olma.ge უცხოური წიგნების გაყიდვა-მიწოდებას უკვე 7 წელია ახორციელებს. კომპანიაში აცხადებენ, რომ განსაკუთრებით დიდი მოთხოვნა რუსულ წიგნებზეა და ქვეყანაში რუსი მიგრანტების ზრდის ფონზე, მოთხოვნა კიდევ უფრო გაიზარდა.
როგორც „კომერსანტთან“ olma.ge-ს დირექტორმა გარიკა აივაზიანმა განაცხადა, კომპანიის წლიური ბრუნვა 2022 წელს - 400 000 ლარამდე იყო და ყოველწლიურად ის 20-25%-ით იზრდება, კომპანიას რუსეთიდან წელიწადში 10-12 ათასი დასახელების წიგნი ჩამოაქვს და დაახლოებით 30-40 ათასი ეგზემპლარი იყიდება.
გარიკა აივაზიანი, olma.ge-ის დირექტორი: „10 წელზე მეტია ამ სფეროში ვსაქმიანობ. ჯერ საკანცელარიო ნივთებზე ვმუშაობდით, მერე ჩამოვყალიბდით, რომ მხოლოდ წიგნებზე ვყოფილიყავით ორიენტირებული. უკვე 7 წელია olma.ge-ი არსებობს. ჩვენი მიზანი იყო ის, რომ ის ლიტერატურა, რომელიც არ არის ნათარგმნი ქართულ ენაზე, ბაზარზე შემოგვეტანა. არა მხოლოდ ჩვენი ინიციატივით ჩამოგვაქვს წიგნები, 50% შეკვეთაა.“
კომპანია ძირითადად რუსულ წიგნებზეა ორიენტირებული და ამ მხრივ ბაზარზე კონკურენტი არც ჰყავთ. olma.ge-ის დირექტორი ამბობს, რომ წიგნის მაღაზიებშიც იყიდება რუსული წიგნები, მაგრამ იქ მცირე არჩევანია და მათ კონკურენტად არ განიხილავს. რუსული წიგნების გარდა პორტალზე იყიდება ინგლისური და გერმანული წიგნები, საკანცელარიო ნივთები, სახატავი ინვენტარი, აქსესუარები, სამაგიდო თამაშები და სხვა.
„ქვეყანაში ბევრი რუსია ჩამოსული და მიგრანტების ზრდამ გაყიდვები გაზარდა. ამას გარდა, დიდი მოთხოვნაა ინგლისური, იაპონური, კორეული ენის შესასწავლ წიგნებსა და დისკებზე. გვაქვს საბავშვო, სასწავლო, ბიზნეს, სამეცნიერო წიგნები და მხატვრული ლიტერატურა“, - აცხადებს გარიკა აივაზიანი.
მისი თქმით, olma.ge-ზე ფასნამატთან დაკავშირებით, წიგნების თემატიკიდან გამომდინარე, ინდივიდუალური მიდგომა აქვთ.
„არ გვაქვს ყველაფერზე ერთნაირი მარჟა. ფასნამტი დაახლოებით 30-დან 70%-მდე მერყეობს და საშუალოდ 40-45%-ია“, - აცხადებს გარიკა აივაზიანი.
olma.ge წიგნების მიწოდების სერვისს მთელი საქართველოს მასშტაბით ახორციელებს, სამომავლოდ კი საკანცელარიო ნივთების ასორტიმენტის გაზრდას გეგმავს.