ყველაზე განვითარებულ ქვეყნებში ინფლაცია წელს, საშუალოდ, 9%-მდე დაჩქარდება, რაც დეკემბერში მოსალოდნელ მაჩვენებელზე ორჯერ მეტია. ამის შესახებ ეკონომიკური თანამშრომლობისა და განვითარების ორგანიზაციის (OECD) ახალ პროგნოზში წერია, რასაც რუსული Forbes ავრცელებს.
პრობლემა ყველაზე მწვავედ OECD-ის წევრი ევროპის ქვეყნებისთვის დგას. ორგანიზაციის ეკონომისტების შეფასებით, წელს ნიდერლანდებში ინფლაცია 9,2%-ს მიაღწევს, დიდ ბრიტანეთში კი ფასების 8,8%-იანი ზრდა არის მოსალოდნელი, რაც დეკემბერში პროგნოზირებულ 4,4%-იანი ზრდის მაჩვენებელზე ორჯერ მეტია. აშშ-ზე OECD-ის პროგნოზი გაცილებით მოკრძალებულია. ორგანიზაციის მონაცემებით, ინფლაცია იქ 5,9% იქნება, დეკემბერის პროგნოზით კი ოდნავ ნაკლები, 4,4% უნდა ყოფილიყო.
ამასთან, OECD-ის ეკონომისტებმა 2022 წელს გლობალური მშპ-ის ზრდის პროგნოზი 3%-მდე შეამცირეს, რაც დეკემბრის პროგნოზზე 1,5 პროცენტული პუნქტით ნაკლებია. 2023 წელს გლობალური ეკონომიკა, ადრე მოსალოდნელ 3,2%-ის საწინააღმდეგოდ, მხოლოდ 2,8%-ით გაიზრდება. OECD-ის მონაცემები საერთაშორისო სავალუტო ფონდის პროგნოზზე პესიმისტურია, რომელიც მიმდინარე და მომავალ წელსაც გლობალური ეკონომიკის 3,6%-იან ზრდას მოელის.
OECD-ის პროგნოზით, აშშ-ის ეკონომიკა წელს 2,5%-ით, მომავალ წელს კი 1,2%-ით გაიზრდება, მაშინ, როცა წინა პროგნოზით წელს 3,7%-ით, 2023 წელს კი 2,4%-ით უნდა გაზრდილიყო. ორგანიზაციის მთავარი ეკონომისტი, ლოურენს ბუნი ვარაუდობს, რომ თუ ენერგორესურსების ფასები მოიმატებს ან ცენტრალური ბანკები ინფლაციის შესაჩერებლად საპროცენტო განაკვეთებს გაზრდიან, ზოგიერთ დასავლურ ეკონომიკას შესაძლოა, რეცესია დაემუქროს. მთლიანი შიდა პროდუქტის შემცირებაზე, ასევე, უკრაინაში არსებული ვითარება და ჩინეთის კოვიდშეზღუდვები მოქმედებს.
მოხსენებაში ნათქვამია, რომ მთავრობებისთვის პრიორიტეტი სურსათის დეფიციტის მოგვარება უნდა იყოს, რაც საფრთხეს უქმნის აფრიკისა და ახლო აღმოსავლეთის ბევრ ქვეყანას.
OECD 
