კორონავირუსის ახალი შტამის გამო უცხოელებს 14 დღით ისრაელში შესვლა აეკრძალებათ. ისრაელში ამ დროისთვის ოფიციალურად დადასტურებულია, ომიკრონ შტამის სავარაუდო ერთი შემთხვევა, რომელიც პირველად სამხრეთ აფრიკაში აღმოაჩინეს.

კორონავირუსის ახალი ვარიანტის, ,,ომიკრონის“ გამო შეზღუდვები კიდევ უფრო მკაცრდება ნიდერლანდებში, სადაც მომდევნო სამი კვირის განმავლობაში, კაფეები, მუზეუმები და კინოთეატრები, ადგილობრივი დროით 17:00 საათზე დაიხურება. სახლში 13 წლის ზემოთ მყოფი მხოლოდ 4 ადამიანის შეკრება იქნება ნებადართული, ასევე გაიცა სახლიდან მუშაობის რეკომენდაციაც. მთელი ქვეყნის მასშტაბით ბაგა-ბაღები, სკოლები და უნივერსიტეტები ღია დარჩება.  ქვეყნის ხელისუფლება მსგავს ზომებს ქვეყნის საავადმყოფოების გადატვირთვისგან დასაცავად მნიშვნელოვან ნაბიჯად მიიჩნევს.

ნიდერლანდებში ყოველდღიურად ინფიცირების მაჩვენებელმა 22 000-ს მიაღწია. ნიდერლანდებში თვის დასაწყისში ხელისუფლებამ შეზღუდვები დააწესა, რომელიც რესტორნებისა და მაღაზიების ადრე დახურვასა და სპორტული ღონისძიებების მაყურებლის გარეშე ჩატარებას ითვალისწინებდა. ასევე იგეგმებოდა კოვიდ საშვების ამოქმედებაც. აღნიშნულ ქმედებას საპროტესტო ტალღა და მოქალაქეებსა და სამართალდამცავებს შორის დაპირისპირება მოჰყვა.

კორონავირუსის ე.წ სამხრეთ აფრიკული ვარიანტი, სახელწოდებით ,,ომიკრონი“ , პირველად 24 ნოემბერს დაფიქსირდა. ჯანმომ ვირუსს შემაშფოთებელი ვარიანტის კლასიფიკაცია მიანიჭა და აღნიშნა, რომ მას სავარაუდოდ რეინფიცირების მაღალი მაჩვენებელი ახასიათებს.

შეგახსენებთ, "'ომიკრონის" პრევენციის მიზნით ახალი რეგულაციები წესდება საქართველოშიც.  კერძოდ,  8 ქვეყნის მოქალაქეებისთვის საზღვრის კვეთასთან დაკავშირებით, რეგულაციები წესდება.

ნებისმიერი პირი, მოქალაქეობის მიუხედავად, რომელსაც ბოლო 14 დღის განმავლობაში, აქვს შემდეგ ქვეყნებში მოგზაურობის ისტორია, საქართველოში შემოსვლისას ექვემდებარება 14-დღიან იზოლაციას/კარანტინს საკარანტინე სივრცეში.

აღნიშნული ქვეყნებია:

სამხრეთ აფრიკა

ბოცვანა

ზიმბაბვე

ნამიბია

ლესოტო

ესვატინი (სვაზილენდი)

მოზამბიკი

მალავი

14-დღიანი იზოლაციის/კარანტინის დასრულების შემდეგ, პირებს ჩაუტარდებათ PCR-კვლევა.

საქართველოს მოქალაქეების შემთხვევაში, საკარანტინე სასტუმროსა და PCR-კვლევის ხარჯებს ფარავს სახელმწიფო, ხოლო უცხო ქვეყნის მოქალაქეების შემთხვევაში - თავად უცხო ქვეყნის მოქალაქე.

გადაწყვეტილება საქართველოში 28 ნოემბრიდან ამოქმედდება.