ომანელმა მილიონერმა და ბიზნესმენმა აჰმედ ალ ბარვანიმ ლეო მესის 1 მლნ დოლარი შესთავაზა იმ შავი მოსასხამის სანაცვლოდ, რომელიც არგენტინის ნაკრების კაპიტანს მსოფლიოს ჩემპიონატის დაჯილდოებაზე ეცვა. ამ მოსასხამს ბიშტი ჰქვია. ის არაბული ტრადიციული სამოსია, რომელიც დღესასწულებზე, ქორწილებსა და წვეულებებზე მაღალი კლასის წარმომადგენლებს აცვიათ. ბიშტის ტარება დაფასებისა და პატივისცემის ნიშანია.

ალ ბარვანიმ მესის მსოფლიოს ჩემპიონატში გამარჯვება ტვიტერის საშუალებით მიულოცა  და ბიშტის სანაცვლოდ 1 მლნ დოლარი შესთავაზა.

„ომანის სასულთანოდან გილოცავთ 2022 წლის მსოფლიოს ჩემპიონატში გამარჯვებას. არაბული ბიშტი გონიერებისა და სიბრძნის სიმბოლოა. მე მასში მილიონ დოლარს გთავაზობთ,“ - დაწერა აჰმედ ალ ბარვანიმ.

„მე სტადიონზე გახლდით და ჩემი თვალით ვნახე, როგორ მოასხა ყატარის ემირმა მესის ბიშტი. ეს იყო მომენტი, როდესაც მთელმა მსოფლიომ გაიგო, რომ ჩვენ, არაბები ვართ და ეს ჩვენი კულტურაა. გთხოვთ, დაიმახსოვრეთ. ეს იყო სიამაყის მომენტი, რომელიც ისტორიაში შევა. ის აგრეთვე შეგვახსენებს, რომ ჩვენ ყველაფერი შეგვიძლია,“ — განაცხადა ომანელმა მილიონერმა The National News-თან ინტერვიუში.