,,ოლ-პი ჯგუფსა“ და ,,ქალთა ბიზნეს საზოგადოებას“ შორის თანამშრომლობის მემორანდუმი გაფორმდა. ინიციატივის მიზანი, ერთობლივი ძალისხმევით, ქალთა სოციალური და ეკონომიკური გაძლიერებაა.
შეთანხმების ფარგლებში, ,,ოლ-პი ჯგუფი“ პროექტის ,,6 ქალი“ მხარდამჭერია და მისი ერთ-ერთი მონაწილისთვის ინდივიდუალური გადამზადების პროგრამას უზრუნველყოფს.
,,პროექტი ბენეფიციართა კონკრეტულ საჭიროებებზე მორგებული და მაქსიმალურად შედეგზე ორიენტირებულია. მნიშვნელოვანია, რომ დაგეგმილი აქტივობებით, კერძო და არასამთავრობო სექტორი, გაეროს მდგრადი განვითარების მიზნების შესრულებას ვუწყობთ ხელს“, - აცხადებს ,,ოლ-პი ჯგუფის“ დირექტორი ნიკოლოზ მაჩალაძე.
პროცესში ბიზნეს სექტორის ჩართულობასა და ,,ოლ-პი ჯგუფის“ როლზე ამახვილებს ყურადღებას ,,ქალთა ბიზნეს საზოგადოების“ თანადამფუძნებელიც. ,,ვიცნობდით ,,ოლ-პი ჯგუფის“ განხორციელებულ სოციალურ პროექტებს. შესაბამისად, გადავწყვიტეთ მიგვემართა და ერთობლივი სასარგებლო აქტივობა დაგვეგეგმა. ჩვენ ვაძლიერებთ მცირე მეწარმეებს, რაც საბოლოოდ ქმნის მდგრად ეკონომიკურ განვითარებას ქვეყნის მასშტაბით“, - აღნიშნავს რუსო კვანტალიანი.
,,ოლ-პი ჯგუფისა“ და ,,ქალთა ბიზნეს საზოგადოების“ პროექტი მეწარმე ქალებს ისეთი განსხვავებული სფეროებიდან აერთიანებს, როგორებიცაა აგრო სექტორი, ტურიზმი, საკვები პროდუქტები და მოდის ინდუსტრია.