KSE Institute-ს (Kyiv School of Economics) უახლოესი ინფორმაციის მიხედვით, ომის შედეგად უკრაინის ეკონომიკის პირდაპირი ზარალი უკვე $113,5 მილიარდამდე გაიზარდა.

ამის შესახებ KSE Institute-ს რეფორმების მხარდაჭერის პროექტების ხელმძღვანელმა მაკსიმ ნეფიოდოვმა განაცხადა.

„რუსული აგრესიისგან უკრაინის ეკონომიკის პირდაპირი ზარალის უახლესი მაჩვენებელი დაახლოებით 113,5 მილიარდი დოლარია. არის ჩვენი კვლევის კიდევ ერთი სფერო - აღდგენის საჭიროება. და ამ მიმართულებით აქტიურად ვითარდება პროექტი „რუსეთი გადაიხდის“, - განაცხადა ნეფიოდოვმა.

მისი თქმით, უპილოტო საფრენი აპარატების და თანამგზავრების დახმარებით შეგროვებული უკრაინის განადგურებული და დაზიანებული ინფრასტრუქტურის სურათები აქტიურად ანალიზდება, რათა მოხდეს არა მხოლოდ მიყენებული ზიანის აღრიცხვა, არამედ ყოვლისმომცველი გადაწყვეტილებების შეთავაზება დაზიანებული ქალაქების აღდგენისთვის.

„აქ ჩვენ ვცდილობთ მხარი დავუჭიროთ როგორც ცენტრალურ ხელისუფლებას, ასევე ადგილობრივ თვითმმართველობას. როდესაც რესტავრაცია დაიწყება, ჩვენ გვინდა არა მხოლოდ ძველი საბჭოთა ინფრასტრუქტურის აღდგენა. გვინდა, რომ ეს ინფრასტრუქტურა იყოს უფრო კომფორტული და დააკმაყოფილოს თანამედროვე ურბანული პრინციპები და ევროპული სტანდარტები. ბოლოს და ბოლოს, უკრაინა უკვე გახდა ევროკავშირის წევრობის კანდიდატი და ჩვენ მზად უნდა ვიყოთ მაქსიმალური ინტეგრაციისთვის“, - აღნიშნა ექსპერტმა.

პროექტის „რუსეთი გადაიხდის“ ფარგლებში ყველას შეუძლია ნახოს დანგრეული და დაზიანებული ობიექტების სურათები და შეადაროს ისინი განადგურებამდე არსებულ სურათებს.

„მომდევნო ეტაპზე, რომლისთვისაც ვემზადებით, ვგეგმავთ ფოტოების ატვირთვას, თუ როგორ მიმდინარეობს ამ ობიექტის უკვე რესტავრაცია. და სასურველია, რომ ეს აღდგენა ხარისხობრივად ახალ ტექნიკურ დონეზე მოხდეს“, - დასძინა ნეფიოდოვმა.

როგორც ცნობილია, უკრაინის პრემიერ მინისტრის დენის შმიგალის შეფასებით, გრძელვადიან პერსპექტივაში უკრაინის აღდგენა მინიმუმ 600 მილიარდი დოლარი დაჯდება.