2 მაისს გავრცელდა ინფორმაცია, რომ რუსმა მილიარდერმა ოლეგ ტინკოვმა „ტინკოფის“ წილი „კაპიკებად გაყიდა“ – ბიზნესმენის შეფასებით, სამართლიანი ფასის მხოლოდ 3%–ად. ამის მიზეზი რუსეთის ხელისუფლების კრიტიკა გახდა უკრაინაში განხორციელებული სამხედრო აგრესიის გამო. ამ თემაზე ბიზნესმენმა The New York Times–თან ინტერვიუში ისაუბრა.
სამშაბათს, 3 მაისს გამოქვეყნებულ პოსტში კი ბიზნესმენმა ყველაფერს თავისი სახელი დაარქვა:
„რუსეთში აღარაფერი დამრჩა. და ეს ცუდია, რუსეთისთვის, – წერს ტინკოვი. – მე ერთ–ერთი ვარ იმ მცირეთაგან, ვინც რეჟიმის ზეწოლის და არა მათი წყალობით ნულიდან ავაშენე ოთხი ბიზნესი! პიკზე როდესაც ვიყავი, ჩემს ქონებას ფორბსი $9,4 მილიარდად აფასებდა. და მეც ვამაყობდი, ოღონდ არა ფულით, არამედ იმით, რომ კორუმპირებულ და არქაულ რუსეთშიც შეიძლება პატიოსანი, თავისუფალი და ამერიკული ტიპის ბიზნესის აშენება! არასოდეს მიმიცია ქრთამი, სამსახურში არ ამყავდა მეგობრები და ნაცნობები, ამას ჩვენი ნებისმიერი თანამშრომელი დაგიდასტურებთ, სწორედ ამიტომ გავხდით ქვეყნის სიდიდით მეორე ბანკი და პირველებიც გავხდებოდით... ვინაიდან კრეატივსა და მოდერნს „ძალოვნების ბიჭები და ამხანაგები“ ვერაფერს უპირისპირებდნენ, უბრალოდ შეხედეთ მათ... სახეებს. ვწუხვარ, რომ ჩემი ქვეყანა საბოლოოდ გადაეშვა არქაიზმში, პატერნალიზმსა და სერვილიზმში. რუსეთი არ არის, იყო და გათავდა“.
ტინკოვმა განაცხადა, რომ არ შეუძლია „მშვიდად გამოიმუშავებდეს ფულს ქვეყანაში, რომელიც მეზობელს ებრძვის და მშვიდობიან მოქალაქეებსა და ბავშვებს ხოცავს“.
„მე ქვეყნიდან თან მიმაქვს ბრენდები Tinkoff და La Datcha. ისინი ჩემი ოჯახის საკუთრებაა, არ მინდა მათი „გასვრა“ რუსი ჯარისკაცებისა და უკრაინის მოსახლეობის სისხლით! უკრაინა გაიმარჯვებს, რადგან სიკეთე ყოველთვის იმარჯვებს ბოროტებაზე, ასე გვასწავლიდნენ სკოლაში!“, – დარწმუნებულია ბიზნესმენი.
მანამდე, 2 მაისს, „ტინკოფ ბანკის“ დამფუძნებელმა რუსმა ბიზნესმენმა ოლეგ ტინკოვმა პირველად მას შემდეგ, რაც ინსტაგრამზე რუსეთის ხელისუფლება მწვავედ გააკრიტიკა უკრაინაში განვითარებული მოვლენების გამო, ინტერვიუ მისცა გაზეთ New York Times–ს. ამ ინტერვიუში ტინკოვი ამბობს, რომ გასულ კვირაში TCS Group Holding–ის, ჯგუფის „ტინკოფ“ მთავარი სტრუქტურის აქციების 35% ოლეგ ტინკოვის ოჯახისგან ოლიგარქ ვლადიმირ პოტანინის „ინტერროსმა“ შეიძინა. რუსეთის ბანკმა გარიგება დაადასტურა, თუმცა მისი პარამეტრები არ საჯაროვდება.