ომიკრონის ფართო გავრცელების ფონზე, როდესაც ინფიცირების რეკორდულ რაოდენობასთან ერთად დადებითობის მაჩვენებელიც 33%-ზე მეტია, ტურისტული მობილობა მცირდება და ზამთრის კურირტებზე სასტუმროები ცარიელდება.„კომერსანტი“ მესტიაში მდებარე რამდენიმე სასტუმროს დაუკავშირდა, მათ შორის „ბანგურიანს“, „შალე მესტიას”, „ლემი მესტიას” და „ბუდე მესტიას”. როგორც აღნიშნული სასტუმროების წარმომადგენლები “კომერსანტთან“ საუბრისას აცხადებენ, მიუხედავად იმისა, რომ მესტია ევროპაში ერთ-ერთ ყველაზე კარგ სათხილამურო კურორტად არის აღიარებული, დამსვენებელთა რაოდენობა მაინც დაბალია. სასტუმროების წარმომადგენლების ნაწილი ამას სწორედ ინფიცირების გაზრდილ მაჩვენებელს უკავშირებს.
როგორც სასტუმრო “ბანგურიანის” გაყიდვების მენეჯერი გვანცა გოგუა “კომერსანტთან“ საუბრისას აღნიშნავს, სასტუმრო ძირითადად ქართველ დამსვენებელზეა დამოკიდებული, თუმცა მესტიით დაინტერესება ძალიან დაბალია და დამსვენებლების უმეტესობა ბაკურიანისკენ, გუდაურისკენ და ყაზბეგისკენ იხრება.
„ძირითადად ადგილობრივ დამსვენებელზე ვართ დამოკიდებული, თუმცა მათი რაოდენობაც ძალიან მცირეა, რატომღაც ბაკურიანი, გუდაური და ყაზბეგი უფრო დაიტვირთა, ველოდებით რომ სიტუაცია გაზაფხულიდან შეიცვლება. მიუხედავად იმისა, რომ მესტია მისი რელიეფიდან გამომდინარე ევროპაში ერთ-ერთ საუკეთესო სათხილამურო კურორტად ითვლება და მკვეთრი ვარდნების გამო ექსტრემალებს ძალიან აინტერესებთ, წელს როგორც ქართველი, ასევე უცხოელი ტურისტები შარშანდელთან შედარებით ნაკლებია.
ჩვენ სასტუმროში ჯამში 36 ნომერია და აქედან საშუალოდ 5-10% არის დაკავებული, არც “მწვანე პასპორტის” სავალდებულო მოთხოვნის გაუქმების შესახებ შეცვლილა სიტუაცია“, - აღნიშნა გვანცა გოგუამ.
“Შალე მესტიაში“ გვითხრეს, რომ მათ სასტუმროს ძირითადად ქართველი დამსვენებლები სტუმრობენ, მათივე თქმით წესით მთელი სეზონი დატვირთული უნდა ჰქონოდათ თუმცა მწვანე პასპორტების ამოქმედების გამო ჯავშნები გაუუქმდათ.
“ჩვენი დამსვენებელი ძირითადად ქართველია, უცხო ქვეყნებიდან ჯავშნები მიღებული გვქონდა, თუმცა მწვანე პასპორტების გამო გაგვიუქმდა, მთელი წელი დატვირთული უნდა გვქონოდა, თუმცა ახლა მინიმალურად ვართ დატვირთულები. 15 ნომერი გვაქვს და მათგან სტაბილურად 20-30% მუშაობს“, - აცხადებენ შალე მესტიაში.
როგორც “ბუდე მესტიის” მეპატრონემ თათია თეთრაშვილმა გვითხრა, სასტუმროს 10 კოტეჯი აქვს და ძალიან მცირე დატვირთვით მუშაობს, მისივე თქმით, მიმდინარე ზამთრის სეზონზე ყოფილა დღეები, როცა დამსვენებელი თითქმის არ ყოლიათ.
„წელს ზამთრის სეზონი დიდი დატვირთვით დაიწყო, თუმცა როდესაც კორონავირუსის გავრცელების მაჩვენებელი პიკურ ფაზაში შევიდა, არამარტო ჩვენი სასტუმრო, არამედ მესტია დაიცალა, ახლა შედარებით გააქტიურდა ხალხი. ჩვენ 10 კოტეჯი გვაქვს და აქტიურ სეზონზე ივლისი - აგვისტო ყველა დატვირთულია. ზამთრის სეზონს რაც შეეხება, იანვრის დასაწყისშიც ასე იყო და ახლა ეს პერიოდი ძალიან დაბალი დატვირთვაა. იყო დღეები, რომ საერთოდ არავინ არ გვყავდა.
წინასწარი ჯავშნების რაოდენობა ახლა ნაკლებია, უფრო ბოლო წუთის ჯავშნები შემოდის, წინასწარ ზოგადად უცხოელები ჯავშნიან.
დამსვენებელთა რაოდენობა არა მგონია “მწვანე პასპორტების” ამოქმედებას ან გაუქმებას უკავშირდებოდეს, უფრო მგონია რომ მათზე პანდემიურმა სიტუაციამ იმოქმედა, რადგან იმ პერიოდში, როდესაც ძალიან მაღალი მაჩვენებელი ფიქსირდებოდა, ბევრი ჯავანი გაგვიუქმდა მესტიაში ქუჩაშიც კი ვერ შეხვდებოდით დამსვენებელს, თითქმის ყოველ დღე გვიგზავნიდნენ ტესტის პასუხს და აუქმებდნენ ჯავშანს“, - აღნიშნა თათია თეთრაშვილმა.
სასტუმროს “ლემი მესტიაში” მეპატრონე იოსებ ჯაფარიძე ამბობს, რომ მას როგორც ქართველი, ასევე უცხოელი დამსვენებლები სტუმრობენ, მისი სასტუმრო ათნომრიანია და დაახლოებით 70%-ით ამუშავებს. როგორც იოსებ ჯაფარიძემ ჩვენთან აღნიშნა, სასტუმროს სრული დატვირთვით მუშაობაში ხელს უშლის ის ფაქტი, რომ მესტიაში დენის პრობლემაა და მოსახლეობას ელექტროენერგია გრაფიკით მიეწოდება.
ტურიზმის ეროვნული ადმინისტრაციის 2022 წლის იანვრის ტურიზმის წინასწარი ანგარიშის მიხედვით, გასულ თვეს საქართველოში 199 393 საერთაშორისო მოგზაური იმყოფებოდა, რაც 2019 წელთან შედარებით 62%-ით ნაკლებია.
თაკო კვაჭანტირაძე