ოფთალმოლოგიის ეროვნულ ცენტრში მხედველობის ფემტო და ექსიმერ ლაზერული კორექცია ტარდება.

მხედველობის სიმახვილის დაქვეითების მიზეზებზე, ოპერაციის პროცედურაზე და სხვა დეტალებზე "კომერსანტთან", ოფთალმოლოგიის ეროვნული ცენტრის ოფთალმოლოგმა შოთა თადუმაძემ ისაუბრა.

შოთა თადუმაძე განმარტავს, რომ მხედველობის სიმახვილის დაქვეითების ყველაზე ხშირი მიზეზი ე.წ რეფრაქციული მანკებია, რაც თვალის ოპტიკური სისტემის გარდამტეხუნარიანობის შეცვლითაა გამოწვეული. მისივე განმარტებით ყველას, ვისაც სურს დაინახოს ისევე მკაფიოდ, როგორც ამას სათვალისა და ლინზის დახმარებით ახერხებს, შეუძლია მიმართოს მხედველობის სიმახვილის კორექციის ლაზერულ მეთოდს, ე.წ ფემტო-ლეიზიკს. 

"საუბარია ახლომხედველობაზე, შორსმხედველობასა და ასტიგმატიზმზე, რა დროსაც მკაფიო მხედველობისთვის ადამიანებს მუდმივად ესაჭიროებათ სათვალისა თუ კონტაქტური ლინზის გამოყენება. მაღალტექნოლოგიური ლაზერული აპარატურის საშუალებით იცვლება თვალის გარდამტეხუნარიანობა და მიიღწევა მაქსიმალური მხედველობის სიმახვილე. ამ მეთოდის წყალობით შესაძლებელია ადამიანი სამუდამოდ გათავისუფლდეს სათვალისა და ლინზებისგან." - აღნიშნავს შოთა თადუმაძე 

შოთა თადუმაძის განმარტებით აღნიშნული მანიპულაციის უსაფრთხოება, განპირობებულია თანამედროვე აპარატურული ტექნოლოგიის სრულყოფით. ოფთალმოლოგიის ეროვნულ ცენტრში პროცედურა კარლ ცაისის ფემტო-ექსიმერული ლაზერით ტარდება (Zeiss Visumax Femtosecond / Excimer Laser Mel-80), რომელიც წარმოადგენს ზუსტ და უსაფრთხო ტექნოლოგიას რეფრაქციულ ქირურგიაში. თადუმაძე აღნიშნავს, რომ პაციენტის გამოკვლევის შემდეგ, მოხდება მისი მონაცემების ანალიზი და ინდივიდუალური მკურნალობის გეგმა შემუშავდება.

"ამის შემდომ ლაზერული აპარატურის დახმარებით, მილიმეტრის მეათასედის სიზუსტით შეიცვლება თვალის გამჭვირვალე გარსის რქოვანის ფორმა ისე, რომ თვალის კაკლის მთლიანობა არ ირღვევა. შედეგად მიიღწევა ეფექტი, რომელიც, როგორც წესი, შენარჩუნდება მთელი სიცოცხლის განმავლობაში. 

გამომდინარე იქიდან, რომ ოფთალმოლოგიის ეროვნულ ცენტრში მანიპულაცია მხოლოდ ლაზერით ე.წ უდანო მეთოდით სრულდება, მისი გართულების ალბათობა მინიმალურია და წარმატების მაჩვენებელი 99.9 %-ს აღწევს."- აღნიშნავს შოთა თადუმაძე.

შოთა თადუმაძემ "კომერსანტთან" ოპერაციის დროს პაციენტის მდგომარეობაზეც ისაუბრა და განმარტა, რომ ოპერაცია რამდენიმე წამი გრძელდება და მისი მსვლელობისას პაციენტი, თვალზე მსუბუქ შეხებას გრძნობს. 

რაც შეეხება თვითონ პროცედურას, ოპერაცია სრულიად უმტკივნეულოა და გაუტკივარებისთვის თვალში ჩასაწვეთებელი მედიკამენტი გამოიყენება.

შოთა თადუმაძის განმარტებით ოპერაციის ჩატარებიდან მეორე დღეს პაციენტი უბრუნდება ცხოვრების ჩვეულ რიტმს. კორექციის შემდეგ რამდენიმე დღის განმავლობაში შესაძლოა ადვილად დაეღალოს თვალი კითხვისას და ახლო მანძილზე მხედველობითი დატვირთვისას, თუმცა ყოველდღიურად ეს დისკომფორტი შემცირდება და საბოლოოდ მთლიანად გაქრება.

ფემტო ექსიმერლაზერული კორექციის შემდეგ ზოგადად ფიზიკური და მხედველობითი დატვირთვა შეზღუდული არ არის. გარკვეული პერიოდის განმავლობაში პაციენტებს ენიშნებათ მედიკამენტები თვალის წვეთების სახით, ოპერაციის შემდგომი გართულებების თავიდან ასარიდებლად. 

ოფთალმოლოგის განმარტებით სასურველია, რომ ოპერაციიდან ერთი კვირის განმავლობაში თვალში წყალი არ მოხვდეს.

თადუმაძე განმატავს, რომ კორექცია არ იგეგმება იქამდე, სანამ თვალის გარდატეხის ძალა სტაბილური არ იქნება და რეფერაქციული ბანკი პროგრესირებას არ შეწყვეტს. ოპერაციაზე შეზღუდვა 18-21 წლამდე ვრცელდება.

"რაც შეეხება ზედა ასაკობრივ ზღვარს, იგი პრაქტიკულად არ არსებობს; თუმცა თვალის გარკვეული ასაკთან ასოცირებული ცვლილებები, ამ ოპერაციის უკუჩვენებას წარმოადგენს." - აღნიშნავს შოთა თადუმაძე

მისივე განმარტებით არსებობს თვალის გარკვეული დაავადებები, რომელთა არსებობის შემთხვევაშიც ოპერაციას უკუჩვენებები ექნება.

"ასევე უკუნაჩვენებია კორექციის დანიშვნა ისეთ დროს თუ რქოვანას არ აქვს საკმარისი სისქე. კონკრეტულად თვალის დაავადებების გარდა, ოპერციის უკუჩვენებას გარკვეული სისტემური დაავადებებიც წარმოადგენენ. ასევე არ შეიძლება მხედველობს ლაზერული კორექციის დაგეგმვა ორსულობისას და ლაქტაციის პერიოდში (ბუნებრივი კვების დროს)." - აღნიშნავს შოთა თადუმაძე

შოთა თადუმაძემ ოპერაციის შემდგომ მხედველობასა და სათვალით მხედველობას შორის განსხვავებაზეც ისაუბრა და განმარტა, რომ პირველ რიგში გაუმჯობესებულია მხედველობის ხარისხი და იმატებს კონტრასტული მხედველობა და ფერების აღქმის უნარი. ასევე იზრდება მხედველობის ველიც. 

"როდესაც ადამიანს სათვალე უკეთია, მისი მხედველობის ველი შეზღუდულია - ის კარგად ხედავს მხოლოდ სათვალის ჩარჩოს შიგნით, ჩარჩოს მიღმა კი ყველაფერი ბუნდოვანია. ოპერაციის შემდგომ ყველაფერი მკაფიოა, რაც მხედველობის ველში ექცევა. 

ასევე, გასათვალისწინებელია ერთი ფაქტორი – სათვალის მინა ცვლის გამოსახულების ზომას. მაგალითად, შემკრები (+) ლინზა ადიდებს გამოსახულებას, გამშლელი (-) კი-პირიქით, აპატარავებს. ოპერაციის შემდგომ პაციენტი ყველაფერს ბუნებრივი ზომით აღიქვამს. " - აღნიშნავს შოთა თადუმაძე.

(R)