უკრაინაში ომის დაწყების შემდეგ აფრიკაში პირველად ჩაიტანეს ზღვით მარცვლეულის პარტია. როგორც BBC იტყობინება, უკრაინიდან ტვირთი ჯიბუტიში ჩაიტანა ლიბანის დროშით მცურავმა გემმა Brave Commander-მა. მასზე ეთიოპიისთვის განკუთვნილი 23 ათასი ტონა ხორბალია.
ჯიბუტიში გემის ჩასვლა დაადასტურა უკრაინის ინფრასტრუქტურის სამინისტრომ. ხომალდი 16 აგვისტოს გავიდა უკრაინის პორტ იუჟნიდან. გზას შავი ზღვიდან ჯიბუტიმდე, რომელიც ინდოეთის ოკეანის სანაპიროზე მდებარეობს, ორი კვირა დასჭირდა.
უკრაინის კონტროლქვეშ მყოფი შავიზღვისპირა პორტებიდან მარცვლეულის საზღვაო გზით ტრანსპორტირება შესაძლებელი გახდა მას შემდეგ, რაც გასულ თვეში სტამბოლში გაეროს ეგიდით მიღწეულ იქნა შეთანხმება. რუსეთმა ვალდებულება იკისრა, არ დაესხას თავს ინფრასტრუქტურის ობიექტებს, რომლებიც მარცვლეულის ექსპორტთანაა დაკავშირებული.
ჯიბუტიში ჩასული ხორბლის პარტიის ტრანსპორტირების ხარჯები გასწია გაეროს სასურსათო პროგრამამ. უწყების შეფასებით, ერთი კვირა დასჭირდება ხორბლის ტომრებში დაფასოებას და სახმელეთო გზით ჩატანას ეთიოპიაში, სადაც 20 მილიონ ადამიანს ესაჭიროება სურსათით დახმარება.
ომამდე უკრაინის სასურსათო პროგრამის უწყება თავისი სასურსათო დახმარებისთვის სურსათის სამ მეოთხედს უკრაინიდან და რუსეთიდან იღებდა. ომის დაწყების შემდეგ უკრაინის პორტების ნაწილი რუსეთის კონტროლქვეშ აღმოჩნდა, ოდესისა და ნიკოლაევის პორტები კი დაბლოკილია. ამის გამო მათში დაგროვდა საექსპორტოდ განკუთვნილი მილიონობით ტონა მარცვლეული.
radiotavisupleba.ge