იაპონური მარჯვენასაჭიანი ავტომობილები აფხაზური ნომრებით ყირგიზეთის მთავრობისთვის სერიოზულ პრობლემად იქცა. მთავრობამ უკანონოდ შესული მანქანების საჯარიმო სადგომზე გადაყვანა დააპირა, თუმცა, ავტომფლობელების მიერ მთავრობის სასახლესთან მოწყობილმა საპროტესტო აქციამ ხელისუფლებას დათმობაზე წასვლა აიძულა. ამის შესახებ გამოცემა azattyk.org წერს.

ამ ეტაპზე მთავრობა მოქალაქეებს უბრალოდ სთხოვს, რომ აფხაზეთში მანქანები არ იყიდონ, და აცხადებს, რომ ამ სატრანსპორტო საშუალებების შესახებ ინფორმაციის დაგროვებას იწყებს.

რა კონკრეტული შედეგები მოჰყვება მონაცემთა ბაზის შექმნას მთავრობის უუნარობის ფონზე - ძნელი სათქმელია, ამასობაში კი ბიშკეკში აფხაზეთის ნომრებით უკვე ათასობით მარჯვენასაჭიანი ავტომობილი მოძრაობს.

ხელისუფლება აცხადებს, რომ განბაჟების გარეშე შემოსული ავტომობილების გადაადგილება უკანონოა, მით უმეტეს მაშინ, როდესაც მათ დროებითი რეგისტრაციის ვადა დიდი ხნის წინ გაუვიდათ. განუბაჟებელმა მანქანამ ქვეყნის ტერიტორიაზე შესვლიდან 1 წლის შემდეგ ყირგიზეთის ტერიტორია უნდა დატოვოს.

თანაც, მარჯვენასაჭიანი ავტომობილების შეყვანა ჯერ კიდევ 2015 წელს აიკრძალა. მაგრამ როგორც ჩანს, არც ერთი და არ მეორე ყირგიზებს დიდად არ ადარდებთ - ინტერნეტში აფხაზეთიდან ჩამოყვანილი ასობით მანქანა ჩვეულ რეჟიმში იყიდება.

მარტში ამ ტიპის მანქანების მფლობელებმა მთავრობას ლეგალიზების ფორმის მოფიქრების მოთხოვნით მიმართეს და რამდენიმე მიტინგი ჩაატარეს. ისინი დარწმუნებულები არიან, რომ ამ პრობლემის გაჩენა სწორედ მთავრობის ბრალია. მათი თქმით, ხელისუფლებამ იმპორტის უკანონო სქემის შესახებ ჯერ კიდევ ერთი წლის წინ იცოდა და მყიდველები ამის თაობაზე არ გააფრთხილა.

„ჩვენ საქმის კურსში არ ვიყავით, იმიტომ, რომ მანქანების შემოყვანის დროს საბაჟოზე არ გაგვაფრთხილეს, რომ დროებითი რეგისტრაცია 1 წლის შემდეგ იწურება“, - ამბობენ ისინი.

მთავრობა კი პასუხობს, რომ არანაირი განსაკუთრებული სქემის მოფიქრება საჭირო არაა, და ავტომობილების ლეგალიზების ერთად-ერთი, და საკმაოდ მარტივი საშუალება არსებობს - განბაჟება.

ამ დროისთვის ყირგიზეთში აფხაზეთიდან 7000-ზე მეტი ავტომობილი შევიდა.  საბაჟომ და ეკონომიკის სამინისტრომ უკანონო ავტომობილების გამოვლენის მიზნით რამდენიმე რეიდის ჩატარება სცადა, თუმცა, საპროტესტო აქციების შემდეგ გადაიფიქრა - მთავრობას საკონსტიტუციო რეფერენდუმის წინ სოციალური მდგომარეობის დაძაბვა არ სურს.

ხელისუფლება მკაცრი ზომების მიღებას არ ჩქარობს, თუმცა, ეს ავტომფლობელებს დამშვიდების საშუალებას მაინც არ აძლევს - ხვალ-ზეგ რეიდების შესაძლოა განახლდეს, და ამიტომაც ისინი მანქანების დაკანონებას ითხოვენ, ოღონდ განბაჟების გარეშე.

სამოქალაქო კავშირის „რეფორმებისთვის“ წევრი ურმატ კაზაკბაევი მიიჩნევს, რომ მთავრობამ პრინციპულობა უნდა გამოიჩინოს, და კანონის მხარეზე დადგეს.

„ამ ვითარებაში ავტომფლობელების ნებაზე სიარული არაფრით არ შეიძლება. კანონი უნდა კანონობდეს - მანქანებს დროებითი რეგისტრაციის ვადა გაუვიდათ - ან გაიარეთ განბაჟება, ამ ყირგიზეთის ტერიტორია დატოვეთ. წინაამღდეგ შემთხვევაში იაფი მანქანების ჩამოყვანას, და უფასოდ გაფორმებას ყველა მოინდომებს“, - მიიჩნევს ის.

ყირგიზეთში 2015 წლიდან მარჯვენასაჭიანი ავტომობილების იმპორტი აკრძალულია, თუმცა, მათზე ქვეყნის ავტოპარკის 20% მოდის.

ბევრმა ყირგიზმა აფხაზური მარშრუტი ახალი ავტომობილის ყიდვის კარგ საშუალებად ჩათვალა, დღეს კი ისინი გაურკვეველ მდგომარეობაში არიან.