავხსნათ. ეს აუცილებელია. მომავალი თაობის წარმოუდგენელმა ნაბიჯმა, საქართველო ერთი ათასად გაზარდა და შესაძლებელი გახდა, რომ ნამდვილი თავისუფლების სურნელი გვეგრძნო და ეს ბერლინშიც იგრძნობოდა“, - განაცხადა შოთა ბურჯანაძემ.
მისი თქმით, ბერლინში ქართული კულტურა, ხელოვნება, ისტორია, გასტრონომია სრულყოფილად წარმოჩინდა და როგორც ახლო, ისე გრძელვადიან პერსპექტივაში ტურისტების მოზიდვის კუთხით ნაბიჯი გადავდგით.
„ITB Berlin-ის მეორე განყოფილება იყო გასტრონომიული შესაძლებლობების წარმოჩენა. სადაც წარმოდგენილი იყო ყველა ის ქართული კერძი, რომელიც ჩვენს გასტრო-კულტურას წარმოადგენს: ხაჭაპური, ხინკალი, ლიბიანი, ლობიანი, ფხალეული, გოჭის ხორციც, მწვადი, ბევრი-ბევრი ნუგბარი. საზღვარგარეთ ამდენი მასალის წაღება რთული იყო, მაგრამ შესაძლებელი. ტურიზმის დეპარტამენტმა დიდი მონდომება და ძალა ჩააქსოვა, რომ ჩვენი ქვეყანა კარგად წარმოჩენილიყო ბერლინში. როგორც ახლო, ისე გრძელვადიან პერსპექტივაში ტურისტების მოზიდვის კუთხით ნაბიჯი გადავდგით“, - განაცხადა შოთა ბურჯანაძემ.